Bu gün tanınmış şair, yazıçı, tərcüməçi, “Alatoran” dərgisinin baş redaktoru Rasim Qaracanın 60 yaşı tamam olur.

Rasim Qaraca 90-cı illər ədəbi nəslinin önəmli imzalarından biridir.

O, 1985-ci ildə Bakı Dövlət Universitetinin jurnalistika fakültəsini bitirib. Bir müddət "Mayak" və "İşıq" qəzetlərində işləyib. 1990-cı ildə Əli Bayramlıda (indiki Şirvan şəhəri) Azad Yaşar və İsmayıl Bayramoğluyla birlikdə "Baca" ədəbiyyat dərnəyini yaradıb, dərnəyin qeyri-rəsmi mətbuat orqanı olan "Yaşıl söz" bülletenini çap etdirib.

1994-2000-ci illərdə Rusiyada yaşayıb. 2000-ci ildə Bakıya qayıdıb və onun təşkilatçılığı ilə Azad Yazarlar Ocağı yaradılıb. 2001-2008-ci illərdə bu quruma rəhbərlik edib. 2002-ci ildən redaktoru olduğu "Alatoran" həftəlik ədəbiyyat-sənət bülleteni "Ədalət" qəzetinin əlavəsi kimi işıq üzü görməyə başlayıb. 2004-cü ildən "Alatoran" müstəqil jurnal kimi yayınlanmağa başlayıb.

Rasim Qaracanın ədəbiyyat və yazıçı münasibətlərində Sovet dövründən qalma ənənələrin yenilənməsi və demokratik modellərin Azərbaycana gətirilməsi sahəsində əhəmiyyətli fəaliyyət göstərib. Hekayə, şeir və tənqidi məqalələr yazır, tərcümə ilə məşğul olur. Öz yaradıcılığında ənənəvi üslubdan imtina edir, ədəbi eksperimentləri ilə tanınır.

O, həm də “Alatoran” nəşriyyatının rəhbəridir.

R.Qaracanın “Ölüm haqqında günəş”, “R hərfi olmayan aylar”, “Siz ey ordakılar”, “Gemiler Balıkların Bulutları” şeirlər, “Əyri evin qadını”, “Mənim həyatımı yaz” hekayələr, “11 gecə” roman kitabları, eyni zamanda “Azərbaycan arqo deyimləri” və tərcümə kitabları çap olunub.

Rasim Qaracanı 60 yaşının tamam olması münasibəti ilə təbrik edirik.

• Məşhur müğənni vəfat etdi
• Rəssam Əkrəm Tağıyev vəfat etdi
• Bəşərin gülləsi - söz, sözü -məhəbbət olar - Günün şeiri