news-inner
clock10:00 calendar-gray 03 Yanvar 2018 view-gray413 dəfə oxunub
view-gray413 dəfə oxunub

Bu uşaqların az-maz inandığı təmiz şey olmalıdıŞaxta Babanın monoloqu

Kulis.az Aliyənin “Şaxta Babanın monoloqu” yazısını təqdim edir.

Səhərdən papirosdan ötrü göynəyirəm, çəkmirəm ki, uşaqlar Şaxta Babanın siqaret çəkməsini görməsinlər. Amma bunlar adamın belinə minir...

***

- Bax, uşaqlar, kim Şaxta Babanı incitsə, bu ağacımla onu buza döndərəcəm. - Bax-bax, kimə deyirsən ee…

***

- Ay xanım bu uşaq inanmır Şaxta Babaya, onu niyə gətirirsiz şənliyə? Yekə oğlandı uje...

***

Uşaqları bir yana, valideynləri dəhşətdilər. Yenə mən heç olmasa Şaxta Babayam, Santa Klausla lap pis rəftar edirlər. O gün küçədə Santa Klaus dayanıb yolkanın yanında. Yekə bir kişi gəlib, Santanın papağının qotazına çırtma vurub. Dönüb birin qoyasan alnının ortasına. Bunların dədəsi-nənəsi Şaxta Baba görmüşdü? Heç dindirsən, bir dənə nağıl eşitməyiblər, kitab oxumaqları cəhənnəmə...

Bəs o gün… dinozavra oxşayan bir valideyn bağçada mənə ayrı bir hədiyyə ötürür ki, bunu ver o uşağa. O biri uşaqların qabağında nataraz bağlamanı, kukla-robotu necə verim axı ona? Dedim, xanım saxlayın, o yanda verərəm, çəmkir üstümə ki, sənə nə var, pulunu mən vermişəm. Alıb atdım qırağa. Uşaqlar da bir az qorxdular. Bu uşaqların az-maz inandığı bir təmiz şey olmalıdı da… Yoxsa desinlər ki, Şaxta Baba filankəsə robot verir, mənə adi hədiyyə. Bu xarabada bir yerdə ədalətə oxşayan bir səhnəcik də qura bilmirik eee...

***

- Hə? Çıxıram. Ortanı boşaltsınlar…

- Salam, mənim əziz nəvələrim, nəticələrim!

Musiqini yenə gecikdirir ey, bu gədə…

- Qarlı dağlar aşaraq, çox ellər dolaşaraq, dağlarda qurdum dəyə, gəldim sizi görməyə… Necəsiniz?

***

Gələn ildən bağçalara getməyəcəm. Çox yoruram özümü. Yaş da o yaş deyil heç. Hamı yalan-gerçək sevinir yeni il deyəndə, mənim burnuma tər, nimdaş paltar iyi gəlir, gözümün qabağına dalındakı torbadan ikiqat olmuş Şaxta Baba gəlir. Ürəyim bulanır Allah haqqı. İyrənirəm bu geyimdən-qrimdən. Ödüm ağzıma gəlir. O biri seansda maykanı dəyişəm gərək altdan. Tərdən əynimə yapışıb.

***

- Uşaqlar, bu nədi yolkamızın işıqları yanmır? Mən sehrli ağacımı vurum, bir-iki üç deyəndə yanacaq. Hazırsınız? Bir-iki-üç! Yolka, yolka, ey mehriban yolka, əziz yolka can yolka… hə hamı birlikdə!

***

Yeni ildə hamı sevinməyə çalışır, mən elə yoruluram ki... Oynamaqdan çox adamlardan yoruluram e. Hamısı həşərat kimi, qaynaşır, öz uşağını qabağa dürtür, verdikləri pulun on qatını çıxaracaqlar elə bil uşaqlarını belimə qoymaqla…

Belə danışıram, Allah ruzimi kəsəcək ey… Bütün problemləri ilin axırına, təzə ilin əvvəlinə yükləyirəm.

Ha-ha-ha… Bu bığ-saqqalı yapışdırmağıma baxma, mən elə doğruçu Şaxta Babayam. Evin vacib problemlərini Şaxta Baba olanda həll etməliyəm. Amma bir iş var ki, mən yalnız ailəm üçün doğruçu Şaxta Baba oluram. Həm də yeni ildə. Qalan on iki ay Saxta Babayam. 200 manat maaşla möcüzə yaratmaq olar? Mən hələ yuxarı kateqoriya aktyorun aldığı maaşı alıram. 150 manat alanlar var. Ode, aparıcı səhnə ustasıdı Əlövsət müəllim, gecə qarovulçusu düzəldi. Bir elə işə məni də götürsəydilər, uşağın hazırlıq pulunu ödəyərdim. Bilmirəm, daha məktəb nəyə lazımdı? Elə hərəyə bir müəllim tutaq da, necə ki, tuturuq...

***

- Hə, əziz balalar! Görüm dərslərinizi yaxşı oxumusunuz? Necə? Eşimirəm.

***

Bu qarovulçu məsələsi yaxşı olardı. Amma qarovulçuluğa da adamın da gərək bir bazburutu ola da, balam… Mən indiki halımda nəyi mühafizə edə bilərəm ki ee... Hay-hayım gedib, uşaqlar demişkən vay-fayım qalıb. Şükür ki, hələ Şaxta Baba ola bilirəm. O da arvadın sayəsində. O qədər altdan köhnə-külə paltar geyindirir ki, belə əzəmətli görünüm. Həm də bu işi də tutmaq lazımdır.

***

- Hə, gözəl balalarım, siz nə gözəl rəqs etdiniz! Babanızla şəkil çəkdirin, sonra “Qırmızı papaq”ın nağılına baxaq, birlikdə onu qurdun əlindən xilas edək!

- Yox-yox, tamaşa ayrıdı, xanım. Hə, şəkil çəkdirməyin də qiyməti ayrıdı. O oğlanla danışın. Hə, bacı...

***

Əvvəl şəkli çəkdirməyə ayrı pul almırdım, baxdım ki, ay dədəm vay, bağça müdiri ayrı pul alır bunun üçün, amma mən köynəyimi üç dəfə dəyişirəm bir seansda, tərdən. Elə bilirlər asandı…

***

- Hə, Gözəl nəvəm, deməli mənə məktub yazmısan? Nə gözəl, nə gözəl!

****

Ay cavanlıq! Pərəstişkarlarım var idi. Çox da olmasalar, məni unutmurdular, tamaşalarıma gəlirdilər, məktub yazırdılar! Görəsən hardayam, neynirəm, xəbərləri var?

***

- Görüm, nəvəm mənə nə yazıb?

- Şaxta Baba, mənim adım Nicatdır. Ay, nə Gözəl, Nicat bala! Qoy mən bunu o tərəfdə oxuyum! Ay xanım, bu uşaq bura nə yazıb kitab adıdı, Maynqraft nədi? Oyuncaq adıdı? Bunu alın ona. Yox, oxuyun, məktub məndə qalsın.

- Hə, şirin nəvəm, qulağıma de görüm nə istəyirsən?

- He-he-he, mən də deyirəm nə istəyəcək - ayaqyoluna istəyir. Uşaqlar mənimlə məzələnir deyəsən...

- Sən, gözəl nəvəm, brek-dans oynamaq istəyirsən? Yox, baban çox qocadı, səninlə oynaya bilməz. Sən oyna, mən alqışlayım!

***

Əslində gərək öyrənim, rəqabət lazımdı. Cavan uşaqlar gəlib, indiki nəslin dilini bilirlər. Bir azdan mən də lazım olmayacağam. Ay kişi, nə qoyub nə axtarıram? Bizdə rəqabət var? Dəllallar monopoliya yaradır də, yeni ildə!

- Ay nə gözəl, nə talantlı balanız var!

