Art-house kinosu sevənlərin Bakıda böyük ekranda görmək istədikləri filmlərin sayı il ərzində uzağı bir neçə film olar.

Amma çox zaman bu filmləri böyük ekranda görmək arzusu elə arzu olaraq qalır.

Məsələn, Andrey Zvyagintsevin bu il Kann festivalında mükafatlandırılan “Sevgisizlik” filmi iyunun 1-dən artıq Rusiyada prokata çıxarılıb. Bəs cəmi bir iri müasir kino mərkəzi, 3 kinoteatr şəbəkəsi olan paytaxtda “Sevgisizlik”, “Kvadrat”, “Müqəddəs maralın öldürülməsi”, “Dəqiqədə 120 zərbə” kimi yeni filmləri böyük ekranda görmək qismət olacaqmı?

Nizami Kino Mərkəzinin mətbuat katibi Arzu Əhədova “Sevgisizlik” filmini almadıqlarını deyir: “Distrubütorlar bu filmi bizə təqdim etməyib. Eləcə də adını çəkdiyiniz o biri filmləri. Yəni bizim siyahımızda o filmlər yoxdur.”

“Park-cinema” şəbəkəsinin Meneceri Tatyana xanım da sözügedən filmin repertuarda olmadığını, əlavə izah verə bilməyəcəyini söylədi.

“Cinema Plyus” kinoteatrlar şəbəkəsinin baş direktor müavini Cəfər Axundzadə mükafatlı art-house filmlərinin tamaşaçı gətirmədiyini söyləyir: “Biz, məsələn, “Sevgisizlik” filmini almaq üçün distrübutora müraciət etdik. Amma onlar filmi vermədilər. İki seans göstərməkdənsə, göstərməsəniz daha yaxşıdır, dedilər. Bundan əvvəl Kusturitsanın “Saman yolu ilə”, Zvyaqintsevin özünün “Leviafan” filmlərini göstərdik. Tamaşaçı bu filmlərə gəlmədi. Tamaşaçı gəlməyən filmi almaq sərf etmir. Bununla belə, yenə də həmin filmləri göstərməyə çalışacağıq”.

Həmçinin, Cəfər Axundzadə yerli kommersiya filmlərində keyfiyyət rəqabəti yaratmaq məqsədilə kinoteatrın seçicilik etdiyini söylədi: “Tamaşaçının yerli filmlərə marağı yaranıb və yerli filmlərə baxış sayı o birilərdən artıqdır. Müstəqil kommersiya filmləri necəsə tamaşaçını kinoteatra qaytarıb və biz bu tamaşaçını keyfiyyətsiz filmlərlə kinoteatrdan uzaq sala bilmərik. Bundansa keyfiyyəti aşağı olan filmləri yaxına buraxmırıq. Artıq kino gəlirli sahəyə çevrilir və hər kəs bu işə qoşulmaq istəyir. Bizimsə məqsədimiz çoxlu sayda filmlərin arasında keyfiyyət şkalası yaratmaqdır”.

• Mastroyanni niyə “zəif kişiləri” oynayırdı? - Kino əfsanəsinin sirlərlə dolu həyatı
• "Şamı söndür, düşüncələrimin necə göründüyünü görmək istəmirəm..." - Emil Zolya
• Sabahın gəlməsini arzulamağa nə haqqım var? - Alen-Furnyenin "Adsız ölkə"sindən