İyulun 19-da Sumqayıt Dövlət Dram Teatrı 50-ci mövsümün son tamaşasını tamaşaçılara təqdim edib.

APA-nın yerli bürosunun məlumatına görə, teatrın kollektivi tanınmış dramaturq Əli Əmirlinin Sumqayıtın 70 illik yubileyinə həsr etdiyi “Sevgilim Sumqayıt” lirik-psixoloji dramını hazırlayaraq tamaşaçıların ixtiyarına verib.

Teatrın direktoru, Əməkdar artist Mübariz Həmidov Prezidentin imzaladığı mədəniyyətə, ədəbiyyata, incəsənətə yüksək diqqətin təzahürü olan sərəncamları dilə gətirərək teatr kollektivi adından minnətdarlığını bildirib. Görülən işləri, yaradıcılıq imkanlarının artmasını kollektivdə ruh yüksəkliyin dinamikasına rəvac verən əsas amil hesab edən M. Həmidov yubiley mövsümündə Sumqayıt teatrındakı canlanmanın növbəti teatr mövsümündə də davamlı olacağını əminlik ifadə edib.

Daha sonra teatrın baş rejissoru, Xalq artisti Firudin Məhərrəmov müxtəlif janrlı tamaşaların ərsəyə gəlməsilə yanaşı teatrın təbliğat yönümlü ideyalar irəli sürərək tamaşaçı axınının güclənməsinə nail olduğunu qeyd edib. O, cari mövsümdə repertuara daxil edilən “Tıq-tıq xanım”, “Danışan gəlincik”, “Dəfn edilməmiş ölülər”, “Mamoy kişinin yuxuları”, “Sevgilim Sumqayıt” kimi uğurlu tamaşaların rəğbət görməsi həyata keçirilən PR kompaniyalar ilə də bağlı olduğunu vurğulayıb.

Daha sonra “Sevgilim Sumqayıt” tamaşası teatrsevərlərə təqdim edilib. Tamaşada teatrın aparıcı aktyorları - Əməkdar artistlər Fəranə Musayeva, Növrəstə Həşimova, Sədaqət Nuriyeva, İlahə Səfərova, Cəlal Məmmədov, Xatirə Süleymanova, aktyorlar Kamran Muradlı, Şəmistan Süleymanlı, Şəhla Məmmədova, İlahə Səfərova, Rövşən Əsgərov, Elay Xasıyev, Yeganə Məmmədvəliyeva, Vəfa Qurbanova, Şəms Abdullayeva və Gülnarə Qədirova çıxış edib. Tamaşanın quruluşçu rəssamı teatrın baş rəssamı Elşən Sərxanoğludur.

• "Sevgililərinizin neçə nəfər olmasının nə əhəmiyyəti var, əgər..." - Jak Lakan
• Əfsanəvi qrup haqqında serial çəkilir
• Britaniya 71 milyonluq Rembrandt tablosunun ölkədən çıxarılmasına qadağa qoydu