Əhməd Bakıxanov adına 6 nömrəli Uşaq Musiqi məktəbi Əhməd Bakıxanovun 125 illik yubileyi münasibəti ilə konsert keçirib. Kulis.azın məlumatına gör məktəbdə bütün əlamətdar günlər, o cümlədən musiqiçilərin və tanınmış bəstəkarların yubileyləri, dövlət bayramları, anım günləri davamlı olaraq qeyd olunur, musiqi həftələri keçirilir.

Əhməd Bakıxanov adına 6 nömrəli Uşaq Musiqi məktəbinin fəaliyyəti 1937-ci ildən başlayıb. Bakı şəhər İcra hakimiyyətinin İdarə Arxivindən verilən məlumata görə, məktəb 1937-ci ildə 1939-cu ilə kimi Dənizçilər klubunun nəzdində Azərbaycan SSRİ Komissarlığı Sovet yanında İncəsənət İşləri üzrə İdarənin nəzdindəki Musiqi Birliyinin tərkibində olmuş, 1939-cu ildən 1940-cı ilə kimi Dənizçilər klubunun nəzdindəki Bakı şəhər Xalq Təhsili Musiqi Məktəbləri Birliyinin nəzdində hesab edilib. 1940-cı ildən 6 nömrəli Uşaq Musiqi məktəbi Bakı şəhər İcra hakimiyyətinin tərkibindədir.

Musiqi məktəbinin yerləşdiyi bina XX əsrin əvvəllərində "İslamiyyə" adlı mehmanxana olub. Ü.Hacıbəylinin ev muzeyindən alınmış sənədə əsasən, dahi bəstəkar bir müddət burada yaşayıb-yaradıb. Şərqin ilk operası olan "Leyli və Məcnun"u məhz bu binada yazılıb, bu evdə əsərin səhnə quruluşunun hazırlayıb.

1992-ci ilin 7 sentyabrında 6 nömrəli Uşaq Musiqi məktəbinə xalq artisti, görkəmli tarzən, pedaqoq Əhməd Ağa Məmməd Rza oğlu Bakıxanovun adı verilib.

2014-cü ildən məktəbə Almaz Əhmədova rəhbərlik edir.

Tədris prosesinin və müəllimlərinin yüksək professional səviyyəsi ilə seçilən musiqi məktəblərindən biri də Ə.Bakıxanov adına 6 nömrəli uşaq musiqi məktəbidir. Burada fortepiano, skripka, qoboy, fleyta, klarnet, gitara, tar, kamança, qanun, nağara, qarmon, xanəndə, vokal ixtisasları tədris olunur. Uşağın musiqi zövqünün formalaşmasında, yetişməsində musiqi müəllimlərinin üzərinə ciddi məsuliyyət düşür. Bu məsuliyyətli işi məktəbin təcrübəli, savadlı müəllimləri Lalə Useynova, Tamilla Kazımova, Bahar Daşdəmirova, Çingiz Absəlimov, Əliağa Əliyev, Firuzə Əliyeva, Zöhrə Haşımova, Nigar Babayeva, Raminə Ağayeva, Leylüfər Rzayeva-Sarabskaya, əməkdar artist Səlim Abbasov, tədris işləri üzrə direktor müavini İlahə Ağayeva və onlarla birgə çalışan gənc kollektiv layiqincə öhdəsindən gəlirlər. Məktəbin yetirmələri respublikada keçirilən müsabiqələrdə aparıcı yerləri tutaraq laureat və diplomant fəxri adlarına layiq görülürlər.

Məktəbin müəlliməsi İradə Haşımovanın hazırlaşdırdığı məktəbin xor kollektivi və Leylüfər Rzayeva-Sarabskayanın rəhbərlik etdiyi, Mənsurə Məmmədzadənin də təmsil olunduğu skripka kollektivi uğurlu çıxış edib.

• Nəhəng - Fazil İsgəndərin hekayəsi
• Sardanapalın ölümü, Dantenin qayığı və azadlıq barrikadası... - Ejen Delakruanın məşhur əsərləri
• "Yol ayrıcında cəngavər", "Yeraltı dünyanın üç şahzadəsi", "Uçan xalça" - Məşhur rəssamın ən yaxşı 10 əsəri