news-inner
clock20:00 calendar-gray 27 Oktyabr 2016 view-gray294 dəfə oxunub
view-gray294 dəfə oxunub

O, ölə bilməz... - Zərdüşt Şəfinin hekayəsi

Kulis.Az Zərdüşt Şəfizadənin "Bu yuxudu" hekayəsini təqdim edir.

“Bu yuxudu, yuxu...” - dedi öz-özünə. İnanmaq istəmədi, inanmaya bilmədi. Özünü divardan-divara çırpdı. Qışqıra-qışqıra başını divarlara vurdu.

Qarşısında dayanan adamlar nəzərlərini yerə dikmişdilər. Hamısı ağlayırdı. Hamı məyusdu. Heç biri onun çırpınışlarına baxmadı, heç biri onu tutmaq istəmədi. İstədilər ki, o, başını divardan-divara çırpa-çırpa olanları yuxuya çevirsin. Çevirdi də.

“Yuxu, yuxudu bu.. - dedi və gülməyə başladı - bu yuxudu... - göz yaşları içində gülərək küncə sıxılmış anasını qucaqladı - ana yuxuduye bu, Allah haqqı... Yoxsa ki, belə şey ola bilməz axı... O, necə ölə bilər? - dərhal da özü-özünə cavab verdi - Ölə bilməz... Başa düşürsən? Yuxuduye... Sən ki, onu tanıyırsan, o axı mənim dostumdu, yaxınımdı... Başa düşürsən də, hə? Yuxudu bu, biz də yuxudayıq. Amma oyananda nə qədər güləcəm...”

Sevindiyindən bilmədi neyləsin, anasının yanaqlarından öpdü. Başını divara çırpa-çırpa gülümsədi. Ağladı. Güldü.

“Yoxsa... Yoxsa Allah bizi görür axı, eləməz belə şey, vallah eləməz... O, ölə bilməz... Axı Allahı hamımız tanıyır, o, belə şey eləməz... O, məni qatil eləməz, bu yuxudu...”

Qarşı qapıdan uzun ağ xalatlı biri çıxdı. Eynəklərində Əzrailin əksi qalmışdı.

“Hə, doxtur, hə... Bu yuxudu hə... Yoxsa eynəyində Əzrail nə gəzir? Gördün necə tapdım... Biz yuxudayıq...”

“Başınız sağ olsun.” - dedi həkim, gözlərini yayındırdı.

Elə bil belini qırdılar. Elə bil əl-qolunu kəsdilər. Elə bil onu öldürdülər. Təsadüfən dostuna girən bıçaq ona girdi elə bil. Bəlkə də təsadüf deyildi, yəqin deyildi. Bəlkə də dostu özünü ona atılan bıçağın qarşısına qəsdən atmışdı, bəlkə də yox.

Özünü divardan-divara çırpdı. Sonra dostunun anasını gördü: üzünü əlinin arasında basdırmaq istəyir, ya da gözlərindən axan suyla əlini sulayırdı.

“Burax, burax onu - istədi əllərə desin - burax onun üzünü, bu yuxudu, həkimin eynəyindən Əzrail baxırdı, görmədin? Bu yuxudu, hara ölür, bir bıçaqdan heç adam ölər, kinolara baxmırsız? Orda neçə bıçaqdan sonra sağ qalanlar olur, hansı filmdə görmüsüz bir bıçaqla adam ölə?” - deyə bilmədi, dili tutulurdu.

Qadın onun üzünə baxmırdı, qadın ona baxmırdı. Onu görmək istəmirdi.

Yenə istədi desin: “Baxın, ay xala, dilim tutulur, həmişə yuxuda belə olur, məndə tez-tez olur, baxın, danışa da bilmirəm... Bu yuxudu...” - yenə deyə bilmədi.

Ortada çığıra-çığıra fırlanır, yavaş-yavaş halsızlaşırdı.

Ona inanan yoxuydu. Hamı özünü gizlədirdi, hamı üzünü gizlədirdi, hətta bir qapıdan çıxıb o birinə gedən və gedə-gedə kimlərinsə həyatlarını və ölümünü öyrənib bilən xadimələr, tibb bacıları da.

Yapışdı birinin qolundan: “Qurbanın olum... de ki yuxudu. - qızsa susurdu - gözlərinə, qara gözlərinə qurban, de, yuxudu, deyil?”

Nəhayət ki, susdu. Bu zəhrimar yuxu başlayandan elə hey danışırdı. Qız başını qaldırıb ətrafdakı adamlara baxdı. Onun anası, dostunun anası, qardaşı, atası da deyəsən gəlib çıxmışdı.

Hamısına baxdıqdan sonra nəhayət ona baxdı.

“De, qurbanın olum... Düzünü de...”

“Yuxudu...” - dedi qız və biləyini onun əlindən almaq istədi. O isə buraxmadı.

“Onda hara tələsirsən, - dedi qıza, - bu ki, yuxudu, heç nə olmayıb, o ölməyib, biz yoxuq, biz yuxunun şəkilləriyik...”

“Xəstəyə iynə vurmalıyam...”

“Axı yuxudu...”

