II DokuBaku Beynəlxalq Sənədli Film Festivalı (BSFF) dünyanın müxtəlif ölkələrindən olan və həmçinin yerli rejissorlar üçün film qəbulunu açıq elan edir.

Kulis.az-ın verdiyi xəbərə görə, 4-9 oktyabr tarıxlərində Bakıda baş tutacaq II DokuBaku festivalının bu ilki mövzusu "Kəsişmələr"-dir və mövzu çərçivəsində seçilmiş filmlər müxtəlif sosial və mədəni məsələlərə yeni yanaşmalar axtaracaq.

Festival 2 bölmədən, tammetrajlı və qısametrajlı filmlər bölməsindən ibarətdir.

Dünyanın müxtəlif ölkələrindən dəvət olunacaq filmlər Bakının mərkəzində müxtəlif məkanlarda nümayiş olunacaq. Yerli və əcnəbi tamaşaçılar filmlərin müəllifləri ilə canlı ünsiyyətdə olmaq şansı qazanacaqlar. Nəzərinizə çatdıraq ki, hər film nümayişlərinin ardından, rejissorların və auditoriyanın iştirakı ilə, filmlərin mövzusuna uyğun olaraq müxtəlif sosial məsələlərlə bağlı müzakirələr və debatlar da təşkil olunacaq. Bundan əlavə, festival boyu müxtəlif konsertlər və sərgilər də keçiriləcək.

Azərbaycanlı auditoriyanın sənədli film janrını daha dərindən kəşf etməsi ilə yanaşı, DokuBaku BSFF yeni filmlərin çəkilməsini və nümayişini təşviq edərək, yerli filmmeykerlərə dəstək olmağı qarşısına məqsəd qoyub.

Festivalın büdcəsinin azlığına görə, yalnız qısametrajlı filmlərin qaliblərini növbəti proyektlərini həyata keçirmək üçün mükafatlar gözləyir.

Qeyd edək ki, "Dəhliz" filminin rejissoru İqrar Qurban, keçən ilki qısametrajlı filmlər müsabiqəsinin qalibi olmuş həmyerlimiz, Berlinale Beynəlxalq Film Festivalının iştirakçısı olub.

• "Kim tənqid edir, özü bilər" - Alim Qasımov Üzeyir Mehdizadə ilə duetindən danışdı
• Səhnəmizin unudulmaz Vəfası - Anası Hökumə Qurbanova ona niyə mane olmuşdu?
• Madriddə MAMA “Ana təbiət” beynəlxalq incəsənət sərgisinin açılışı oldu