Tanınmış şair Şəhriyar Del Gerani bu yaxınlarda məsciddə kitab təqdimatı keçirməsi birmənalı qarşılanmayıb. Bu təqdimat sosial şəbəklərdə müzakirələrə səbəb olub, bəziləri bu aksiyanı tənqid edib, bəziləri isə təqdir.

Bəs görəsən, ateist dünya görüşündə olanlar necə düşünür? Məsciddə kitab təqdimatı keçirmək olarmı, yoxsa məscidin öz yerimi var?

Vüsal Məmmədov:

Jurnalist

- Məncə, məscidin maraqları baxımından bu, çox uğurlu addımdır. Kitabın baxımından isə o qədər də əmin deyiləm. Yəni bu, məscidin imicinə böyük bir qazancdır. Geniş mənada Kitab isə məsciddə təqdimatdan heç nə qazanmasa da, ən azından, heç nə də itirmir. Dar mənada Şəhriyarın kitabına gəlincə, uğurlu PR-gedişi idi. Həm kitab, həm də Şəhriyarın özü üçün. Əslində bu addımı atamda Şəhriyar geniş anlamda nə Məscidi, nə də Kitabı fikirləşib; özünü düşünüb və göstərmək istəyib ki, qeyri-standart həllər tapmağa qadir insandır. Göstərməyi bacarıb da. Qeyri-standart, orijinal həllər hər zaman maraqlıdır, gözəldir.”

Aqşin Yenisey:

Şair

- Azərbaycan ədəbiyyatı Şəhriyar Del Geranini məscidə nəzir verdi. Mənə ancaq “Allah qəbul eləsin” demək qalır.

Yalçın İslamzadə:

Fizik

- Belə hadisələrə münasibət bildirmək istəməzdim.

Qabil Abbasoğlu

Jurnalist

- Kitab - insan üçündür. Məscid də insanların toplaşdığı obyektdir. Həm də, kitab oxuyan insanların. Bu halda söhbətə hansısa mistik-sakral don geyindirib, məsciddə kitab təqdimatı olmaz deyənləri anlamaq çətindir. Şəxsən mən bilirəm ki, Şəhriyar məhz məsciddə imza günü keçirməyə hansı hisslərlə, həyəcanla hazırlaşırdı. Şəhriyarın yaradıcılığında da iman və əqidənin aydın nümunələri var. Belə bir səmimi istəyin və bu istəyə icma tərəfindən verilmiş kifayət qədər təqdirəlayiq saydığım müsbət cavabın indi spekulyasiya mövzusuna çevrilməsini doğru saymıram. Məscidə toplaşan insanlar da, bildiyim qədər, kitab əhlidir, oxumağın tərəfindədirlər. Oxumaqdan kimsəyə zərər gəlməz, ədəbiyyatdan isə heç gəlməz.

İşin hüquqi tərəfinə gəldikdə, məscid Azərbaycan dövlətinin qanunlarının işlədiyi bir məkandır. O icmanın rəhbərliyi də qanunlar çərçivəsində uyğun bildiyi addımları atmağa səlahiyyətlidir. Biz sekulyar dövlətdə yaşayırıq. Dünyəvi qanunlarla hərəkət edirik və şəxsən mən bunu böyük nailiyyət sayıram. Heç bir məscid, Azərbaycandan başqa heç bir dövlətin nə hüquqi, nə siyasi, nə mənəvi ərazisi deyil. Ona görə də belə məsələlərdə diqqətli və intizamlı olmaq lazımdır.

Xalid Kazımlı:

Yazıçı-publisist

- Məsciddə çox şey olar - mətbuat konfransı da, toplantı da, normal ziyafət də, mərasim də, idman yarışı da. O cümlədən kitab prezentasiyası da. Mən 2010-cu ildə ABŞ-ın Cənubi Karolina ştatının paytaxtı Kolombia şəhərinin kilsələrindən birində bütün bu işlər üçün yaradılmış şəraiti görmüşəm. Kilsənin elə bir basketbol meydançası vardı ki, beynəlxalq yarışlar belə keçirmək olardı. Kilsə ayrıca restoran zalına, brifinq salonuna, toplantı zallarına malik idi. Orada dini ayinlərlə yanaşı, dünyəvi tədbirlər də keçirilirdi. Bunlar bir-birinə mane olmur. Məscidi dünyadan, cəmiyyətdən təcrid etmək, nəsə sirr-xafiyə dolu yerə çevirmək, yalnız ölü yumağa, hüzr mərasimi keçiriməyə yarayan məkana döndərmək düzgün deyil.

• "Sənət dialoqu” layihəsi çərçivəsində növbəti görüş
• "İnsan öz səhvlərinin məhsuludur..." - Tanınmış italyan romançıdan aforizmlər
• “İpək Yolları Gənclərin Gözü ilə” beynəlxalq foto müsabiqəsinə başlanıldı