news-inner
clock09:00 calendar-gray 27 Fevral 2017 view-gray78 dəfə oxunub
view-gray78 dəfə oxunub

Yazıçı aktyorun bığını qoparıb qaçdı – MƏZƏLİ ƏHVALATLAR

Kulis.Az professor İlham Rəhimlinin sənət adamları barədə toplayıb işlədiyi məzəli əhvalatları təqdim edir.

Bığsız olsun

«Səhər görüşləri» televiziya verilişinin çox populyar vaxtı idi. Bu verilişə də əsasən Məhərrəm Bədirzadə rejissorluq edirdi. Orada hər verilişdə bir neçə yumorlu səhnəcik olurdu. Əhməd Orucoğlu bu veriliş üçün «Bərbərxanada» adlı yumoreska yazır və gətirib telestudiyada verir Məhərrəmə. Məhərrəm də səhnəciyi redaktor Emin Mahmudova göstərir. İki nəfər iştirakçısı – Bərbər və Müştəri olan səhnəcik bəyənilir.

«Səhər görüşləri» birisi gün tezdən efirə getməlidir. Təxminən 8-10 dəqiqə olan bu səhnəciyi də ora əlavə edirlər. Məhərrəmə tapşırırlar ki, tez çək, montaj elə, sabah axşama kimi gətir.

Məhərrəm Bədirzadə görür ki, buna bir günə dekorasiya düzəltmək mümkün deyil. Çox götür-qoydan sonra Əhmədlə birlikdə gəlirlər Kommunist küçəsində (indiki İstiqlaliyyət – İ.R.), Xalq Təsərrüfatı İnstitutu (indiki İqtisad Universiteti – İ.R.) ilə üzbəüz bərbərxanaya. Bərbərdən bir saat vaxt istəyirlər ki, səhnəciyi onun iş yerində çəksinlər.

Bərbər razı olmur. Çox yalvar-yaxardan, çək-çevirdən sonra deyir:

– Qardaş, mənim işim doqquzda başlayır, bir müştərim nağdıdı. Yəqin sonrası da olacaq.

Məhərrəm:

– A kişi, sonrası da mənnən Əhməd. İndidən növbə tuturuq. İkimiz da saçımızı vurduracağıq. Bir başı nə qədər vaxta qırxırsan?

Dəllək onların saçlarını nəzərdən keçirir:

– Birini uzağı yarım saata.

Məhərrəm əlini salır cibinə, bir qırmızı onluq çıxarıb verir bərbərə.

– Ala, bu bizim pulumuz. Sənin dükanın sabah bir saat bizim ixtiyarımızda olacaq.

Sabah saat 10-na razılaşırlar. Dəllək deyir:

– Ancaq bir saat, çünki saat 11-ə müştərim var, söz vermişəm.

Məhərrəm sevincək:

– Alə, həri, bir saat bəsimizdi. Əntıqə oldu, Əhməd, getdik.

Səhəri onun yarısında Məhərrəm, Əhməd, operator Abbasağa, qrimçi Sara xanım kəsdirirlər bərbərxananın qabağını. Bir azdan aktyorlar Atabala Səfərovla Ramiz Əzizbəyli də gəlib çıxır. Atabala bərbər, Ramiz müştəri roluna çəkilməlidir.

Abbasağa əvvəlcə küçəni, bərbərxananın girişini çəkir. Keçirlər içəri.

Məhərrəm qrimçiyə deyir ki, Ramizə qalın bığ qoy. O da bığı yapışdırır, iştirakçıların ikisini də qrimləyir. Məhərrəmdən soruşur:

– Məhərrəm müəllim, day mən lazım deyiləm?

Məhərrəm məmnun-məmnun:

– Yox, çox sağ ol, sən gedə bilərsən.

Sara xanım ləvazimatını yığır çantasına və qayıdır telestudiyaya.

Əhməd bir xeyli baxır və Ramizin bığlı olmasına etiraz edir. Məhərrəm də iki ayağını bir başmağa dirəyib dediyinin üstündə durur. O deyir, bu deyir, ara qarışır.

