news-inner
clock13:30 calendar-gray 02 Fevral 2018 view-gray781 dəfə oxunub
view-gray781 dəfə oxunub

Saçlarımın bəyazından əsir gecə küləyi – Esmira Məhiqızının yeni şeirləri

Kulis.az Esmira Məhiqızının yeni şeirlərini təqdim edir.

ağac necə unudursa köhnə yarpaqlarını

eləcə unudulur hamı...

***

necə anlatsam,

nə cür anlatsam,

nə təhər anlatsam, bilmirəm.

dilləmi,

əlləmi,

gözləmi

ya susmaqlamı.

sussam,

əlim susacaq,

dilim susacaq,

gözlərim susacaq...

danışmağa heç nəyim olmayacaq.

aaaaaa...a,

mən nə qədər sus yeriyəm ?

hər yerimdən susuram üzdə,

amma...

içimdə

əlim də bağırır,

dilim də,

gözlərim də...

gözlərimi eşidirsiniz?

***

balıqlar uça bilirdi,

ağaclar qaça bilirdi,

gecələr aça bilirdi,

dünya qəmdən əvvəl idi.

hələ yara yamamırdım,

varı-yoxu unamırdım,

tellərimi sanamırdım,

hələ dəndən əvvəl idi.

külək əsəndən sonraydı,

ağlım kəsəndən sonraydı,

nəsə... o səndən sonraydı,

nəsə məndən əvvəl idi.

***

üşüyəndə...

bilmirsən hansı əllərini qızdırasan,

qaçanda...

bilmirsən hansı ayaqlarla yüyürəsən,

baxanda....

gözlərin aldadır səni,

bilmirsən hansı gözünlə baxırsan

ya...

bəlkə də bu sən deyilsən,

düşünürsən…

sonra da içində o məşum ahhhh:

- bütün yerlərimdə yoxam.

gülmədiyin gülüşlər qonar dodaqlarına,

baxmadığın baxışlar enər gözlərinə.

sən özünü getmədiyin yerlərdə görərsən

hər gecə uyuduğunda.

uyumaq deyərsən də...

amma uyumazsan.

səhəri dirigözlü açarsan.

və...

yenə də

içində olmadığın günlər keçər ömründən...

***

bir də baxırsan ki,

gün də rənginə düşmür,

hava da rənginə düşmür,

sən də öz rənginə düşmürsən.

bilmirsən də...

nəyin rənginə düşürsən,

ya rənginə düşən nə.

bax onda...

hər şeyi rəngsiz düşünürsən.

bir də baxırsan ki,

gözünün quruduğu yerdən,

səsin nəm çəkir.

barmaqlarının ucunda

üşüyən təmaslar

dəm çəkir,

qəm çəkir.

durub qaranlıqların üstünə yüyürürsən

doğman kimi,

sanki qaranlıqlara səni qan çəkir.

və ağ qaraya,

getmək gəlməyə,

danışmaq susmağa,

insan insana bölünür.

bir də baxırsan,

elə gözəlsən ki,

səni heç kim görmür.

***

heç bilirsən səndən sonra nə qədər,

qəm ayları,

kəm ayları başladı?

neçə-neçə,

çeşid-çeşid,

növbənöv

sənsizliyin sən ayları başladı.

sonra belə ürəyimin tellərin

bir-bir qırdı ağrılar,

elə qırdı,

içimdəki qırıqların

sızım-sızım,

cızım-cızım

ninniləri, nanayları başladı.

çətirimin altında yağış yağdı selləmə,

elə yağdı,

belə yağdı,

çilə çəkdi gözlərim.

solğunluqda,

qırğınlıqda

bir ağlağan gülə çəkdi gözlərim.

heç bilmədim necə çəkdi,

niyə çəkdi gözlərim,

ki, sonra da bir ömürün

nəm ayları başladı.

sonra da ki...

hər gün gecə seansında,

divarda - xatirəmin kinoları başladı.

***

heç sən də bilmədin

bu dərd dediyin

ömrünə-gününə

nə sayaq gəlir.

bu qəm üşüməsi

şaxtadan betər,

İlahi, qəmlərdən nə soyuq gəlir.

Qatar yolları da bağlanıb daha,

o kəndə getməyə,

bir su yolu var,

o da ki, anamın gözündən keçir.

Mən gedim, deyəndə,

o su yoluyla

ortası deşilmiş bir qayıq gəlir.

Gecələr deyirəm, xəbəriniz yox,

yuxular gözümə

həp oyaq gəlir.

***

siz də görürsünüzmü o boşluğu...

bəzən adam boyda,

bəzən gəlincik boyda,

bəzən də pul boyda.

ciblərimin ağzı günədi hələ...

əllərim qızına bilmir o gündə.

amma gün boyda boşluq yandırır ciblərimi,

mən boyda boşluq sındırır ümidlərimi.

nədi ki, ümidlərim,

nədi ki?

bir uçuş,

bir qaçış,

bir görüş,

bəlkə də bir gülüşşş... eee...

və hələ varaqlardakı boşluğu demirəm...

bir şeir boşluğu qədər

varaqlar göz ağardır əllərimə.

barmaqlarımın ucundan sivişib gedir

yazmadığım şeirlər.

siz də görürsünüzmü o boşluğu...

kədər nimdaş şalına bürünüb oturub orda.

