Hər kəsin həyatında maraqlı tərəflər var. Bəzən birinin həyatı haqqında deyirlər: “Film kimi həyat yaşayıb”.

Bəs kimlər öz həyatını film kimi görür? Onların həyatından çəkilən film hansı məşhur filmə bənzəyər?

Kulis.Az bu barədə sorğu keçirib. Cavabları təqdim edirik.

Yalçın İslamzadə

- Filmə oxşayacaq həyatım olmayıb açığı.

Müşfiq Ötgün

- “Şouşenkdən qaçış” filminə bənzərdi yəqin. Özümü dərk edəndən günahsız günahkar statusunda buldum özümü. Bütün fəlsəfi çabalarım da azadlığa aparan yolu aramaqla bağlı oldu. İnsanların düşüncələrindən, mentallıqdan, siyasi təfəkkürümüzdən, həyatımızın şərtiliklərindən qurulmuş məhbəsdən qaçış kimi.

İlqar Fəhmi

- Şəxsən mən istərdim “Nəsimi”yə, “Babək”ə bənzəsin, amma deyəsən “Qəzəlxan”dan o tərəfə keçmir.

Murad Köhnəqala

- Dəqiq deyə bilmərəm. Ola bilsin, mənim həyatıma bənzər filmlər var, ancaq rastıma çıxmayıb.

Kənan Hacı

- Çox çətin sualdır. Gərək bu haqda düşünəm. Həyatımdan çəkiləcək filmin ssenarisini gərək özüm yazım.

İlqar Rəsul

- Maraqlı filmlər çoxdur, əlbəttə. Amma inanmıram həyatımdan çəkiləcək film çəkilmişlərin hansınasa bənzəsin.

Cəlil Cavanşir

- Həyatımdan film çəkilsə hansı filmə bənzəyəcəyini bilmirəm. Açığı, heç vaxt bu barədə fikirləşməmişəm. Amma hərdən özümü Zeki Demirkubuzun “Yazqı” filminin qəhrəmanı kimi hiss edirəm.

Alik

- Hər bir insan həyatı unikaldır, digərinə bənzəmir. Əslində, yaxşı film də digərlərinə bənzəməyəndir. Bu baxımdan həyatımı heç bir filmə bənzətmirəm. Ayrı-ayrılıqda bütün insanların həyatı maraqlıdır. Hətta ən darıxdırıcı həyat tərzində belə maraqlı bir nüans, həyəcanlı bir məqam var. Amma həyatımdan film çəkilsə, yəqin ki, janrı komediya olar.

Hikmət Orhun

- Qabaqlar yaşım az idi, bir yerdə duran adam deyildim, çox gəzirdim. İndi nisbətən hüzura qovuşmuşam. Hazırkı Hikmətin həyatı filmə çəkilsə çox istəyərdim, Kim Ki-Dukun “Yaz, yay, payız, qış və yenə yaz” filminə bənzəsin. O filmdən öyrəndiyim çox şey var. Filmlərə baxmağa da həmin filmlə başlamışam.

Ömər Xəyyam

- Kurosava. "Yaşamaq". Bir gün yaşadıqlarımı filmləşdirəcəm. Məndən başqa heç kim bu ssenarini çəkə bilməz.

• Gəncə Dövlət Milli Dram Teatrı beynəlxalq festivalda iştirak edəcək
• Kommersiya məktəbindən böyük səhnəyə - Atası niyə onun aktyor olmasını istəmirdi?
• Şair Əşrəf Veysəlli: "Əkrəm Əylisli 15 il kitabımı çap etmədi..." - Müsahibə