Opera və Balet teatrı yeni mövsümün ilk premyerasını élan edib.

Kulis.az-ın teatra istinadən verdiyi xəbərə görə, bu, Azərbaycanın görkəmli bəstəkarı Xalq artisti Cahangir Cahangirovun “Xanəndənin taleyi” operasının tamaşası olacaqdır. Premyerası oktyabrın 7-də baş tutacaq tamaşa 109-cu mövsümün ilk premyerasıdır.

Cahangir Cahangirov “Xanəndənin taleyi” operasını 1978-ci ildə qələmə almış və həmin ildə opera səhnəyə qoyulmuşdur. Maraqlı süjet xətti olan tamaşa XX əsrin əvvəllərində Azərbaycanda çox məşhur olan müğənni Mir Səidin taleyindən, onun hələ gənc ikən Avropaya mühacirət etməsi, qürbətdə vətən həsrəti ilə yaşamasından bəhs edir. Qeyd edək ki, operanın ilk quruluşunda əsas partiyanı mərhum sənətkar, Xalq artisti Baba Mahmudoğlu ifa etmişdi.

Yeni quruluşda əsas qəhrəmanı teatrın solisti - Əməkdar artist İlkin Əhmədov yaradacaq. Premyera tamaşasında həmçinin Azərbaycanın Əməkdar artistləri Afaq Abbasova (Xanım), Fərid Əliyev (Rəşid bəy), Səbinə Vabahzadə (Gülsüm), Fəridə Məmmədova (Rəna), Xalq artistləri Fidan Hacıyeva və Gülyaz Məmmədova (Xanəndə qız), solistlər Tural Ağasıyev (Aşur bəy), Fəhmin Əhmədli (Qasım), Tələt Hüseynov (Məmməd) çıxış edəcəklər.

Tamaşanın musiqi rəhbəri və dirijoru Xalq artisti, professor Cavanşir Cəfərov, quruluşçu rejissoru Əməkdar incəsənət xadimi Hafiz Quliyev, xormeysteri Əməkdar incəsənət xadimi Sevil Hacıyevadır.

Səhnə tərtibatı və kostyum eskizlərinin müəllifi isə Əməkdar mədəniyyət işçisi, rəssam Tehran Babayevdir.

• Adam və ağac - Qan Turalının hekayəsi
• Məşhur rejissorun "Don Kixot" layihəsi yenidən qurulur
• “Azərbaycan ordusu: Şücaət və qələbə” adlı tədbir təşkil edildi