news-inner
clock15:15 calendar-gray 25 Noyabr 2016 view-gray568 dəfə oxunub
view-gray568 dəfə oxunub

Yad kişilərin ağzında tüpürcək köpüyü-YENİ ŞEİRLƏR

Kulis.Az Rəbiqə Nazimqızının yeni şeirlərini təqdim edir.

Qadın etirazı


Biz yatağı qanla suvarılmış
adamların məmləkətində doğulduq,
Atamıza duz yükü olduq,
Anamıza un çuvalı.
Qardaşımıza acı,
Bacımıza qəm ortaĝı..
Yad kişilərin ağzında tüpürcək köpüyü,
Qonşu qadınların ağzında söz olduq...
Ocaq qalayanda əlimiz yandı,
Uşaq bələdik, qolumuz...
Sevəndə adımızı İsmət qoydular,
sevməyəndə qismət...
Biz adam olmadıq, quzum,
Bizdən qadın düzəltdilər
Yatağı qanla suvarılmış adamların məmləkətində...


Nəğmə

çəkimi gözlərin azaltdı..
yaşımdan 19 qaldı...
ağlımdan heç nə...

bəlkə keçib getdi..
bəlkə sevib getdin...
bəlkə də sevməyə...

bir qaşıq ümiddin...
bəlkə də qayıtdın...
nə zaman unutdun...
xatırla...

getmisən ölüyəm
bir torba sümüyəm
arxamca sürünən
pişiyə...


Saqinamə

Hər gün sözə susayarıq,
şeir üfürərəm közərən işığa
bir turş misra
uzadarsan masanın üstünə...
Sonra...
sürahi sözlərin saqi olar
qədəh əllərimə

Tarix oxuyarsan yaddaş kitabından,
görmədiyin günlərdən
keçmiş doldurarsan topların lüləyinə...
qalxanlarım qırılar səsinə...
Sonra...
sürahi sözlərin saqi olar
qədəh əllərimə


vida nəğmələri söylərəm –
hirslənib gedərsən...
sabahadək yol çəkərsən
görüşməyə...
hər görüşdə küsüb ataram səni...
gələcəyə....
Sonra yenə...
sürahi sözlərin saqi olar
qədəh əllərimə

***

Yüz çəmən ayaqladım bir çiçəkdən ötrü,
Bəlkə, min qarışqa öldü. Saymadım.
Bütün ləçək fallarında sevinc çıxdı rastıma,
Düzünü yerə sərilmiş saplaqlardan anladım.
Çaylara inad yandırdım körpüləri...
Hara gedirsən-get,
yolun günahımdan keçir...


TEKİLA

Qollarım körpü salır
üzümdəki duz gölünə.
gözlərimi sürüşdürüb
pəncərədə gizlədirəm
səndən.
bütün şəhər görür
ağladığımı..
Könlündən tekila keçir...

ÜÇ FƏSİL YAZ

Mən dəli, sən sərsəm, məst idi havalar,
Saçıma bir şeir asmışdın bu bahar,
Çiçək gətirirdi vərəqə nə səpsəm...
(Lütf elə, qoy qalsın
Pozulmuş sətiri..)

Hələ duman qalır başımda bir azca,
Hələ zaman qalır qapını açmağa
Açarlar ayağın altında sərili...
(Lütf elə, qoy qalsın,
Götürmə bu sirri...)


Bir azdan dənizlər daşacaq gözümdə,
Ayağım altından torpaq titrəyəcək,
Sinəndən ot ətri çökəcək üstümə,
(Lütf elə, qoy getsin
İkimizdən biri...)