Bərbər saatına baxır:

– Qardaşlar, 20 dəqiqəniz qalıb, ha. Sözümüz sözdür.

Məhərrəm əsəbiləşir:

– Dedim bığlı çəkiləcək, vəssalam. Əhməd, rejissor mənəm, sən yazdın, bəyənildi, indi dur qıraqda də. İşimizə mane olma. Abbasağa, hazırlaş, iki dəqiqəyə başlayırıq.

Abbasağa:

– Qədeş, mən hazıram.

Məhərrəm:

– Onda əvvəlcə ümumi planı çək.

Atabalanın qayçı, daraq, ülgüc və sair qoyulmuş güzgünün qabağını sahmana saldığı kadr çəkilir. Ramiz keçib əyləşir müştəri kürsüsündə. Abbasağa kameranın yerini dəyişir. Ayaqlığı bərkidib, son dəfə gözlükdən kadra baxır ki, hər şey qaydasındadırsa çəkilişə başlasın. Əhməd əyilə-əyilə kameranın altından keçib Ramizə yaxınlaşır. Qəfildən Ramizin bığını qoparıb çıxır bayıra. Məhərrəm də qışqıra-qışqıra onun ardınca... Əhməd üzü aşağı Sabir bağına tərəf qaçır. Məhərrəm də onun dalınca. Arxadan bərbərin səsi eşidilir:

– Mən heç nə bilmirəm, on bir tamamda dükanı boşaltmalısınız.

Məhərrəm deyinə-deyinə geri qayıdır. Abbasağaya:

- Cəhənnəmə ki... Çək onu bığsız.

Məhərrəm Bədirzadə “Azdrama” truppasını necə aldatdı?

Səyavuş Aslan maşinisti ağacla niyə döydü?

news-inner-user

14066 məqalə

Oxşar xəbərlər

Xəbər lenti

Vaqif Səmədoğlunun qızı: “Atam evlənəndə hönkür-hönkür ağladım” – Müsahibə
21:01 28 Yanvar 2020
Azərbaycan filmi Almaniya festivalında iştirak edəcək
18:49 28 Yanvar 2020
Şairin kitab sərgisi açılıb
18:20 28 Yanvar 2020
Aydınlanmanın ağlagəlməz ən qısa yolu: Vipassana
17:54 28 Yanvar 2020
Türkiyəli Nobel mükafatçısının evi muzey olacaq
17:30 28 Yanvar 2020
Azərbaycan Dövlət Akademik Musiqili Teatrı fevral repertuarı
16:50 28 Yanvar 2020
Akademik Milli Dram Teatrında yeni tamaşanın məşqlərinə başlanılıb
16:04 28 Yanvar 2020
“Mənəm, mən...” tamaşası növbəti dəfə səhnədə
15:39 28 Yanvar 2020
Mərhum yazıçının son müsahibəsi: "Azərbaycana gəlməkdə səhv elədim"
15:02 28 Yanvar 2020
Ruslan Mollayevdən qısa hekayə: Tədarük
14:33 28 Yanvar 2020
“Ulduz" jurnalının yeni sayı
13:57 28 Yanvar 2020
Aşıq Alının kitabı çap olundu
13:19 28 Yanvar 2020
Teoman tükəndiyini elan etdi
12:40 28 Yanvar 2020
İçkinin məhv elədiyi böyük Azərbaycan aktyoru – Maraqlı faktlar
12:05 28 Yanvar 2020
Gördüyümüz Nizami ağcabədili axund imiş – Maraqlı fakt
11:35 28 Yanvar 2020
Evdən qaçan qadınlar - Sevinc Elsevər yazır...
11:02 28 Yanvar 2020
"Qoca qartalın əbədi uçuşu" adlı sənədli film təqdim olunacaq
10:25 28 Yanvar 2020
Kobe Bryantın Paulo Koelyo ilə yazışması yayıldı - Kitab yazacaqdılar
10:23 28 Yanvar 2020
Xeyrəddin Qocanın 70 illiyi qeyd ediləcək
09:49 28 Yanvar 2020
Təşəbbüs - İsi Məlikzadənin hekayəsi
09:00 28 Yanvar 2020