Kulis.az Seyid Aynurun yeni şeirlərini təqdim edir.
***
Bu diyarda A Z A D L I Q- çörək pulu üçün kişilərin
qul bazarında sərbəst dayanmasıydı!.
hər gün evlərdə
neçə-neçə qadının ümidlərini udurdu tozsoran.
Böyüklər gün eynəkləri taxırdı gecə-gündüz,
vitrindəki konfetlərə baxa-baxa qalırdı uşaqlar.
Adamlar baxışlarıyla güllələyirdi əl-ələ gəzənləri,
hamı rəsmi idi-şəxsiyyət vəsiqəsindəki fotolardakı kimi
ölmüşdü bu şəhərdə sevgi!.
Mən minalarla dolu sahədə
çiyələk əkmək istəyən qız kimiydim,
sən çərpələng uçurmaq istəyən oğlan.
Ağlamsınıb içimdə arzular bu gecə bulud-bulud,
“nədənsə yalnız yuxularda
göy qurşağına çevrilir qəzəbli adamlar!.”
:gözlərim fikirlidir.
⃰ ⃰ ⃰
Gülümsəyərək əllərini
pəncərədən baxan
anasına tərəf yelləyirdi
həyətdə topla oynayan qırmızı donlu qız;
düyünü təmizlədiyi kimi
qara günləri də ömürdən arıtlamaq istəyirdi
ailəsinə yemək hazırlayan
qıyıq göz, girdə sifət qadın.
Birdən kimsə ucadan çığırdı:
“Reyko, Reyko, eşidirsən, çıx,
gəl, yığ uşağının küllərini küçədən!”.
Məhv olmuşdu canlı hər nə varsa -
o gün qəfil qollarını nüvəyə açmışdı Xirosima!.
⃰ ⃰ ⃰
Atasından öyrənmişdi xəyanəti:
Bir dəst boz kostyumu kəbinli arvadında-evdə,
O biri göy dəsti -
görüş üçün kirayələdiyi mənzildə durardı.
Deyirlər:
“Senbernarlar ölənədək dişisinə vəfalı olur ”.
⃰ ⃰ ⃰
Qorxudur məhəbbətin,
təzə ayaqqabılarım kimi.
Sıxır, qoymur getməyə,
xatirə qalır-
hər toxunduqda qanayan göz-göz yaralar.
⃰ ⃰ ⃰
Eşqin ehtiyatsızlıqdan ölmək olduğunu
bilən bütün sevənlər
dəcəllik edən val kimidir-
Patefonun qızılı iynəsi incitsə də
“Son nəfəs rəqsi”ni oynayıb qurtaranadək
fır-fır fırlanacaqlar.
Qolumda qan kimi dövr edən saat,
başımı yorğana bələyib düşmənlərimin
səndən sadiq olduğunu düşünürəm.
hamı öz yerindədir,
bəs sən,
sən,
haralardasan......?????
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
