Milli Məcilisdə musiqiçilərin vergi məsələsi müzakirə olunduğu zaman millət vəkili Qüdrət Həsənquliyev müğənniləri baha qiymətə toylara gedib dövlətə az vergi ödəməkdə ittiham edib.

Kulis.az bu məsələ ilə bağlı tez-tez el şənliklərində iştirak edən sənətçilərin fikirlərini öyrənib.

Xalq artisti Səməd Səmədov deyir ki, artıq 40 ildir vaxtlı-vaxtında dövlətə vergi ödəyir:

“Mən hesab edirəm ki, dövlətlə müğənni arasında münasibətlər yaxşı olmalıdır. Yəqin siz də bilirsiniz ki, bu saat bütün şadlıq saraylarında kameralar quraşdırılıb. Müğənnilərin toylarının sayını gizlətməsi mümükün deyil. Əgər müğənni ayda bir neçə yerdə toy oxuyubsa, ona uyun da vergi ödəməlidir. 74 yaşım var, yenə də hara getsəm vergimi vaxtında ödəyirəm. Vergi ödəmək lazımdır, çünki bizim verdiyimiz vergilər şəhərin abadılaşdırılmasına, kimsəsiz uşaqlar evinə sərf olunur”.

Xalq artisti Gülyanaq Məmmədova toydan əldə etdiyi gəlirin onun məişət qayğılarına, gündəlik xərclərinə yetmədiyini deyir:

“Mən 4 uşaq anasıyam, əziyyət çəkirəm, əziyyətlə, zülümlə özümü birtəhər dolandırıram. Açığını deyim ki, qazancım mənə çatmır. Mən məcburiyyət qarşısında qalıb toylara üz tutmuşam. Toydan gələn gəlirin böyük bir hissəsini onsuz da sənətimə həsr edirəm. Mahnı alıram, mahnı yazdırıram, səhnə geyimlərimə xərcləyirəm. Ansambl saxlayıram. Mən görün, neçə evə çörək pulu verirəm. Bu mənim şəxsi yüklərimdi deyə heç vaxt xalqla bölüşmürəm. Nə olsun ki, müğənniyik, hamı kimi bizim də problemlərimiz var. Mən vergimi vaxtında ödəmişəm. Mənim yeganə dolanışıq yerim toylardır. Qazancımın yarısından vergi ödəmək mənə sərf etmir”.

Müğənni Emma Ələkbərzadə hesab edir ki, millət vəkili söylədiyi fikirdə ədalətli deyil:

“Həmin millət vəkilinə mənim adımdan deyin ki, 10 ildə bir dəfə toya gedən müğənnilərin vergi verməsinə ehtiyac yoxdur. Bunu müzakirə etməkdənsə, getsin, biz müğənnilər qədər kasıb-kusuba əl tutsun”.

Əməkdar artist Elza Seyidcahan hesab edir ki, müğənnilər dövlətə vergi borcunu mənəvi olaraq ödəyir:

“Əvvəla onu qeyd edim ki, vergi ödənilməsi vacibdir. Amma mənim düşüncəmə görə müğənnilər dövlətə vergini maddiyyatdan çox mənəvi olaraq artıqlaması ilə ödəyirlər. Bütün dövlət tədbirlərində canla-başla iştirak edirik”.

• Estrada ilə yanaşı elmi də "ağladan" müğənnilərimiz
• Fələstinli müğənni Amerika turunu təxirə saldı - Səbəb
• “Emmi”də “Ən yaxşı aktrisa” bəlli oldu