Dünən “Ramada otel”də “Arzuların son uçuşu” adlı filmin təqdimat mərasimi oldu. Kulis.Azın verdiyi xəbərə görə, qısametrajı filmin rejissoru Pəyyam Rafiqoğludur.

Film qan xərçənginə tutulan uşağın son dəqiqələrindən bəhs edir. Balaca Xəyal hər gün ölümlə savaşır, getdikcə daha da solğunlaşır. Onu xilas etməkdə aciz qalan həkim Vidadi və tibb bacısı Lamiyə uşağın əzablar içində qovrulmasına baxa bilmirlər. Tibb bacısı Lamiyə uşağa mehrini salır, onu öz doğması kimi bağrına basır, son dəfə uşağı dəniz sahilinə aparır, balacanı doyunca gəzdirir, bərabər göyərçin uçurdur. Film uşağın ölümü ilə başa çatır.

Əvəz Hüseynzadənin “Çərpələng” hekayəsi əsasında çəkilən “Arzuların son uçuşu” 16 dəqiqəlik qısametrajlı filmdir. Prodüsser Füqanə Zeynallı, rejissor Pəyyam Rafiqoğlu, bəstəkar Sevinc Tofiqqızıdır. Vidadi Quliyev, Mətanət Eres, Sevinc Tofiqqızı, Mehdi Abdullayev, Elçin Əfəndi filmdə rol alıblar.

Filmin baxışından sonra aktyorlar, qonaqlar film haqqında öz fikirlərini, təəssüratlarını bölüşdülər. Baş rolda, həkim obrazını canlandıran Vidadi Quliyev dedi ki, bir neçə dəfə epizodik rollarda filmə çəkilib:

“Mənə belə bir təklif gələndə razılaşmalı oldum. Ssenarini oxudum, mənə ağır gəldi. Çünki özüm də həkiməm. Əslində, öz rolumu oynayacaqdım. Mən filmdə nə qədər aktyor kimi olmağa çalışsam da, alınmadı. Əksinə filmdə də həkim kimi oldum. Ssenaridə yazılmışdı ki, Vidadi həkimin tibb bacısı Lamiyə xanım. Qəribədir ki, mən neçə illərdir Lamiyə adlı tibb bacısıyla bərabər işləyirəm. Qüsurları olsa da, düşünürəm ki, bu film bizim ortaya qoyduğumuz vacib işdir. Mən nə vaxtsa Rasim Balayev, ya da hansısa məşhur aktyor olmayacam. Amma istərdim ki, məni də aktyor sahəsində bir yerim olsun”.

Daha sonra Şeyx Əbdül film haqqında öz təəssüratlarını bölüşdü:

“Aktyorlar zəhmət çəkiblər. Onlar filmin ərsəyə gəlməsi üçün çalışıblar. Qüsurlar həmişə olacaq. Amma bu cür gözəl iş ortaya qoymaq yalnız alqışa layiqdir. Yaradıcı qrupu təbrik edirəm!”

Təqdimatda iştirak edən Flora Kərimova da öz ürək sözlərini dedi, yaradıcı heyəti film münasibəti ilə təbrik etdi: “Ağrılı bir mövzuya toxunublar filmdə. Mən onların bu uğuruna sevinirəm. Vidadi həkimə, digər aktyorlara halal olsun”.

Flora xanım daha sonra maraqlı bir ifa ilə tədbirə şuxluq gətirdi.

Yazıçı Baba Vəziroğlu çıxışında Flora xanımın fikri ilə razılaşdığını dedi, güclü, ya zəif olmasından asılı olmayaraq ortaya iş qoyulmasını təqdir etdi və çıxışının sonunda tamaşaçıların xahişi ilə bir şeirini dedi.

Sonda balaca Xəyalı, xəstə uşağı canlandıran Mehdi Abdullayev danışdı, üç filmə çəkildiyini dedi.

Üzrlü səbəbdən təqdimatda filmin rejissoru Pəyyam Rafiqoğlu iştirak edə bilməyib.

Film təqdimatının sonunda tamaşaçılar aktyorlarla şəkil çəkdirdilər.

• Əməkdar mədəniyyət işçisi komaya düşdü
• "On ildir xəstəliklə mübarizə aparırdı" - Xalq artisti Hacı Murad Yagizarovun qardaşı
• Dövlət Turizm Agentliyi şimal-qərb regionuna infotur təşkil edib