Bakı Sirki yeni proqram təqdim edir

Kino

Ana səhifə
Kino

Bakı Sirki yeni proqram təqdim edir - EKSKLÜZİV

3 oktyabr 2012

11:19

Bakı Dövlət Sirkində yeni proqramın məşqlərinə başlanıb. Sirkin mətbuat katibi Mahir Hümbətovun Kulis.az-a verdiyi məlumata görə, yeni sirk proqramı Rusiyadan dəvət olunub: “Rusiya sirkindən xüsusi yığılmış proqram “Payız əyləncəsi ” adlanır. Əhilləşdirilmiş müxtəlif heyvanların rəngarəng çıxışları var proqramda. Rusiyanın əməkdar artisti Aleksandr İvanov öz ayılarının “Dəniz əyləncəsi” oyunu ilə proqramın tərkibində qonağımız olacaq. Ayılar matros geyimində kəndirbazlıq edəcəklər. Digər başqa maraqlı nömrələri də var. Bu barədə məlumat vermək istəmirəm, qoy, uşaqlar üçün sürpriz olsun”.

Mahir Hümbətovun dediyinə görə, Rusiyanın daha bir əməkdar artisti Ayrad Vildanov meymunlarla “Hind nağılı”nı da yeni sirk proqramı çərçivəsində təqdim edəcək.

Proqram ümumilikdə iki saat yarımdır. Hava gimnastları, şən klounlar, janqlyorlar və digər nömrələr də proqrama daxil olunub. Tamaşalar oktyabrın 25-dən start götürür və gün ərzində bir, iki, üç seans olacaq.

Məktəblilərin tətil günlərində seansların daha çox olması nəzərdə tutulub.
Biletlərin qiyməti isə dəyişməyib. Sırasından asılı olaraq 4 manatdan 10 manata qədərdir.

Ramilə QURBANLI