Azərbaycan Yazıçılar Birliyinin Qazax filialının rəhbəri, şair Barat Vüsalın Azərbaycan Yazıçılar Birliyinin sədri, Xalq yazıçısı Anara yazdığı və “Ədəbiyyat qəzeti”nin internet saytında yayımladığı mədhiyyə janrlı şeir ədəbi çevrədə birmənalı qarşılanmayıb.

Kulis.az-ın verdiyi xəbərə görə, sosial şəbəkədə bu şeiri şərh edən yazar və şairlər, onu rəhbərə yarınmaq kimi qiymətləndiriblər.

Gənc şair Şəhriyar del Gerani illər əvvəl şair Vaqif Bəhmənlinin rəhbəri, nazir Əbülfəs Qarayevə yazdığı tərifli şeirdən sonra işdən azad olunmasını xatırladaraq, belə hallarda analoji addımların atılmasını dəstəkləyib.

Şair Salam Sarvan isə, şeiri bayağı və şit adladırıb:

“Əlbəttə, Anar müəllimi də, Əbülfəs Qarayevi də sevmək olar, kimsə bu sevgini yazıyla, şeirlə ifadə də edə bilər, sözüm bunda deyil. Amma bu adamlar (mədhiyyə yazanlar – red.) niyə belə sadəlövhdürlər, hərifdirlər, bunu anlaya bilmirəm. Niyə başa düşmürlər ki, yazdıqları şeirin, yazının bayağılığından, şitliyindən açıq görünür ki, bu münasibət Anar müəllimə, Əbülfəs müəllimə sevgi ifadəsi deyil, başqa şeydi...”

Məsələ ilə bağlı şeirin müəllifi Barat Vüsalla əlaqə saxladıq. O yazdığı şeirdə səmimi olduğunu söylədi:

“Bunu yaxşı əməl saymayanlar nəyi yaxşı sayırlar ki? Yaxşı olan nədir? Onların etdiyi kimi klassikaya hörmətsizlikdir? Nə deyiblər, özləri bilər, onların öz fikridir. Bu şeiri mən indi yox, 2015-ci ildə yazmışam. Bir də, mən bir rəhbər kimi yox, insan kimi, ziyalı olaraq, böyük yazıçı olaraq Anara olan sevgimi ortaya qoymuşam. Anara olan sevgimdə Üzeyir bəyə, Mirzə Cəlilə olan ehtiramımı ifadə etmişəm. Kimə necə təsir edib, bu, onun öz problemidir.

Anar rəhbər olmasaydı da, sevgimi ona bildirəcəkdim. Bu şeiri ona rəhbər kimi yazmamışam. Üzeyir Hacıbəyovun, Mirzə Cəlilin davamçısı, millət fədaisi kimi yazmışam.”

• “Zaman səyyahının arvadı” romanının müəllifinin yeni əsəri çap olundu
• Azərbaycanlı musiqiçi intihar etdi
• "Təvazökarlıq insanın öz həqiqi dəyərini anlamasıdır..." - Anatol Fransın sitatları