Bu gün tanınmış şair-jurnalist, Azərbaycan Yazıçılar Birliyinin üzvü Dünyamalı Kərəmin anadan olmasının100 illiyi ilə əlaqədar olaraq yubley tədbiri keçirilib.

Kulis.az xəbər verir ki, Azərbaycan Yazıçılar Birliyində baş tutan tədbirdə ziyalılar, ədəbiyyatsevərlər, media nümayəndələri də iştirak ediblər.

Tədbiri giriş sözü ilə şair, yazıçı, Azərbaycan Yazıçılar Birliyinin Yaradıcılıq məsələləri üzrə katibi İlqar Fəhmi açıb. İlqar Fəhmi şairin yaradıcılığı haqqında qonaqlara məlumat verib:

“Dünyamalı müəllimin 1930-cu illərdən, 2000-ci illərə kimi yazdığı şeirlərə nəzər saldıqda görürsən ki, hər dövr üçün bir rəngarənglik yaradıb. Düşünürəm ki, yaradıcı insan hansı yaşda olmasına baxmayaraq, yaşadığı dövrün zamanını və nəbzini tutmağı bacarmalıdır. Mən çox sevinirəm ki, tədbirin açılış mərasimi mənim öhdəmə verildi. Bu tədbir mənim öz həyat bioqrafiyamda unudulmaz bir xatirəyə çevrildi”.

Əməkdar mədəniyyət işçisi, folklorşünas Elxan Məmmədli, şairə Fəridə Ləman və Südabə İrəvanlı yubilyarın yaradıcılığından danışıblar. Bildirilib ki, Dünyamalı Kərəm yaradıcılığı ilə, sanki iki ölkə arasında körpü rolunu oynayıb.

Tədbirin sonunda söz yubliyara verilib. Şair Dünyamalı Kərəm doğulduğu Borçalı qəzasının Qoçulu kəndində keçən uşaqlıq dövründən, ali təhsil almağından, poeziyasından qonaqlara danışaraq, uzunömürlülüyün sirrini də açıb.

“Hər səhər yerimdən qalxanda 1 stəkan su içirəm, yüz yaşım olmağına baxmayaraq idman edirəm. Həyətimizdəki ağaclara qulluq edirəm, tənək artdayıram. Çalışıram ki, isti çörək yeməyim. Hər səhər isə şirin çay içirəm. Ailədə isə həmişə səmimi olmuşam ”, - deyə 100 yaşlı şair bildirib. /azertag.az/

• Yeni Ceyms Bond kim olacaq? - Kastinq direktoru "007"nin sirrini açdı
• "Oskar"lı rejissorun qızı və həyat yoldaşı avtomobildə ölü tapıldı: Dəhşətli hadisənin sirri
• "Sənə insan öldürməyi öyrətdilər..." - Yapon şairin müharibə əleyhinə yazdığı məşhur şeiri