***

Elə bil o sarıbaş uşağın cibindən partladan düşdü, nədi o yerdəki? Gözüm qorxub eee.. Bu uşaqlar bilir ki, biz yeni ilə, bayrama-zada sevinə bilmirik, ona görə ayağımızın altına partlayan şeydən atırlar ki, heç olmasa həyəcan keçirək. O gün uşaq atır qabağımca o andırı, dalınca da deyir: “Əmi, bayramınız mübarək”. Bu boyda zappıltını eşidirəm hər gün, bu zibilin səsinə öyrəşəmmirəm də... Şəkər tapacam axırda.

***

- Bəli, xanım. Reportaja gəlmisiz? Nə deyim. Ölkəmizin gələcəyi olan uşaqları sevindirmək, onlara xoşbəxtlik bəxş etmək olduqca xoşdur. 30 ildən çoxdur Şaxta Baba rolunda çıxış edirəm. Birinci il Sumqayıt teatrında Şaxta Baba oldum. Sonra Mədəniyyət evlərindəki şənliklərdə də çıxış etdim. Beləcə təcrübə topladım. Mənim şənliyimdə iştirak edən uşaqlar indi yanıma öz uşaqlarını gətirirlər. Yaxınlaşıb deyirlər ki, sən bizim Şaxta Babamız idin.

Arzum budur ki, ölkəmiz daha irəli getsin, gün-gündən çiçəklənsin! Dünyamız salamat olsun! – intervü verirəm, beş dəqiqə gözləyin - Bu gözəl tədbirlərdə görüşək....

news-inner-user
Aliyə

1004 məqalə

Oxşar xəbərlər

Xəbər lenti

Rüşvət alan kişilərin arvadları haqda 10 cümlə
14:45 16 İyun 2021
Nizamiyə həsr olunan müsabiqənin qalibləri bilindi
14:02 16 İyun 2021
Dayısı Rəşid Behbudov onu səhnəyə həsrət qoydu, küsüb Azərbaycandan getdi, anası ölənəcən yolunu gözlədi – Qürbətdə can verən müğənnimiz
13:11 16 İyun 2021
Tarix bizi Şuşada gözləyirdi – Aqşin Yenisey yazır...
12:39 16 İyun 2021
Vaqif İbrahimoğlunun 32 il sonra reallaşan xahişi
12:30 16 İyun 2021
Fərid Hüseyn Nizamidən mühazirə oxuyub
11:59 16 İyun 2021
Aləmi bürüyən ədəbiyyat ətri - İlham Əziz yazır...
11:30 16 İyun 2021
Seda Sayan Mehmet Ali Erbili təcavüzdə ittiham etdi
10:56 16 İyun 2021
Anar, Çingiz Abdullayev, Vaqif Səmədoğlu Monteneqro dilində…
10:05 16 İyun 2021
İlhamiyyə Rza: “Həmid efirdə lap ağ eləmişdi” – Müsahibə
09:01 16 İyun 2021
SSRİ-də yay istirahəti - Nostalji fotolar
21:00 15 İyun 2021
Nobelli yazıçı daha bir mükafata layiq görüldü
18:39 15 İyun 2021
Avropa Film Festivalında iştirak edən filmləri onlayn izləmək mümkündür
17:45 15 İyun 2021
Öz arvadını söydü, Səməd Vurğunu pislədi, yad qadınla yaxalandı – Hüseyn Arifin heç yerdə yayımlanmayan lətifələri
17:01 15 İyun 2021
Əməkdar artist vəfat etdi
16:18 15 İyun 2021
Bakının yaşı keçmiş ofisiant qadınları: Onları necə alçaldırlar?
15:30 15 İyun 2021
Müğənninin cızma-qarası 281 min dollara satıldı - Foto
14:41 15 İyun 2021
Məşhur bəstəkar vəfat etdi
14:01 15 İyun 2021
Mənə zorla köynək satan qız - Nihat Pir yazır
13:07 15 İyun 2021
Gənc rejissora görə Kürdəxanı həbsxanasına getdi, ən açıq səhnələrə çəkilən aktrisa kimi tarixə düşdü - Onu Təhminə roluna niyə layiq görmədilər?
12:15 15 İyun 2021