Yanvarın 28-də “Azərbaycan” jurnalının 95 yaşı tamam olur.

Jurnalın yeni ildə çapdan çıxmış ilk nömrəsi yubiley yazılarını əhatə edib. Bu nömrədə Azərbaycan Yazıçılar Birliyinin sədri, Xalq Yazıçısı Anarın “Ədəbiyyatımızın güzgüsü”, akademik İsa Həbibbəylinin “Böyük yaradıcılıq məktəbi”, Xalq Şairi Nəriman Həsənzadənin “Yazıçılarımızın taleyində “Azərbaycan”, akademik Nizami Cəfərovun “Milli-ədəbi təfəkkürün “Azərbaycan” miqyası”, Hidayət Orucovun “Yüzə nə qaldı ki?”, Vilayət Quliyevin “Azərbaycan qədər yaşayacaq “Azərbaycan”, Paşa Əlioğlunun “Azərbaycan” - köhnə dost”, Qan Turalının “Nəsillərin jurnalı”, İntiqam Qasımzadənin “...peşman deyiləm” kimi təbrik yazıları dərc olunub.

“Azərbaycan” jurnalının yeni nömrəsinin “Poeziya” rubrikasında Əlizadə Nuri, Narıngül, Xatirə Nurgül və başqalarının şeirləri də yer alıb. Oxuculara “Şairin arxivindən” rubrikasında mərhum şair Anar Həbiboğlunun şeirləri təqdim olunub. Nəsr bölməsində Məmməd Orucun, Azər Abdullanın, Yaşar Bünyadın hekayələri, Mübariz Cəfərlinin “Səmadakı quyu” povesti dərc edilib.

Bu nömrədə Südabə Ağabalayevanın dosta xitabən “Yanvar düşüncələri” yazısı, Günel Natiqin “Sevgi və xəyanət” essesi, “Tənqid və ədəbiyyatşünaslıq” rubrikasında Qorxmaz Quliyevin “Kontekst və kod”u, jurnalın tədqiqatçısı Aynurə Paşayevanın “Azərbaycan”ın tarixinə həsr edilmiş yazısı və digər maraqlı yazılar da yer alıb.

Jurnalın baş redaktoru Əməkdar İncəsənət Xadimi İntiqam Qasımzadədir.

• Məşhur sənətçinin şərəfinə xüsusi Barbi gəlinciyi hazırlandı
• Riki Martin bu ölkədəki konsertini ləğv etdi
• Castin Biberin oxşarı qadını qaçırmağa cəhd etdi - Polis hər yerdə onu axtarır