Dünyasını dəyişmiş bəzi məşhurlar var ki, onların ölüm səbəbləri müəmallı olaraq alır. Araşdırmalar nəticəsində həmin şəxslərin ölümünə müxtəlif səbəblər göstərilsə də, deyilənlər nəinki məşhurun fanatlarını, ümumiyyətlə kütləni qane etməyib. Kulis.az üstündən illər ötsə də, ölüb səbəbi əsaslandırılmayan 10 məşhuru təqdim edir.

Şahzadə Diana

Bütün dünyanın sevgisini qazanmış Şahzadə Diana avtomobil qəzasında dünyasını dəyişsə də, onun ərinin ailəsi tərəfindən sui-qəsdə qurban getdiyi iddiaları bu günə qədər də səngimək bilmir. Dövrünün ən dəbli qadını hesab olunan Diananın saçından makiyajına, geyimindən davranışlarına qədər olan hər şeyi Kral ailəsinin qaydaları ilə daban-dabana zidd idi. Şahzadə səmimi davranışları və göstərdiyi yardımlarla da hər kəsin sevgisini qazanmışdı. Siyasi güclə yanaşı, sevgilisi Dodi ilə əldə etdiyi maliyyə azadlığı onun yaxın ətrafını narahat etməyə başlamışdı. Diananın hamilə olması və Dodi ilə evlənmək xəbəri qəzet manşetlərində yer alandan sonra o, faciəli şəkildə həyatını itirdi. Deyilənə görə bu xəbər İngilis Kral ailəsi üçün son hədd oldu.

Qreys Kelli

“Oskar” mükafatı qazanan, Alfred Hiçkokun sevimli aktrisası hesab olunan aktrisa Qreys Kelli karyerasını yarımçıq qoyaraq Monnako knyazı III Rene ilə ailə qurmuşdu. Şahzadə titulu qazanan aktrisa 1982-ci ildə qızı ilə keçirdiyi yol qəzasında həyatını itirdi. Bir çoxları Şahzadənin ölümündə qızı Stefanini günahlandırır. Qəzadan əvvəl Kellinin avtomobilini müşayiət edən digər avtomobilin sürücüsü ifadə verərkən ana ilə qızın avtomobildə dava etdiklərini bildirmişdi. Amma bu iddiaların doğruluğu sübut olunmadı. Mövzu haqqında Monako knyazlığı da heç bir zaman açıqlama vermədi.

Merlin Monro

Əfsanəvi ulduz Merlin Monronun 1962-ci ildə yaşadığı evdə meyiti tapıldı. Aparılan təhqiqatlar nəticəsində onun yüksək dozada narkotik qəbulundan öldüyü açıqlandı. Ancaq bu açıqlama heç kəsi qane etmədi. Çünki Monronun ABŞ Prezidenti Kennedi ilə isti əlaqələri vardı. Bu səbəbdən də onun ölümündə mafiya qruplarının və Kennedi ailəsinin adı hallandı. Bir sözlə Merlin Monro səbəbləri bəlli olmayan ölümü ilə də əfsanəyə çevrildi.

Maykl Cekson

Dünya şöhrətli müğənni Maykl Ceksonun ölümü də bir çox sui-qəsdləri yenidən xatırlatdı.
Pop musiqinin kralı Maykl Cekson 25 İyun 2009-cu ildə gözlənilmədən dünyasını dəyişdi. Spirtli içkilərlə yanaşı sakitləşdirici dərmanlar qəbul etməsi onun ölümünün əsas səbəbi kimi təqdim olundu. Ölümündən iki il sonra Ceksonun həkimi Konrad Myurrey ulduzun ölümündə günahlandırıldı. Çoxları isə elə hesab edirdi ki, Maykl Ceksonun ölümü şayiədən başqa bir şey deyil. Əslində müğənni borclu olduğu adamların və medianın diqqətindən uzaqlaşmaq üçün bu vasitəyə əl atıb və hələ də yaşayır.

Brüs Li

Məşhur aktyor Brüs Li 1973-ci ildə 32 yaşında həyatını itirdi. Li 1973-ci ildə “Əjdahanın çıxışı” filminin çəkilişləri zamanı beyin şişi səbəbiylə öldü. Ancaq bəzilərinə görə o və ailəsi lənətləndiyi üçün naməlum cinayətə qurban gedib.
Bəzilərinə görə isə Li döyüş sirlərini qərblilərə ötürdüyü üçün Çin mafiyası tərəfindən öldürülüb.
Onun ölümündən iyirmi il sonra oğlu Brandon Li də şübhəli ölümlə dünyasını dəyişdi. Deyilənlərə görə film çəkilişləri zamanı həqiqi siladan açılan atəş onun ölüm səbəbi olmuşdu.

Elvis Presli

Əfsanəvi müğənni Elvis Presli 1977-ci ildə dünyasını dəyişib. Çox yemək qəbul etmə xəstəliyinə tutulan müğənninin ölüm səbəbi ürək çatışmazlığı olsa da, onun bu günə qədər də sağ qaldığı haqqında şayiələr səngimək bilmir.

Uitni Hyuston

Otel otağında ölü tapılan məşhur Amerika müğənnisi Uitni Hyustonun öldürülməsi ilə bağlı iddialar da zaman-zaman gündəm xəbərləri olub. Bu ilin fevralında xüsusi detektiv Pol Huebl 48 yaşlı məşhur müğənninin narkotik borcu səbəbilə mafiya tərəfindən öldürüldüyünə dair güclü dəlillər tapdığını açıqlamışdı.

Con Lennon

Əfsanə "Bitlz" qrupunun sevilən üzvü Con Lennon karyerasının ən yüksək mərhələsində ruhi xəstə Mark Devid Çepmen adlı fanatı tərəfindən 8 Dekabr 1980-də Nyu-Yorkdakı ofisinin qarşısında öldürülüb.
Sui-qəsd nəzəriyyələrinə görə Con Lennon uzaqdan istifadə olunan silahla öldürüldü. Başqa fərziyyələrə görə isə onun ölümünün arxasında ABŞ hökuməti var. Buna səbəb kimi də Lennonun yeni seçilən Reyqan rəhbərliyinə qarşı sərt bəyanatlarla çıxış etməsi olub. Ən qəribəsi odur ki, Lennon illər öncə başdanxarab qatil əlindən qətlə yetiriləcəyi bardə yarızarafat, yarıciddi açıqlama vermişdi.

Dəfnə Coy Foster

Türk aktrisası və aparıcısı Dəfnə Coy Foster yoldaşları ilə əyləndikdən sonra dostu Kərəm Altanın evində canını tapşırıb. Astma xəstəsi olsa da, həddindən artıq içki qəbulu onun ölümünün əsas səbəb kimi yayılsa da, əsl ölüm səbəbi bu günə qədər də heç kimə aydın olmadı.

Anna Nikole Smit

Amerikalı striptiz ulduzu və modeli Anna Nikola Smit qız övladını dünyaya gətirəndən bir il sonra 2007-ci ilin 8 fevral günü Hollivuddakı kafelərdən birində qəfildən yerə yıxılaraq vəfat edib. Onun ölüm səbəbi ağ ciyər sətəlcəmi göstərilsə də, yüksək dozalı dərman qarışıqlarından həyatını itirdiyi deyilir.

• Hipnosun mərhəməti - Bayram Soylunun hekayəsi
• “Naxçıvan Muxtar Respublikası - 100” adlı təqvim hazırlandı
• İstanbulda “Bir arzu gerçəkləşir“ adlı fərdi sərgisi açılacaq