Azərbaycanın ilk şəhid jurnalist qadını... Azərbaycanın ilk qadın milli qəhrəmanı... Bu qədər şanlı titulu qazanmaq üçün ona cəmi 29 il bəs eləmişdi.

Bu gün Milli qəhrəmanımız Salatın Əsgərovanın anım günüdür.

Jurnalistika sahəsinə böyük marağı olan Salatın 1984-cü ildə müqavilə ilə "Bakı" qəzetində, 4 il sonra isə "Molodyoj Azerbaydjana" qəzetində işləməyə başlayır.

Qadın olması və evdə körpə övladına rəğmən Salatının əsas mövzusu Qarabağ idi.

Qanlı, odlu, təhlükəli Qarabağ!

Onun sonuncu yazısı Xocalıdakı xüsusi təyinatlı polis dəstəsinin fəaliyyətindən, çətin döyüş əməliyyatlarından bəhs edən “Omonçular” olur.

Ardınca Laçından, Şuşadan reportajlar hazırlamaq üçün yenidən cəbhə bölgəsinə yollanır. Sonuncu reportajı Laçının Ağanus kəndindən olur, müsahiblərinin danışdıqlarını diktofonuna və üzərində "Özün cavabla" qeydi olan kitabçasına yazır.

O, 1991-ci ilin yanvarın 8-dən 9-na keçən gecə Şuşaya Oleq Larionovun yanına getməyə qərar verir. Polkovnik-leytenant Oleq Larionov 5 il rəhbərlik etdiyi batalyon 1990-cı ilin yazında Qazaxın Bağanis Ayrım kəndini ermənilərin hücumlarından qorumuşdu. Buna görə də ermənilər Larionovun başına 10 min rublluq mükafat vəd etmişdilər. O, həm də Qazaxda Salatın Əsgərovanı ölümdən xilas edən şəxs idi.

1991-ci il yanvarın 9-da pusquda durmuş ermənilər tərəfindən Yevlax-Laçın yolunun 141 km-də Qaladərəsi kəndi yaxınlığında Salatının və Oleqin olduğu maşını atəşə tutur. Sonradan hadisə yerinə gələnlər maşında 113 güllə deşiyi saymışdılar. Oleq Larionov ermənilərə avtomatdan atəş açmağa imkan tapır. O, beş güllə yarası almasına baxmayaraq ermənilərlə xeyli mübarizə aparır, yerə yıxılandan sonra onu yenidən güllələyirlər. Güllələrdən biri Salatının gicgahına dəyir.

Salatın Əsgərova Bakı şəhərində Şəhidlər Xiyabanında dəfn edilir. Bakıdakı küçələrin birinə və onun qətlə yetirildiyi yerin yaxınlığındakı kəndə adı verilib.

Salatın Əsgərovadan yadigar qalanlar isə oğlu Ceyhun Əsgərov və evdən çıxanda ona gözünü yumub açınca qayıdacağına verdiyi sözdür. Bir də çantasından çıxan darağı, qanlı pasportu və qayıdan kimi oğlu ilə gedəcəyi sirkə aldığı 2 bilet...

• Qanunlar susanda insanları nə idarə edir? – Cəmiyyətin görünməyən dayaqları
• Alman romantizminin vizual manifesti - "Duman dənizi üzərində səyyah"
• İlyas Əfəndiyevin xatirəsi Bakı teatrlarının səhnələrində yad ediləcək