Kulis.az akademik Teymur Kərimlinin Mirzə Ələkbər Sabirə yazdığı nəzirəni təqdim edir.
Ağlama!
Ağladıqca kişi qeyrətsiz olur...
(Mirzə Ələkbər Sabir)
Neyçün itirdin özünü, ağlama!
Sən kişisən, sil gözünü, ağlama!
Türkün atı kişnəsə, başlar savaş!
Keçmişə boylan, dərə keç, dağlar aş!
Kəlləbəkəllə yağıya, başbabaş
Göstərə gör zor gücünü, ağlama!
Sən kişisən, sil gözünü, ağlama!
Var qürurun, sən ki bəşərsən, düşün!
Gözdən axıb çünki düşərsən, düşün!
Ər kimi davran, kişi, ərsən, düşün!
Əzbər elə ər sözünü, ağlama!
Sən kişisən, sil gözünü, ağlama!
Sən gül, o, biz, mən də gülüm, boşca ver!
Sönsə, alışmazmı külüm? Boşca ver!
Kimsə sənə yazsa ölüm, boşca ver,
Silgini al, poz yazını, ağlama!
Sən kişisən, sil gözünü, ağlama!
Türk igidi Tanrı deyibdir sənə!
Gör nə qədər zərbə dəyibdir sənə?!
Tarix özü naz eləyibdir sənə;
Kim çəkəcəkdir nazını, ağlama!
Sən kişisən, sil gözünü, ağlama!
Vurma qulaq ardına Teymur sözün,
Gör nə dəyişmiş bu cahan, aç gözün!
Keçdi gecə, indi gəlir gündüzün;
Qarşıla dan-gündüzünü, ağlama!
Sən kişisən, sil gözünü, ağlama!
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər