Mədəniyyət və Turizm Nazirliyi və Azərbaycan Dövlət Rəsm Qalereyasının təşkilatçılığı ilə “Qalereya 1969”da “İRS. İslam həmrəyliyi incəsənətdə” adlı sərgi açılıb.

Tədbirdə çıxış edən Mədəniyyət və Turizm Nazirliyinin sektor müdiri Qalib Qasımov “İslam Həmrəyliyi İli” çərçivəsində təşkil olunan sərginin əhəmiyyətindən danışıb.

Bildirilib ki, ölkəmiz uzun əsrlərdən bəri İslam sivilizasiyasının əsas mərkəzlərindən biri olmaqla bərabər, İslam dininin yayılmasında mühüm rol oynayıb. Bütün bunlar Azərbaycan mədəniyyəti və incəsənətində də dərin izlər buraxıb. 2017-ci ilin “İslam Həmrəyliyi İli” elan olunması ölkədə tolerantlıq mühitinin təşəkkül tapmasına, multikulturalizmin, mədəniyyətlərarası və sivilizasiyalararası dialoqun qurulmasına, İslam dəyərlərinin, eləcə də milli təsviri sənətimizin dünyada təbliğinə böyük töhfələr verir.

İslam mədəniyyətinin qiymətli abidələrindən Bibiheybət, Təzəpir, Əjdərbəy, Şamaxı Cümə məscidləri və Gəncə şəhərindəki “İmamzadə” kompleksi dini memarlığın nümunələri olduğu kimi, Azərbaycan rəssamlarının XX əsrdə yaratdıqları nadir sənət inciləri də İslam mədəniyyətini özündə əks etdirən dünyəvi incəsənətin bariz nümunələridir. Sovetlər İttifaqı dönəmində və Azərbaycanın dövlət müstəqilliyinin bərpasından sonrakı illərdə yaradılan, İslam dini təsəvvürlərini və mədəniyyətini əks etdirən təsviri sənət nümunələri Azərbaycan Dövlət Rəsm Qalereyasının fondunda xüsusi kolleksiya təşkil edir.

Diqqətə çatdırılıb ki, sərgi Azərbaycan rəssamlarının yaradıcılığının təbliği, Dövlət Rəsm Qalereyasında qorunub saxlanılan İslam həmrəyliyini əks etdirən bu incəsənət əsərlərinin geniş tamaşaçı auditoriyasına təqdim olunması məqsədilə keçirilir.

Sonra iştirakçılar sərgiyə baxıblar.

Sərgi dekabrın 12-dək davam edəcək.

• Tanınmış rejissor bu filmini nümayişdən çıxardı - Səbəb
• Ömrünün axırına qədər tək yaşayan görkəmli rejissorumuz kimdir?
• Yerusəlimdən İçərişəhərə - Azərbaycan kinosunun gizli qəhrəmanının heyrətamiz həyat hekayəsi