ÇİÇƏK ÜÇÜN

Əllərinlə dəyişməyə gəldim, Çiçək.
Saçlarımı kəs, boya.
Bu dəfə dost olma.
Qadın-qadına, insana- insana danışmayaq.
O gecə qoluna girdiyim adamı soruşma!
İlan nəfəsi qarışdı çəmən qoxusuna. Qaçdım.
"keçəcək" suyu süz badəyə,
Hamıda tapılan təsəlli həbiylə ver içim.
Cibimdəki "bilmirəm" yaylığını
ağzımdan çıxan ağrıya tut
sil at!
Şüşələrə toxunub çiliklənən ömürlərdən danış,
"İçib ölmək istəyirəm" deyənlərin qatil olduğunu xatırlat.
Yaşamağı hər kəsdən çox sevdiyimi söylə.
De ki, mənə yalnız ümidlərə düyün düşən saçlarım mane olur.
Qayçıla!
"Sənə layiq deyildi" dərmanı qat
"Hələ hər şey qarşıdadı" boyasına
"Gəncsən, gözəlsən" fırçasıyla
astaca saçlarıma çək
Usta ol, Çiçək,
Dəyiş məni



BİLMƏDIKLƏRİN BARƏDƏ BIR NEÇƏ KƏLMƏ

Deyəcəkdim
Həvvanı necə yoldan çıxardı ilan,
sonra qabıq dəyişdi - tanınmasın.
hansı bazardan almaq olar cənnət almasın -
biləcəkdin -
astarı üzündən gözəl donumun
ətəyindən yapışıb
çıxmaq olar göyüzünə,
ulduzları saymaq olar gözümulu -
deyəcəkdim -
nədən doğur kölgəni sevmək azarı,
çəmən qoxunun sirrini verəcəkdim.
sinəndən niyə ot ətri gəlir -
biləcəkdin -
üzümdən sıxılan ən tünd içki deyil şərab,
yanındadır, yaxındadır, qadın dadır,
öz qabını sındırmaq məsəli yalandı
deyəcəkdim
bilmədin
gedirəm
bir az buğda suyu atarsan
arxamca...

Oxşar xəbərlər

Xəbər lenti

Susdurulan “Qarabağ bülbülü”, Allahverdi Bağırovun yuxusunu qarışdıran döyüşçüsü, göy satan Gülbazə xalanın göz yaşları – Qaçqın yataqxanasından reportaj
09:00 02 Dekabr 2020
“Xəzər” jurnalının yeni nömrəsi işıq üzü görüb
18:55 01 Dekabr 2020
"DokuBaku" festivalında nümayiş olunacaq filmlərin sayı açıqlandı
18:12 01 Dekabr 2020
44 günlük Vətən müharibəsindən sənədli film çəkildi
17:30 01 Dekabr 2020
Sami Yusif Laçınla bağlı paylaşım etdi - Foto
17:07 01 Dekabr 2020
Demə ki, qaçqınsan, yoxdu məkanın... – Şərif Ağayarın Laçın şeirləri
16:50 01 Dekabr 2020
Sevgi məktublarını xanımından gizləyən Məmməd Araz - Maraqlı faktlar
16:00 01 Dekabr 2020
"Babamın məzarına çiçək gətirəcəm ordan" - Laçınlı məşhurlar danışır...
15:09 01 Dekabr 2020
Sovet dövründə poeziya evinə çevrilmiş məscidimiz - Mamayı
14:28 01 Dekabr 2020
Laçında bərpa ediləcək abidələrin sayı açıqlandı
13:49 01 Dekabr 2020
ƏSA Teatrı qələbə münasibətilə sosial çarx hazırladı - Video
13:12 01 Dekabr 2020
Laçınlı şairin atasının sevincdən ürəyi dayandı
12:34 01 Dekabr 2020
Qarabağa böyük köç başlanmışdı – Azər Qaraçənlidən möhtəşəm qayıdış hekayəsi
12:11 01 Dekabr 2020
"Naoborot qızışıyoruz” - Müharibə vaxtı yaranan məşhur ifadələr
11:27 01 Dekabr 2020
Xalq artisti vəfat etdi
10:48 01 Dekabr 2020
Gənc şair Azərbaycanı Makedoniyada təmsil edəcək
10:17 01 Dekabr 2020
Arif Babayev koronavirusa yoluxdu
09:46 01 Dekabr 2020
Daşaltıdan ölüm xəbəri gələn Vüqar – Yeni hekayə
08:57 01 Dekabr 2020
Kukla Teatrı dekabr repertuarını açıqladı
18:56 30 Noyabr 2020
Ukraynada Müslüm Maqomayevə həsr olunan beynəlxalq müsabiqə keçiriləcək
18:24 30 Noyabr 2020