Kulis.az gənc şair Tural Turanın yeni şeirlərini təqdim edir.

Çatlamış dodaqlar öpüş saxlamaz

Çatlamış dodaqlar öpüş saxlamaz,

Öpər dodağına yaxın nə varsa.

Öpdüyü daşdımı, ətdimi, baxmaz,

Süzülər illərin yanğısı çim-çim,

İçində qarımış axın –

nə varsa...

Bu həm boşalmaqdı, həm də ki, pərçim.

Ovcunda gizlədər öpdüyü şeyi,

Bir gözü sağında, solunda olar.

Öpüb oxşadığı əlində olar,

Yarımçıq həzlər də onların meyi...

Öpər bucaq-bucaq daşı, dəmiri

Öpər şəkil-şəkil, közbəköz öpər.

Diliylə oxşayar öpdüyü yeri,

Öpər soyuq-soyuq, özünə gələr,

Öpər hesablamaz arı, həyanı,

Öpər, içindəki qızlığı gedər.

Alın yazısını salıb aşağı...

Bir qadın qoxusu çağırır məni,

Deyir qaşıqla gəl, yetiş qazmağa.

Batırıb peroya neştər iynəni -

Soyuq qoynuna yazı yazmağa.

Alın yazısını salır aşağı,

Bezib tənhalığın ağ ləkəsindən...

Qarımış daşların elçi uşağı

İyrənib, ürpənib "qız" silkəsindən.

Öz əkiz qoxumdur çağıran yoxsa?

Bəlkə ortasından Araz keçibmiş.

Nə olar Yaradan arxivə baxsa,

Nostalji iy verən iki qoxunu

Niyə birgə ölçüb ayrı biçibmiş?..

...Birinci biz yıxaq elçi daşını,

Peyğəmbər bütləri aşıran kimi.

Bəlkə də başımız qarışan kimi

Qapımıza qoydular “keçi başı”nı?!

“Şeytandan dönmələr” dedilər bəlkə,

“Yazını pozurlar” – ...ötdülər bəlkə?!

Hazırlaş, qazmağa gəlirəm, qoxu,

Mənim kürəyimə, sənin boynuna,

Bir feil yazmağa gəlirəm, qoxu...

Başqa şey gəlməsin vallah eyninə.

Gəlirəm yanına möhtəşəm qadın,

Cəngəl sevgilərin ağ bayrağıyla! –

Axur kürəyilə, əl orağıyla...

Üstündə bir mənim, bir sənin adın.

2017

Koxanəbidən məktub

Burada gülüşlər hədəf taxtasına çönüb,

Gülən pəncərəsindən vurulur Koxanəbidə.

Kişmişi gülüşlər də elə daxma-daxma sönüb.

Başımız ayazısa,

şaqqanağa da qoyacağıq abidə.

Sir-sifətimiz şəhid nəşindən hamilə qalır,

and olsun.

Nökərlər gülüşdən də tutur bala.

Gülüş dərib göndərin yanağınızdan,

başınıza dönüm.

Erkək-dişi göndərin, bəlkə çoxala...

Göndərin,

Gülüşünüz avand olsun.

Bütün günahlar zirvəyə aparır

Səhv elə, ey dost, qazancı sənindir.

Ağrısı görk olan sancı sənindir.

Bu günə müəllim, sabaha təbib,

Səhvləri öyrədən küncü sənindir.

Səhv elə, ey dost!..

Pafosdan çıxsaq bir az,

Əslində uğur bir köksüz məcazdır.

Bütün günahlar zirvəyə aparır, unutma

Bütün fəthlərin yumurtası bir ovuc günah.

Uğurla günahı ağ-qara tutma.

• Tanınmış alim vəfat etdi
• Zəfər haqqında növbəti tamaşa
• Kabuslu ev - Virciniya Vulfun hekayəsi