Kulis.az gənc şair Emin Piri ilə müsahibəni ixtisarla təqdim edir.

- Şairin həyatı mütləq dağınıq, səliqəsiz olmalıdır?

- Məncə, bu həyatına yön verə bilməyən insanların uydurmasıdır. Düzdür, insan yaradıcılığa köklənəndə, öz dünyasını quranda bir qədər səliqəsiz dağınıq görünə bilər və yaxud elə dağınıq da olar. Razıyam, kimsəni düşünməməli, kiməsə görə həyatına düzən verməli deyilsən. Bəs, özün üçün? Yaradıcılığın üçün bunu niyə etməyəsən? Beş gün dağınıq olanda, beş gün də heç olmasa həyata düzən vermək lazımdır. Çünki davamlı dağınıqlıq sonradan yaradıcılığın da dağınıq olmasına və istedadın tamamən məhv olmasına səbəb olur. Ömrü boyu dağınıq ola biləcək yazarı isə yalnız onun hər bir nazına dözəcək bir xanım xilas edə bilər. Əks hallarda isə o yalnız, yaradıcılığıyla birgə məhv ola bilər.

- Poeziyaya erotika əslində yaraşır, hardasa pis də səslənmir... Bu, zamanın tələbidir? Doğrudanmı çağdaş Azərbaycan oxucusu şəhvanilik axtarır?

- Erotikasız həyat, erotik fantaziyasız incəsənət ola bilməz. Erotik düşüncədən kasad olan insan heç vaxt istedadlı mətn yarada bilməz. Ümumiyyətlə, belə şəxs münasibətlərdə də uğursuz, mənasız, eyni zamanda təhlükəli tipdir. Quranın özündə belə qadın kişi münasibətlərindən, cinsəllikdən bəhs olunursa, niyə onun yaratdığı bəndə belə şeylərdən yaza bilməsin? Amma baxır necə. Sadəcə bunu daha poetik, daha dərin, daha düşüncəli vermək lazımdır. Ehtirasdan məhrum insan qədər təhlükəli kimsə yoxdur. Mənə görə, erotika həm də Tanrıya qovuşmaqdır. Yenə deyirəm, baxır nəyi və necə yazmalı və yaşamalı.

- Bilirik ki, subaysan. Şairlə də dolanmaq hər qadının işi deyil. Gələcək həyat yoldaşın necə olmalıdır?

- Bu barədə hələ düşünməmişəm. Vaxtilə o qədər qıza söz vermişəm ki, indi buna görə vicdan əzabı çəkirəm. Bilirəm ki, həmin xanımların ahı mənim çiyinlərimdədir. Buna görə də bir müddət tək qalmaq istəyirəm. Ən azından günahlarımdan təmizlənənə kimi.

serhed.info

• Mehmet Ali Erbil infarkt keçirtdi
• Türk dünyasının yaddaşını yazıya çevirən adam - Bir ziyalının portreti
• Arabesk dinlənmələri 435 faiz artdı – Gənclər arasında