news-inner
clock18:40 calendar-gray 22 İyul 2019 view-gray537 dəfə oxunub
view-gray537 dəfə oxunub

Sinəmdə dərd gəzindi – Elromanın şeirləri

Kulis.az gənc yazar Elroman Əlizadənin şeirlərini təqdim edir.

İki tanrı

Göylərdə yaşayan qız, baxdım ki, göylərdəsən,

sənə qanad gətirdim.

Salamat qal demişdim, sən salamat qal deyə,

mən salavat gətirdim.

Sən məni tərk eylədin, mən də səni unutdum,

indi harda günahdı?

Unudardım, heyif ki, unutmaq intihardı,

intihar da günahdı.

Evinizin önündə həsrət çəkən ürəyə

dağlamaq öyrətmişəm.

Adını çəkə-çəkə küçənizin itinə

ağlamaq öyrətmişəm.

İti də bezdirmişəm, artıq o da öyrəşib

dərdini mənlə bölür.

O qədər bezdirmişəm, məni görəndə hürür,

səni görəndə gülür.

Od olmayan yerlərdən tüstü çıxmır, əzizim,

bu da sənin tüstündü.

İki tanrım var mənim, biri səndən üstündü,

biri sənin büstündü.

Göylərdə yaşayan qız

Gecənin bir saatı mənə pənah gətirsən,

Deyərəm, ya xəyaldır, ya zarafat edirsən.

Qulağıma pıçılda, inandır ki, gedirsən

Mənə darıxmaq öyrət, için-için darıxım,

Mən də sən olmayanda sənin üçün darıxım.

Ay gözümün işığı, gözlərimin qarası,

Sən istə, sənin olsun ürəyimin parası.

Qayıdasan, gələsən gecənin bir yarısı,

O gün mənimlə birgə sənsizliyə güləsən.

Gülməyi mən öyrətdim, mənsiz niyə güləsən?

Göz yaşımı ovcuna tökə-tökə ağlayıb,

Nəfəsimi içimə çəkə-çəkə ağlayıb,

Ağlamaq qürurdusa, yekə-yekə ağlayıb

Gözlərimin yaşını qurutmağa utanım.

Səni elə sevim ki, unutmağa utanım.

Göylərdə yaşayan qız, orda varmı şər səsi?

Yaman ağır olurmuş həsrətinin zərbəsi.

Əriyəsən, axasan, cisminin hər zərrəsi,

Göylərdən yanağıma damcı-damcı ələnə...

Şairlər dua bilmir sevdiyini dilənə.

Tanrının gözü

Gecə-gündüz demədən gözlədim ki, gələsən,

gəlməmisən hələ sən.

Tələyə düşmək arzum, çünki mənə tələsən,

mənəm sənə tələsən.

Ümidimə qar yağa, qardan həyat düzəldim,

dizi keçincə qayıt.

Sol qolumu dişləyib sənə saat düzəldim,

izi keçincə qayıt.

Bu ki məndə vərdişdi, and ola yerə-göyə,

Əsəbimdən içirəm.

Düz yolumu dəyişdim, körpümü yıxdın deyə

Səhvlərindən keçirəm.

Belə heç kəs ağlamaz, səmadakı buludlar

Tanrının gözü imiş.

Canı alan Tanrıdı, belə çıxır, baxışın

Tanrının özü imiş.

Arzu

Sinəmdə dərd gəzindi, gücün çatır, gəz indi,

yaşamaqdan bezirəm.

Həyatdı da, əzizim, dünən sənlə gəzirdim,

bu gün səni gəzirəm.

Heyif, qalmadı vaxtım, sən ki məni tərk edib

arzulara qaçırsan.

Getdin, ardınca baxdım, deyə də bilmədim ki,

Arzu, hara qaçırsan?

Pozulmadı yar andı, xırda səhvlərimizdən

böyük sevgi yarandı.

Dedilər, bir arzu tut, bilmədilər bu qəlbə

başqa Arzu haramdı.

Kim deyir ki, tabutu sevgililər daşımır?

çiynimdə aparmışam.

O gün tabut boş idi, səni geyib əynimə

əynimdə aparmışam.

Pəncərədən daş gəlir

Günü-günə satdığım, unutduğum səs niyə

İndi mənə xoş gəlir?

