Yazıçı, millət vəkili Aqil Abbas da “Mirzə Cəlil” polemikasına qoşuldu. Kulis.az Aqil müəllimin fikirlərini təqdim edir.

“Həmid Herisçi çox savadlı adamdır. Onun gündəmə gəlmək istəyi təəccüb doğurur. Mən onun özünə də, istedadına da bələdəm. Niyə belə şeylər deyir? Hər gün televiziyadadır. Axı Həmidin gündəmə gəlmək kimi dərdi olmamalıdır.

Mirzə Cəlilin plagiat olmağına gəldikdə isə... O, təmiz orijinaldır. M.Cəlilin felyetonlarının Rusiyaya nə dəxli var ki? Ruslarda “Danabaş kəndi” var? “Ölülər”lə “Müfəttiş”i qarşı-qarşıya qoyur. Halbuki bu iki əsər başqa-başqa şeylərdi. Dünyada da yazıçıların bir-birindən təsirlənmələri olur, bu normaldır. Hər kəsdə təsirlənmə tapmaq olar. Ancaq Mirzə Cəlil təmiz orijinaldır, plagiat deyil.

Mirzə Cəlil reallığı yazıb. XX əsri gözünün qabağına gətirin. Din, xurafat, savadsızlıq. O vaxt da, indi də Xudayar bəylər, şeyxnəsrullahlar olub və var. Mirzə Cəlil bütün xalqın bu gündə olduğunu demirdi ki. O adamları misal çəkib deyirdi ki, belə olmayın, maariflənin. Maarifçi bir hərəkat başlatmışdı. Nə etməli idi? Güldən-çiçəkdən yazmalıydı? Yazmalıydı ki, hər kəs gözəldi? Axı Mirzə Cəlildən daha kəskin Üzeyir bəy, Haqverdiyev, Ömər Faiq Nemanzadə yazmışdı. Onlar maarifçilər idi və xalqın inkişafını istəyirdilər. Deyirdilər, xalq, özünə gəl, elm öyrən. Biz indi nə edək? Sabiri güllələyək?

Şəhriyar Del Gerani də hörmət etdiyim şairdi, gözəl şeirləri var. Getsin şeirini yazsın. Onun nə işi qalıb “Poçt qutusu”nda? Şəhriyarın özü “Poçt qutusu”du da. Getsin, kitab oxusun, elm öyrənsin. Puşkinin akademik nəşrlərini oxusun. Mirzə Cəlili redaktə etmək olar? Bu nə düşüncədi? Akademik nəşrlər redaktə olunmur. Bu cür fikirlərdənsə, şeirini yazsa daha yaxşı olar. İstedadlı oğlandır.”

Əlaqəli yazılar:

Mirzə Cəlilin hekayələri redaktə olunmalıdır

Mirzə Cəlildən can qurtarmağın yolu

Səfər Alışarlı: “Mirzə Cəlilə hücumun səbəbi aydın deyil”

• Amerikalı ər - Cəlal Ale-Əhmədin hekayəsi
• Dolub gözlərimə ovunur torpaq - Günün şeiri
• Dostoyevskinin "Cinlər"i hərraca çıxarıldı