Nizami Kino Mərkəzində “British Council Azərbaycan”ın təşkilatçılığı ilə Film Komissiyası modelinin tətbiqi ilə bağlı tədbir keçirilib.

APA-nın məlumatına görə, “British Council”in Azərbaycan üzrə direktoru Elizabet Vayt layihə haqqında məlum verərək bildirib ki, təmsil etdiyi qurum 2015-ci ilin aprel ayından etibarən Avropa Birliyinin Mədəniyyət və Yaradıcılıq proqramını həyata keçirir:

“Proqram çərçivəsində “British Council” Azərbaycanda kinematoqrafiya sahəsinin inkişaf etdirilməsi məqsədilə Film Komissiyası modelinin yaradılmasını nəzərdə tutan layihə həyata keçirir. Film Komissiyasının yaradılmasına dair müvafiq icmalın işlənib hazırlanması Mədəniyyət və Turizm Nazirliyinin qanunvericilik işçi qrupunun üzvü, ekspert Fikrin Bəktaşiyə həvalə edilib. Azərbaycanda təqdim ediləcək yeni konsepsiyalar arasında Film Komissiyası modelinin yaradılması da olacaq. Azərbaycan Film Komissiyası ilə əlaqədar qısa analitik icmal gələcək illərdə fəaliyyət göstərəcək Film Komissiyasının planlaşdırılması və yaradılması üçün mühüm töhfə olacaq”.

Mədəniyyət və Turizm Nazirliyinin qanunvericilik işçi qrupunun üzvü, ekspert Fikrin Bəktaşi isə qeyd edib ki, film komissiyasının məqsədlərindən biri ölkəni təbliğ etməkdir: “Film Komissiyaları festivallarda ölkəni təmsil edir, kino infrastrukturu haqqında tam olaraq məlumat yayımını təmin edir. Eyni zamanda xarici film istehsalçıları ilə əlaqə qurur, onları əməkdaşlığa cəlb edir”.

C. Cabbarlı adına “Azərbaycanfilm” kinostudiyasının direktoru Müşfiq Hətəmov Film Komissiyası modelinin tətbiqinin müsbət tərəfləri haqqında danışıb. Onun sözlərinə görə, komissiyanın yaranmasında əsas məqsədlərindən biri də yerlərdə yaradıcılıq və kino sənayesinin mobil şəkildə fəaliyyət göstərməsinə zəmin yaratmaqdır: “Biz artıq bir neçə il əvvəl bu layihəni hazırlayıb Milli Məclisə təqdim etmişik. Eyni zamanda əsas fəaliyyət istiqamətlərindən biri də Azərbaycan kinoindustriyasının dünya kinoindustrasiyasının tələblərinə cavab verməsidir”.

• Əlyazmaları məhv edildi, meşədə güllələndi... - Ədəbi yaddaşımızın xilaskarının faciəli taleyi
• Türkiyə musiqi sənayesində tarixi ilk
• Məşhur amerikalı müğənni vəfat etdi