Gedəndə qapıdan çıx, sonra qoy deməsinlər

Pəncərədən daş gəlir.

Ay bəri bax, bəri bax... Mən tərəfdə od yanır

Kül olmağa hazıram.

Tanrının iki əllə yaratdığı qadını

Mən tək əllə yazıram.

Duanın nə faydası, sən gedəli gözlərim

Unutmur səni, əfsus.

Yar yaratmaq Tanrıya, yarı atmaq insana,

Yaşatmaq sənə məxsus.

Gün doğanda gələn qız, gün batanda gedərsən,

Gecələr inciməsin.

Gecəni payızda say, sayanda elə say ki,

Cücələr inciməsin.

Sənsizliyə riayət et

Qop arada hay-küyündən

Səssizliyə ziyarət et.

Buralarda bir qayda var

Sənsizliyə riayət et.

Qınamıram səni gözəl,

Yoxluğun da varı olur.

Dağ ürəkli şairlərin

Daş ürəkli yarı olur.

Bu qədərmi qansızsan ki,

Hər işinə ayıb ola.

Gəlişinə şeir yazsam,

Gedişinə ayıb olar.

Nə olaydı, əvvəlkitək

Baxıb mənə gözün gülə.

Aç gözünün qapısını

Qonaq olum gözüngilə.

Çox düşündüm, anlamadım

Ayrılığın əksi nədi?

Biz tərəfdə sevən qalır

Siz tərəfdə əksinədi.

Qəribədir yaşanılan

Xatirənin silinməsi.

Küçələrə su səpmişəm -

Ağladığım bilinməsin.

Bağışla

Artıq eşqin istisi də

Soyuqları sovuşdurmur.

Canla-başla sevənləri

Bir "bağışla" qovuşdurmur.

Hər siqaret yandıranda

Tüstü qaçır sən tərəfə.

Gedişinlə şərəf verdin

Mən də içdim sən şərəfə.

Sən olmasan mən olmazdım,

Məndə səni yaratmısan.

Tanrı səni yaratmışdı,

Sən də məni yaratmısan.

Günahkaram, damarımdan

Qan içənə qansız dedim.

Can alana canan deyib

Can verənə cansız dedim.

Sən də gecə ulduzlara

Mən barədə danışdınmı?

Tanrı kimi davranırsan -

O da məni danışdırmır.

Qadınsan

Ax o yeniyetməlik! Ax həminki boş küçə!

İzləyərək kölgəni evinizə gizlicə

Ötürdüyüm qadınsan.

Səhvlərinlə saflaşan o mükəmməl sirlərə,

Arada bir ağlayıb gözlərimdən yerlərə

Tüpürdüyüm qadınsan.

Yaraşmadı sevgimiz sevgililər gününə.

Hər qədəhin dibində gözlərimin önünə

Gətirdiyim qadınsan.

Heç yaxın da qoymadın közümü ocağına.

Dara düşən zamanlar özümü qucağına

Yetirdiyim qadınsan.

Neçə illərdən sonra rast gələrək izinə

Kitabın arasından çiçəyin əvəzinə

Götürdüyüm qadınsan.

Sən ki gözəlləşirdin gözlərimin önündə.

Özüm də hiss etmədən günlərin bir günündə

İtirdiyim qadınsan...

Gedənlərin tanrısı

Həsrətin buxarlanıb kirpiyimin üstündə

dayanan yaşa dönsün.

Dedin səni unudub ta ən başa dönmüşəm,

inanan daşa dönsün.

Mənə bir az döz dedin, o gündən zamanımı

zamanına qatmışam.

Əllərini üz dedin, baxdım ki, üzə-üzə

limanına çatmışam.

Gözlərimə qan sızır, keçən zaman aşiqin

indisinə dönürmüş.

Gedənlərin tanrısı sən demə, qalanların

iblisinə dönürmüş.

Varlığına möhtacam, yoxluğun ürəyimdə

səs eləmir, əzizim.

Kaş solaxay olaydım, səni tək əllə yazmaq

bəs eləmir, əzizim.

news-inner-user

13542 məqalə

Paylaş

Oxşar xəbərlər

Xəbər lenti