Kişineu şəhərində Xajdeu adına kitabxanada XXIII beynəlxalq kitab salonu çərçivəsində Azərbaycanın Moldovadakı səfirliyinin dəstəyi ilə tanınmış yazıçı, akademik Kamal Abdullanın “Sehrbazların dərəsi” romanının (“Cămpia Vrăjitorilor”) təqdimatı keçirilib. Kitab rumin dilinə “Al və Kuza” Yas Universitetinin dosenti Lyudmila Bejenaru və onun tələbəsi İrina Milea tərəfindən tərcümə edilib.

Azərbaycanın Moldovadakı səfirliyindən bildiriblər ki, tədbirdə səfirlik əməkdaşları ilə yanaşı, yerli ziyalılar, “Al və Kuza” Yas Universitetinin müəllim və tələbələri iştirak edib. İştirakçılara Kamal Abdullanın həyat və yaradıcılığı, həmçinin roman barədə geniş məlumat verilib.

Qeyd edilib ki, 2006-cı ildə nəşr olunan, Mistik əhvalatların baş verdiyi, paralel dünyalar arasındakı ahəngdən, atası Cəlladbaşını axtaran Karvanbaşının taleyin hökmü ilə Sehrbazlar dərəsinə gəlib çıxmasından, burada ömür edən Ağ dərvişin və hər iki dünyada yaşayan Səyyah sehrbazın çağırdığı ruhla Karvanbaşının sonu faciə ilə bitən sirli görüşündən, Sufi dərvişlərin həyatından bəhs edən mistik roman müxtəlif dillərdə və müxtəlif ölkələrdə çap edilməklə dünya oxucusunun da diqqətini çəkmişdir. Vurğulanıb ki, yazıçı Kamal Abdullanın oxucunun diqqətinə müxtəlif dillərdə təqdim edilən “Sehrbazlar dərəsi” romanı orta əsrlərdə və sonrakı dövrdə islam mədəniyyətinin mühüm komponentlərindən biri olan sufiliyin təsiri altında yaranmış təxəyyülün məhsuludur.

Onu da qeyd edək ki, xanım L.Bejenaru son 7-8 il ərzində öz elmi və mədəni maraqlarını Azərbaycanla bağlayıb. 2013-2014-cü illərdə Azərbaycan Slavyan Universitetində Yanus layihəsində 10 ay iştirakçı olub, K.Abdullanın yaradıcılığı barədə kitab yazıb. O, Bakıda konfranslarda iştirak edib və artıq 2 ildir ki, “Al və Kuza” Yas Universitetində Azərbaycan multikultiralizmi üzrə kurs aparır.

• "Sevərik bir-birimizi dodaqlarımızla..." - Fransız şairdən sevgi şeirləri
• Elmi-kütləvi serial “Netflix”də yayımlanacaq
• 44 bədii filminin "Biz bir ailəyik" adlı yeni tizeri yayımlandı