İlqar Fəhminin “Kubinka” pyesi əsasında tamaşa hazırlanır.

İsveçdə yaşayan azərbaycanlı rejissor Əlif Cahangir bildirib ki, tamaşanın məşqləri virtual aparılır: “Mən İsveçə köçənədək iki məşqimiz baş tutmuşdu. Aktyorların tamaşaya olan həvəsi, xüsusilə, məşqlərimə olan diqqəti məni çox sevindirdi. Ona görə layihəni yarıda qoymaq günah olardı. Yaranmış əngəllər həmişə alternativlərə yol açır. İdeya olaraq biz də bu əngəli virtual olaraq aşmağı düşündük. Bu dəqiqə dünyada demək olar ki, münasibətlərin, əlaqələrin 60 faizi virtual qurulur. Belə olan halda müasir texnologiyanın bizə yaratdığı imkandan nədən istifadə etməyək dedik. Beləliklə, məşqlərimizə video görüntü ilə zəng edərək davam etdik. Heyətimizin əksəriyyətini gənclər təşkil edir. Tamaşa demək olar ki, hazırdır. Son tamamlama işləri aparılır. Tamaşanın maddi tərəflərini biz komanda olaraq özümüz qarşılıyırıq. Tamaşanın hazırlanmasında bizə yaxından dəstək olan əməkdar artist Cabir İmanova xüsusi təşəkkür edirəm. Bir təşəkkürümü də YUĞ teatrının rejissoru Mirsahib Ağazadəyə bildirirəm. O da dost kimi dəstəyini məndən əsirgəmir. Tamaşanın dekorasiyasını demək olar ki, bizim üçün pulsuz təşkil etdi. Orda olmadığım üçün çox şeyə o nəzarət edir. Tamaşada sürpriz odur ki, 30 ildən artıqdır ki, səhnədə olmayan istedadlı və çox maraqlı aktyorumuz səhnəyə çıxacaq. Adını açıqlamıram. Ola bilsin ki, ilk baxışdan da görənlər tanımasın. Sonradan biləndə ki, kimdir “A o oğlan, bu kişi imiş?!” deyəcəklər. Tamaşanın ilk baxışını iyun ayının 20-nə planlaşdırmışıq. Böyük premyera isə sentyabr ayına təsadüf edəcək”.

Tragikomediya janrında yazılmış pyesdə hadisələr Bakının Kubinka məhəlləsində baş verir. Kubinkada doğulmuş lakin 18 il Batumidə yaşayandan sonra öz doğma məhəlləsinə qayıdan Məryəmin gəlişi ilə hadisələr bir-birinə qarışır.

Rejissor, əsəri şərh edərək söyləyib ki, köhnəlik və yeniliyin mübarizəsi üzərinə qurulmuş tamaşada sonda yenilik, köhnəlik üzərində qələbə qazanaraq, öz məğlubiyyətinə zəmin yaradır.

Tamaşada rolları Məhəmməd Verdizadə, Elşən Əsgərov, Zəhra Bədəlbəyli, Tunar Əlizadə, Şəhanə Yusufova, Mikayıl Bəylərli, İlqar Hüseynzadə, Muşfiq Cəfərli, Beyrək Rüstəmzadə, Mehin Orucova, Nadir Rüstəmli, Əkbər İzzətov və Mübariz Ağayev canlandıracaq. /teatro.az/

• "Ölkədə elə alimlər var, görsəniz, gülərsiniz" - Nofəl Şahlaroğlu ilə müsahibə
• Mədəniyyət Nazirliyinin Media və kommunikasiya şöbəsi ləğv edildi
• Yazıçı İlham Əzizin "Qəvvas" romanının təqdimatı keçirildi