Rasim Balayev: “Övladlarımı evə buraxmıram”

Rasim Balayev: “Övladlarımı evə buraxmıram”
3 aprel 2020
# 17:16

“İndiyə qədər bu virusun dərmanı tapılmayıb. Məsuliyyətsiz şəkildə küçələrə axışan adamlar nəyə güvənib belə başısoyuqluq edirlər, bilmirəm.”

Bu sözləri Xalq artisti Rasim Balayev Kulis.az-a açıqlamasında bildirib. Karantin günlərinin yaşam tərzində ciddi dəyişikliyə səbəb olmadığını deyən Xalq artisti bu həyat tərzinə alışdığını bildirib:

“Heç kimi evə buraxmıram. Övladlarım ərzaq və lazım olan şeyləri alıb gətirib qapının ağzına qoyub gedirlər. Gigiyena qaydalarına əməl edirəm. Bildiyiniz kimi, bir müddət əvvəl ağır əməliyyat keçirtmişdim. Həkimlərin ciddi nəzarəti altında olduğum üçün evdən çölə çıxmırdım. Ailə üzvlərim xaricində heç kimlə təmasda olmurdum. Ona görə də mən karantin günlərinin fərqini sizlər qədər hiss etmirəm. Düzdür, çətindir, xüsusilə gənclər üçün evə qapanıb qalmaq dözülməz ola bilər. Amma özümüzün və əzizlərimizin yaşaması üçün buna məcburuq.”

Xalq artisti həmçinin bu günləri insanların özləri ilə hesablaşmaq üçün fürsət kimi dəyərləndirir:

“Bu günləri yaxşı dəyərləndirmək lazımdır. Neçə illərdir insanlar vaxt azlığını bəhanə edib kitab oxumur. İndi bol vaxtımız yaranıb. Bu günləri kitab oxumaqla, filmlərə baxmaqla dəyərləndirmək olar. Mənə elə gəlir, insan bir az da oturub özü ilə hesablaşmalıdır bu günlərdə. Papağını qabağına qoyub düşünməlidir. Mən necə insan olmuşam. Atama, anama, yaxınlarıma, dostuma, tanışıma nə xeyrim dəyib. Hansı səhvləri etmişəm. Bu, həm də onu göstərir ki, biz bəzi şeylərin qədrini bilməmişik”.

Ölkəmizdə görülən tədbirləri dəstəklədiyini bildirən Rasim Balayev insanları bu günlərdə daha məsuliyyətli olmağa və evdə qalmağa çağırır:

“72 yaşım var, belə bir vəziyyət görməmişdim. Dünyanı lərzəyə salan hadisə baş verir. Tarix yaşayırıq. Yer üzündə həyat sönüb. Ölkələrin bir-biri ilə, hətta ölkəmizin ətraf rayonlarla əlaqəsi kəsilib. Bu dövrü adlamaq üçün görülən bütün tədbirləri qiymətləndirmək və dəstəkləmək lazımdır. Təəssüflər olsun ki, bir çox insanlar bu qaydalara əməl etmək istəmir. Narazı qalanlara da rast gəlmək olur. Polislərimiz, həkimlərimiz səfərbər olub bizim üçün. Polis küçələrdə gəzən insanları saxlayıb sorğu-sual etmək istəyir, baxırsan ki, heç ona məhəl qoymaq istəmirlər. Bu bəlaya dırnaqarası baxanlar başa düşmək istəmirlər ki, onlar bu hərəkətləri ilə təkcə özlərinin yox, başqalarının da həyatlarını təhlükəyə atırlar. İndiyə qədər bu virusun dərmanı tapılmayıb, küçələrə axışan məsuliyyətsiz adamlar nəyə güvənib belə başısoyuqluq edirlər, bilmirəm. Bu saat koronavirusdan qorunmağın və həyatda qalmağın yeganə yolu evdə qalmaqdır. Biz bu gün hökumətin verdiyi qərara, qoyduğu qanuna riayət etməliyik. Qaydalara riayət etməyən ölkələri gördük. İtaliya, İspaniya, ABŞ bu gün ölümlərin qarşısını ala bilmir. Mən İtaliyada olmuşam, bilirəm ki, onlar sözə baxan, evdə oturan xalq deyil. Onlar heç evdə yemək də yemirlər, yatandan yatana evə gələn bir xalqı birdən-birə evə yığmaq çox çətin oldu. Ona görə, ən çox zərbə alan ölkələrdən biri İtaliyadır. Biz bundan nəticə çıxartmalıyıq.”

# 14372 dəfə oxunub

Oxşar xəbərlər

“The Comeback King”  filminin treyleri yayımlandı

“The Comeback King” filminin treyleri yayımlandı

18:51 19 noyabr 2026
Xulio İqlesias  barəsində araşdırma başladı

Xulio İqlesias barəsində araşdırma başladı

17:48 19 noyabr 2026
“Glastonbury-2027”nin əsas ifaçıları məlum oldu

“Glastonbury-2027”nin əsas ifaçıları məlum oldu

17:12 19 noyabr 2026
Məşhur yazıçı vəfat etdi

Məşhur yazıçı vəfat etdi

16:47 19 noyabr 2026
Elton Con süni intellektə qarşı sənətçiləri müdafiə etdi: “Yaradıcılığımızı əlimizdən almayın”

Elton Con süni intellektə qarşı sənətçiləri müdafiə etdi: “Yaradıcılığımızı əlimizdən almayın”

16:21 19 noyabr 2026
“İvan İliçin ölümü” tamaşasının premyerası keçirildi

“İvan İliçin ölümü” tamaşasının premyerası keçirildi

15:55 19 noyabr 2026
#
#
Ana səhifə Reels Yazarlar Xəbərlər