Bu ailənin başına nə müsibətlər gəlməmişdi ki?!

Repressiya görmüşdülər.

Məhrumiyyətlərə düçar olmuşdular.

Bir nəsildən 13 nəfər repressiyanın qurbanı olmuşdu.

Söhbət yazıçı-publisist Seyid Hüseyn Sadıqzadənin ailəsindən gedir.

Seyid Hüseyn də ağır uşaqlıq həyatı yaşamışdı.

Atası öləndə cəmi beş yaşı vardı.

Bütün şəhər onun atasının qəhrəmancasına həlak olmasından danışırdı. Onun fədakarlığı uzun müddət Bakı camaatının yaddaşından silinmədi.

Hadisə 1892-ci ildə olmuşdu. Dəniz kənarı parkda hərəkət edən faytonun atları hürkərək qaçmağa başlayır.

Faytonçu sürətlə yortan atları dayandıra bilmir.

Faytondakılar ingilis attaşesinin gənc qızlarıdırlar.

Faytonu dayandırmaq mümkün olmasa, bir yerə çırpılacaq, qızlar həlak olacaqlar. Qızmış atlar özlərini hətta qələbəliyə belə vura bilərlər. Faciənin miqyası daha böyük olar.

Bu vaxt dəniz kənarında olan Mir Kazım, Seyid Hüseynin atası təhlükəni görərək özünü atların qabağına atır, onların yüyənlərindən dartaraq saxlamağa çalışır.

Lakin sürətlə yortan qızğın atlara güc gəlmək çətindir. Yüyəndən yapışmış Mir Kazım yerlərdə sürünür. Fəqət, var qüvvəsi ilə atların ipini çəkir.

Fayton dayanır. Gənc qızlar ölümdən xilas olurlar.
Mir Kazımınsa vəziyyəti pisdir. Kürəyi, beli əzilib, qan içindədir, atlar tapdayıblar onu.

Onu İçəri şəhərdəki evlərinə gətirirlər. Bir həftə sonra o, canını övladlarına bağışlayır.

Yetimləri isə babası himayəsinə götürür.

Bu faciə Sadıqzadələr ailəsində sonuncu deyildi. Qabaqda onları amansız repressiya illəri gözləyirdi.

Seyid Hüseyni 1937-ci il iyulun 15-də həbs etdilər.

Noyabrın 11-də isə həyat yoldaşı şairə Ümgülsüm Sadıqzadə həbs olundu.

Səbəb “xalq düşməni” Seyid Hüseynin həyat yoldaşı olması ilə yanaşı, Məmməd Əmin Rəsulzadənin qohumu olması idi.

Seyid Hüseyn 1938-ci ilin yanvar ayında güllələndi.

Ümgülsüm isə 8 il həbs cəzasına məhkum edilərək “Temlaq” İslah Əmək düşərgəsinə göndərildi.

Bundan sonra başsız qalan övladları Oqtay, Toğrul Cığatay, Qumral Sadıqzadələr ağır məhrumiyyətlər içərisində yaşadılar. “Xalq düşmənləri”nin övladları olduqları üçün təqib olundular.

Gələcəyin “xalq rəssamı” Oqtayı Rəssamlıq Məktəbindən qovdular.

Mirmehdi AĞAOĞLU

• Xalq artisti Muxtar Avşarovun anadan olmasının 110 illiyi qeyd ediləcək
• "Xalq düşməni"nin qızı: "Cərrah əməliyyat bıçağını atamın bədənində unutmuşdu..." - Müsahibə
• Azərbaycan Dövlət Akademik Rus Dram Teatrının aprelin 16-dan 30-dək repertuarı