Kulis.az gənc şair Fərid Hüseynin yeni şeirini təqdim edir.
Qəlbin qürbətində,
ağlın vətənində,
yaşayacam haçanacan?
Həsrətimi danışsam
göz yaşlarınızın boyu uzanar
dar ağacınacan.
Susuram,
susuram,
susuram,
səsimi qəlbimin dənizinə tökülən
lallığımda boğuram...
Ətrini getdiyi hər yerdə
miras qoyan
bir qadını xatırlayıram.
Onunla mənə maraqlıydı,
istərdim ki,
nə etsəm o saat bilsin,
yersiz söz salardım
son xəbərlərimdən,
elə bilərdim heyrətlənəcək,
təəccübdən gözləri alacalanacaq,
və mənim əksim daha
böyük görünəcək gözlərində.
Mənim sevgimdə bir qocalıq vardı,
məni danışdıra bilənləri sevərdim,
İndi ilk dərs günü geydiyim
paltar qoxusu kimi xatırlayıram onu,
hər gün bayram olmur ömür,
dəftərimi cıran müəllimə
əlləri də yadıma düşür.
Dəyməzdi,
dəyməzdi,
daha gözəl şeylər vardı yaşamağa,
ancaq onlara da dəyməzdi.
Çətini filmi yox,
filmin bitdiyini anlamaqdı.
bir dəqiqə vaxtım vardı,
baxdım,
baxdım,
baxdım:
dünya maraqlıydı.
Ömürsə qısadı
köynəklərimizi
köhnəltməyə çatmır,
yatmır,
yatmır,
yatmır
tale laylamıza yatmır.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər