Fəxri xiyabanda xalq artisti Emin Sabitoğlunun məzarı ziyarət olunub.
APA-nın məlumatına görə, ziyarətdə mədəniyyət və incəsənət xadimləri, musiqiçilər, ictimaiyyət nümayəndələri iştirak edib.
Bəstəkarlar İttifaqının sədri, xalq artisti Firəngiz Əlizadə Emin Sabitoğlunun müasir Azərbaycan musiqisinin inkişafındakı xidmətlərindən danışıb. Bəstəkarı dillər əzbəri olan mahnıların, musiqi xəzinəsini zənginləşdirən simfonik əsərlərin müəllifi kimi dəyərləndirən Firəngiz Əlizadə bildirib ki, Emin Sabitoğlu yaradıcılığa başlayandan az sonra böyük populyarlıq qazanıb: “Onun mahnılarını biz hər yerdə eşidirik. Emin Sabitoğlu eyni zamanda gözəl filmlərə, teatr tamaşalarına musiqilər yazıb. Onun əsərləri hər zaman insanlar tərəfindən böyük zövqlə, sevgi ilə dinlənilib, qəbul edilib. Azərbaycanın musiqi mədəniyyətində Emin Sabitoğlunun özünəməxsus yeri, imzası var”.
Bəstəkarın qızı, Bakı Musiqi Akademiyasının professoru Ceyran Mahmudova 80 illik yubileyi çərçivəsində Emin Sabitoğlunun yaradıcılığına həsr olunan silsilə tədbirlərin keçirildiyini diqqətə çatdırıb. Atası haqqında xatirələrini bölüşən C. Mahmudova bəstəkarın xatirəsinə göstərdiyi diqqətə görə Azərbaycan dövlətinə və Bəstəkarlar İttifaqında təşəkkürünü bildirib.
Qeyd edək ki, Emin Sabitoğlu 2 noyabr 1937-ci ildə Bakıda yazıçı Sabit Rəhmanın ailəsində anadan olub. Musiqi məktəbindən sonra 1954-cü ildə Konservatoriyaya Qara Qarayevin sinfinə daxil olub. İki ildən sonra isə Çaykovski adına Moskva Dövlət Konservatoriyasına Yuri Şoporinin bəstəkarlıq sinifinə keçirilib. Emin Sabitoğlu 18 noyabr 2000-ci ildə Bakıda vəfat edib.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər