Ötən şənbə Akademik Milli Dram Teatrının Abbas Mirzə Şərifzadə səhnəsində ASAN Xidmət könüllülərinin iştirakı ilə yazıçı Natiq Məmmədlinin Azərbaycan Xalq Cümhuriyyətinin 100 illiyinə həsr olunmuş “Əmanət” pyesinin premyerası keçirilib.

Kulis.azın verdiyi xəbərə görə, rejissor Anar Babalının quruluş verdiyi tamaşada bütün rolları ASAN Könüllüləri Gənclər Təşkilatının gənc üzvləri oynayıblar.

Cümhuriyyətimizin 100 illiyinə ithaf olunmuş “Əmanət” iki hissəli dramı Azərbaycan maarifçilərinin klassik irsinə və çoxsaylı tarixi faktlara, arxiv sənədlərinə istinad olunmaqla yazılıb.

Əsərdə bədii ümumiləşdirmə və simvolizmdən istifadə edilməklə Cümhuriyyətə gedən yol, Azərbaycanın müstəqilliyi ideyasının meydana gəlməsi, Cümhuriyyətin dövlət quruculuğu prosesi və onun süqutunu şərtləndirən amillər bədii təhlil obyektinə çevrilərək, kəskin dramatik konflikt fonunda təqdim olunub.

Pyesdə baş rolda yer alan Mirzə obrazı Azərbaycanın maarifçi ziyalılarının, habelə Cümhuriyyət qurucularının prototipi kimi çıxış edir. Ona qarşı dayanan Sərçə, Qartal, general Tomson və digərləri isə Azərbaycanın istiqlalını istəməyən qüvvələrin ümumiləşmiş tipləridir.

Mirzə vacib əmanəti çatdırmaq üçün fədai axtarışındadır, kütlə onun ideyasını düzgün qavramağa çətinlik çəkir, digər obrazlarsa bu axtarışda ona mane olmaq, əmanətin nə olduğunu, fədainin kimliyini müəyyənləşdirmək üçün mübarizə aparırlar. Mirzənin ideyalarının ardıcıl müdafiəçisi olan darülfun tələbəsi (Bakı Dövlət Universitetinin tələbəsi) sonda Cümhuriyyətə xəyanətə hazırlaşan qüvvələri ifşa edərkən həlak olur. Finalda Mirzənin “Yaşasın Cümhuriyyət” deyərək qətlə edilməsi belə onun daşıdığı əmanətin ünvanına çatmasını əngəlləyə bilmir. Final uvertüra musiqisi fonunda əmanətin - Azərbaycanın dövlət bayrağının fədai (Mirzənin şagirdi) tərəfindən dirəyə sancılması və xalqın onu qorumasını əks etdirən səhnəylə başa çatır.

ASAN Könüllüləri Gənclər Təşkilatının iştirakı ilə oynanılan pyes tamaşaçılar tərəfindən maraqla qarşılanıb.

• "Mənim yaşımda sevgidən ölən olmayıb hələ..." - Camal sözün başına nə oyunlar qaldı açmamış?!
• Nizami Kino Mərkəzinin divarlarına çəkilən cızma-qaraların məqsədi nə idi?
• "Gərək müəllif Zərrinin çiyninə dünyanın bütün dərdlərini yükləməyəydi" - Hekayə müzakirəsi