***

bu yağışda

qaçıb,

qaçıb

bir çətirin altında gizlənirəm.

nə işdisə

mən islanıram

çətir islanmır.

bu soyuqda

qaçıb

qaçıb

uşaqlıqda

gizlənirəm.

mən üşüyürəm,

uşaqlığım gülür.

bu yalnızlıqda

qaçıb

qaçıb

təkliyimdə gizlənirəm.

baxıram ki,

yenə,

yenə,

yenə

hamı orda.

***

əllərimin qürbətindən əsir gecə küləyi...

gözlərimin qürbətinə qərib yağır yağışlar.

bilmirəm ki,

bu yağışda necə keçir təkliyim,

necə keçir səssizliyim,

axı necə keçir ki...

hər tərəfdən ürəyimə gəlib yağır yağışlar.

gəlib dəyir ürəyimdə bir yerlər var oraya...

heç özüm də bilmirəm ki, nə yerlərdi o yerlər,

nə göylərdi o göylər.

amma onu bilirəm ki,

bir yerlərdə unudulub doğmalıq,

o doğmalar indi olub ögeylər.

və nədir ki, tel-tel olur misralar,

sətirlərə dən düşür.

varla-yoxun arasına cızıq çəkir qələm də,

bir cızqıdan iki tale, iki ömür tən düşür.

nə işdi ki, yarpaqların arasından öləziyən işıqlar,

haçan gəlib gözlərimə düşürsə,

o işığın əsməsindən gözlərimə nəm düşür.

bənövşənin bəndinə bax, bəndinə,

gör ey kimin qollarına kim düşür.

saçlarımın bəyazından əsir gecə küləyi...

küləkləyir, küləkləyir gecələr.

addımlarım nəsə yazır asfalta,

addımımı hərf-hərf

höccələyir küçələr.

yaş divara söykənirəm...

divarların filmindən,

dil çıxarıb,

göz süzdürüb,

bir balaca qız düşür.

elə bu vaxt

kimsə çəkir şəklimi,

şəkil yenə boz düşür,

və şəkildə bu qadının yerinə,

iki damla söz düşür.

***

atam qəfildən öldü.

anam çay süzmüşdü

pürrəngi.

əli havada qaldı,

heç çaya çatmadı.

çay buğlanırdı,

atam ölürdü.

gözləri axdı,

armudu stəkandan

sürüşdü, düşdü.

atamın gözləri düşdü harasa.

sonra

atamın üzünə pürrəngi

ipək atdılar.

yanvar ayıydı...

mən bir küncdə,

atam ortalıqda,

atamın çayı stolun üstündəydi.

baxdım ki, atamın çayı üşüyür.

Oxşar xəbərlər

Xəbər lenti

Bəzənib, qurşanıb sеyrə çıxan yar... – Aşıq Ələsgərdən qoşma çələngi
11:00 07 Mart 2021
Məşhur müğənni kitabxanada striptiz klip çəkdi – Video
18:00 06 Mart 2021
Xalq artisti “Ay laçın” mahnısına klip çəkdirdi - Video
17:05 06 Mart 2021
Papaq - Cəfər Cabbarlının hekayəsi
16:32 06 Mart 2021
“Digitalart-lab” layihəsi çərçivəsində ustad dərsi keçirilib
16:10 06 Mart 2021
Oğuruq əşyalar Luvr muzeyinə qaytarıldı
15:02 06 Mart 2021
Qocalar evində yaşayan aktrisa vəfat etdi
13:45 06 Mart 2021
Tez öləcəyini bildiyi üçün evlənməyən aktyorumuz - Maraqlı faktlar
12:30 06 Mart 2021
Berlin Film Festivalının qalibləri açıqlandı
11:13 06 Mart 2021
Xalq rəssamı haqqında tədbir keçirilib
10:12 06 Mart 2021
Kişilərə qarşı terror törədən feministlər – Sevda Sultanova yazır...
09:01 06 Mart 2021
“Baku” jurnalı “Yandeks dzen” platformasında təqdim olunur
18:55 05 Mart 2021
Qadınlar Gününə həsr olunmuş sərgi keçiriləcək
18:01 05 Mart 2021
Qadına görə özünü yandıran məşhur meyxanaçı - Məşədibaba Elçini niyə öldürmüşdü? - Video
17:09 05 Mart 2021
“Oyaq gözəl” tamaşası onlayn nümayiş ediləcək
16:22 05 Mart 2021
Yanlış tanıdığımız Amerika – Cavid Ramazanov yazır
15:30 05 Mart 2021
Qodar kinodan gedir
14:40 05 Mart 2021
Türkiyəli yazıçı vəfat etdi
13:50 05 Mart 2021
Dahi şairin çap olunmamış şeiri tapıldı
13:01 05 Mart 2021
Ona qarşı “vnimatelni” olmadılar - Yaşar Nurinin fəxri ada həsrət qalan atası - Maraqlı faktlar
12:30 05 Mart 2021