"Gül becərirəm, qəzəl əzbərləyirəm, xörək bişirirəm"

"Gül becərirəm, qəzəl əzbərləyirəm, xörək bişirirəm"
24 aprel 2020
# 11:10

Xalq artisti, xanəndə Səkinə İsmayılova karantin günlərindən danışıb.

Kulis.az-a açıqlama verən xanəndə karantin qərarından sonra evdə olduğunu, ev işləri gördüyünü, darıxmadığını bildirib.

"Evdə o qədər iş var ki. Hansı qadın ki, deyir mən evdə darıxıram, mən bu fikirlə razılaşmıram. Çünki səhnədə olmadığım vaxtlarda mən evdə çox olmuşam. Olmağı da sevirəm. İndi də evdəyəm. Gözəl ev güllərim var, onlara baxıram, onların nazı ilə oynayıram. Yaz aylarında güllərin torpaqlarını dəyişmək lazım gəlir. İndi bir halda ki, özüm evdəyəm, hamısını da özüm edirəm. Bundan başqa neçə vaxtdan bəri oxumaq, öyrənmək istədiyim qəzəllər vardı, indi imkan düşmüşkən klassiklərimizin qəzəllərini əzbərləyirəm. Çünki xanəndənin ifası o zaman daha gözəl və səmimi alınır ki, o, yeni sözlə, yeni qəzəllə tamaşaçıların qarşısına çıxır. Xanəndə var ki, otuz, qırx il eyni qəzəlləri oxuyur, eyni sözlərlə tamaşaçının qarşısına çıxır.

Xanəndə saatlarını daha çox mətbəxtə keçirdiyini, yemək bişirməkdən xüsusi həzz aldığını qeyd edib.

"Mətbəxdə də çox ləzzətlə işləyirəm. İndi nəvəm iki saatlıq icazə ilə yanıma gəlib. Səhər yuxudan duran kimi deyib ki, mən heç nə yemirəm, aparın nənəmin bişirdiyi yeməklərdən yemək istəyirəm. Mən də onun ürəyi istəyənləri bişirirəm. Ümumiyyətlə, mətbəxi çox sevirəm. Bilirsiniz ki, mən bakılıyam, yaxşı xörəkləri sevirəm. Evdə heç bir iş görmək istəməsəm də, gözəl yeməklər bişirməyi xoşlayıram. Yəni dediyim odur ki, evdə bir tərəfdə sıxılıb qalmamışıq. Karantin günlərindən maksimum səmərəli istifadə etməyə çalışırıq. Həyatı, yaşamağı, əzizlərimizi seviriksə, dövlətimizin qoyduğu qanunlara əməl etməliyik.

Xalq artisti çətin günlərdə insanları bir-birinə əl tutmağa, imkansızlara kömək etməyə çağırıb.

"Əgər bu gün məndə üç manat varsa, mən onun ikisini kiməsə verməliyəm. Bu mütləqdir. Elə də edirəm. Böyük bir nəslin nümayəndəsiyəm. Mənimkilərin də çatanı, çatmayanı var. Bu gün də mən çalışıram ki, onların heç biri əziyyət çəkməsinlər. Gündəlik qazanc dalınca gedən qohumlarım var ki, indi evdən çıxa bilmirlər. Eybi yoxdur, mən nəyə gücüm çatarsa, onlara kömək edəcəyəm. Bunu da tək mən yox, hamı etməlidir.

Mehriban xanım bir ana kimi hamıya müraciət etdi. Biz də bizim yaxşılığımız, gələcəyimiz üçün edilən bu müraciəti dəyərləndirdik. Müəyyən çətinliklərdən sonra hər şey qaydasına düşəcək".

# 4363 dəfə oxunub

Oxşar xəbərlər

Cadugərliyin faciələrlə dolu  tarixi... - 300 il ərzində əlli min qadın niyə yandırılmışdı?

Cadugərliyin faciələrlə dolu tarixi... - 300 il ərzində əlli min qadın niyə yandırılmışdı?

14:00 22 noyabr 2026
Atatürkün dəfnində Azərbaycan Xalq Cümhuriyyətinin iki naziri vardı – Onlar kim idi?

Atatürkün dəfnində Azərbaycan Xalq Cümhuriyyətinin iki naziri vardı – Onlar kim idi?

10:00 22 noyabr 2026
Vyetnam Prezidenti: "Azərbaycan həm Avropanın, həm də Asiyanın mədəni irsini daşıyan inci hesab olunur"

Vyetnam Prezidenti: "Azərbaycan həm Avropanın, həm də Asiyanın mədəni irsini daşıyan inci hesab olunur"

15:26 21 noyabr 2026
Azərbaycan dünyanın ən böyük nağıl festivalında

Azərbaycan dünyanın ən böyük nağıl festivalında

15:10 21 noyabr 2026
"Ulduz"un  Xaqani Şirvaninin 900 illiyinə həsr olunmuş xüsusi buraxılışının təqdimatı keçirildi

"Ulduz"un Xaqani Şirvaninin 900 illiyinə həsr olunmuş xüsusi buraxılışının təqdimatı keçirildi

12:41 21 noyabr 2026
"Həqiqət zərrəsi tapılmayanda yalanı böyük tikələrlə udurlar..." - İsaak Başevis-Zinger

"Həqiqət zərrəsi tapılmayanda yalanı böyük tikələrlə udurlar..." - İsaak Başevis-Zinger

12:30 21 noyabr 2026
Ana səhifə Reels Yazarlar Xəbərlər