Vyanada Azərbaycan Mədəniyyət Mərkəzində görkəmli fırça ustası Səttar Bəhlulzadənin 110 illik yubileyi münasibətilə onun əsərlərindən ibarət sərginin açılışı olub.

Azərbaycan Mədəniyyət Mərkəzinin direktoru Leyla Qasımova çıxış edərək görkəmli rəssamın həyat və yaradıcılığı haqqında məlumat verib. Qeyd edilib ki, Səttar Bəhlulzadə fenomeni olmadan 20-ci əsr Azərbaycan rəngkarlığını təsəvvür etmək mümkün deyil. Zəngin rəng çalarlarına malik əsərləri ilə S. Bəhlulzadə dünyaca məşhur impressionistlərlə bir cərgədə dayanır və Azərbaycanda impressionizm cərəyanının mübağiləsiz ən güclü nümayəndəsi hesab olunur.

Bildirilib ki, daim vətəni ilə bağlı olan rəssam öz əsərlərində Azərbaycanın tarixini, təbiətini və füsunkar mənzərələrini canlandırıb. İkinci dünya müharibəsindən sonra yaradıcılığının inkişaf mərhələsinə qədəm qoyan S. Bəhlulzadənin diqqət mərkəzində tarixi mövzular, Azərbaycan təbiətinin inciləri, xüsusilə Abşeron yarımadası, Bakı kəndləri, neft buruqları və peyzajları dayanırdı. Mənzərə-peyzaj və natürmort janrlarına getdikcə daha çox maraq göstərən rəssam Azərbaycanın füsunkar təbiətini incə xalça naxışlarının düzülüşünə bənzər motivlərlə kətana köçürüb.

Sonra Səttar Bəhlulzadənin həyat və yaradıcılığına həsr olunmuş sənədli film nümayiş olunub. Alman dilində səsləndirilən filmdə rəssamın yaradıcılığına nəzər salınıb, onun müasirləri olmuş görkəmli şəxsiyyətlərin (Toğrul Nərimanbəyov, Arif Məlikov, Tahir Salahov, Ömər Eldarov) fikirləri yer alıb. S. Bəhlulzadənin əks olunduğu orijinal kadrlar tamaşaçılar tərəfindən maraqla qarşılanıb.

Sərgi gələn il yanvarın 14-dək incəsənətsevərlər üçün açıq qalacaq. /azertag.az/

• Məşhur yapon xoreoqraf Bakıda ustad dərsləri keçdi
• "Bilmirdi bu ölkənin nəyini və necə sevsin..." - Çeslav Miloşun "İssa vadisi" romanından bir hissə
• Londondakı qalereyadan Çörçillə aid qalmaqallı videoinstalyasiya yığışdırıldı