Qazaxıstanın paytaxtı Astanada I Avrasiya Kitab Sərgisi çərçivəsində Beynəlxalq Türk Akademiyasının "Türkologiya sahəsində aktual tərcümə məsələləri" adlı beynəlxalq açıq seminarı keçirilib. Kulis.azın məlumatına görə tədbirdə türk xalqlarının qədim irsini müasir dillərə çevirən türkoloq-tərcüməçilər mükafatlandırılıb.

Dünyanın bir sıra ölkələrinin iştirak etdiyi "I Avrasiya Kitab Sərgisi - 2016" çərçivəsində Beynəlxalq Türk Akademiyasının (TWESCO) nəşrlərindən ibarət stend nümayiş etdirilib. Stenddə türk xalqlarının maddi-mənəvi irsinin tədqiq olunduğu xeyli sayda kitab yer alıb.

Sərginin açılış günündə Qazaxıstanın dövlət katibi Gülşara Abdıxalıkova stendə baxış keçirib və Akademiyanın türk xalqlarının tarixi, mədəniyyətinin tədqiqi sahəsində gördüyü işlərdən xəbərdar olduğunu, bunu yüksək qiymətləndirdiklərini qeyd edib.

Sonra "Türkologiya sahəsində aktual tərcümə məsələləri" adlı beynəlxalq açıq seminarı keçirilib. Akademiya prezidenti Darhan Kıdıralinin moderatorluğu ilə keçirilən toplantıda TÜRKPA-nın baş katibi Jandos Asanov, Azərbaycanın Qazaxıstandakı səfiri Raşad Məmmədov, Macarıstan, Qırğızıstan, Monqolustanın səfir və diplomatları, Türkdilli Ölkələrin Əməkdaşlıq Şurası baş katibini müavini Abzal Saparberkulı, türkoloqlar və peşəkar tərcüməçilər iştirak edib. Tədbirdə tanınmış tərcüməçi-alimlərin məruzələri dinlənilib, qədim türk irsinin öyrənilməsində və türk xalqlarının inteqrasiyasında tərcümənin rolu barədə fikir mübadiləsi aparılıb.

Seminar zamanı TWESCO tərəfindən nəşr olunan və türk dünyasında tərcümə sənətinin inkişafına töhfə verən iki elmi nəşrin təqdimatı da keçirilib. Türkologiya sahəsində əhəmiyyətli əsərlərdən sayılan “Qədim Türk Lüğəti” və qırğız alimlərinin hazırladıqları "Altay Respublikasındakı Qədim Türk Yazıları Albomu" oxuculara təqdim edilib.

Sonda türk dünyasının tərcümə sənətinə böyük töhfələri olan tərcüməçilər mükafatlandırılıb.

Qeyd edək ki, I Avrasiya Kitab Sərgisi 3 gün davam edəcək.

• "Azğın, vəhşi gileyin səsi qəlbini dəlir..." - Bodlerin "Şər çiçəkləri"ndən seçmələr
• Sezai bəy - Orxan Kamalın hekayəsi
• "Qızıl ayı" mükafatlı film əsasında serial çəkiləcək