“Olsun da... Yuxuda da insanların köməyə ehtiyacı var. Burax məni...”

Anası da dilləndi: “Burax qızın qolunu...”

Elə bil əlindən oyuncağını alırdılar. Son dəfə əmin olmaq istədi.

“Yuxudu, hə?”

“Hə...”

“Gəl öpüm ey səni... Quzu kəsərəm...”

Bir göz qırpımında qızı yanağından öpdü. Qız qaçmasaydı hələ bəlkə dodağından da öpəcəkdi.

“Eşitdiz, gülümsəyin, gülümsəyin cənablar, bu yuxudu... Qorxulu bir yuxu... Bir azdan oyanacam... Dostuma zəng edəcəm ilk olaraq... Deyəcəm sağsan? Həmişəki kimi, deyəcək, hə... Deyəcəm ola bilməz, bu gecə ölmüşdün axı... Yuxuda...”

Dəli kimi gülməyə başladı.

Birdən pəncərəyə doğru getdi. Bir göz qırpımında özünü pəncərədən çöldə tapdı. Altıncı, ya yeddinci mərtəbə idi. Aşağıda bir sürü insanlar onun bu yuxusundan xəbərsiz gəzişirdilər. Bu yuxuydusa da, yaman kütləvi yuxuydu.

Qohumlar birdən ayılmışdılar, elə bil onu tutmağa çalışırdılar. Ətrafdan ona doğru hərəkət edən insanlara çımxırdı: “...İndi, indi hamımız oyanacıq... Xoşbəxt olacıq... Sevinəcik ki, ağlamalı bir şey yoxdu... Elə sevinəcəm... Yastığımdakı göz yaşlarıma baxıb güləcəm... Adam belə ağlamaz deyəcəm... – ağlayırdı – adam belə ölməz deyəcəm...”

Əlini çərçivədən ayırdı. Həmişə belə olur. İlk anda elə bilirsən, hər şey sona çatdı. Son anda nə isə yetişir imdadına. Axı yuxudu. Axı yuxuda heç nə həqiqət deyil. Axı yuxu Allahın ağ-qara qələmlə çəkdiyi şəkillərdi. Axı Allah onu tanıyır, qoymaz onu ölməyə. Hətta yuxu deyilsə də, o, hər şeyə qadirdi, tez zamanı saxlayar, hər şeyi geri qaytarar və reallığı yuxuya çevirər, sonra buraxar zamanı. Birdən ayılarsan ki, bu yuxuymuş, sənsə onu həqiqət bilirdin.

Yerə çatdı. İndi qanadları çıxacaq, ya da həmişəki kimi dimdik ayaqları üstə düşəcək. Ya da indi işıqlar sönəcək və film yarımçıq qalacaq, o gözlərini açanda görəcək ki, yuxuda ağlayıb... Güləcək...

İşıqlar söndü. Kadrda son görüntü masmavi səma və bir neçə ağ bulud oldu. Kadrda son səs: “Özünü atdı...” - dedi.

Gülümsəyə də bildi son anda - bu yuxuydu...

news-inner-user

20044 məqalə

Oxşar xəbərlər

Xəbər lenti

Tərəf müqabili ilə üçaylıq sevgi yaşayan, evi olmadığı üçün qarajda qalan, iki dəfə intihara cəhd edən Xalq artisti
21:00 28 Sentyabr 2021
Vətən Müharibəsi qəhrəmanı haqqında film çəkilir
18:50 28 Sentyabr 2021
Bakı Beynəlxalq Kitab Sərgisində nələr olacaq?
18:15 28 Sentyabr 2021
Sahilənin Sənanı və "Şeyx"i
17:28 28 Sentyabr 2021
Onun geridəqalmışlığı mükafata layiqdir – Aqşin Yenisey yazır
16:44 28 Sentyabr 2021
Filmimiz beynəlxalq festivalın ən yaxşısı oldu
15:59 28 Sentyabr 2021
Üzeyir bəyə tələ quran erməni musiqiçilər - Tarixin gizlinləri
15:10 28 Sentyabr 2021
Baydarovun filmi nufuzlu festivalda - Foto
14:22 28 Sentyabr 2021
Osmanlı sultanlarının portretləri satışa çıxarılacaq
13:35 28 Sentyabr 2021
Qarabağ mövzusunun dələduzları – Şərif Ağayar yazır...
12:54 28 Sentyabr 2021
Əri ola-ola Telman Adıgözəlov ona evlilik təklif etdi, kişi aktyorlarımızın arasına qısqanclıq davası saldı – “Bəyin oğurlanması”nın məşhur siması kim idi?
12:09 28 Sentyabr 2021
Ölməyə vətən yaxşı... - Onlar niyə qürbətdə öldülər?
11:32 28 Sentyabr 2021
Nazirlikdən bəstəkara cavab: “Beş min verdik, götürmədi” - Özəl
11:01 28 Sentyabr 2021
Məşhur şair Fərid Hüseynin tərcüməsində - Yeni kitab
10:25 28 Sentyabr 2021
Universitetin dördüncü mərtəbəsindəki it – Yeni hekayə
09:01 28 Sentyabr 2021
"Anam deyir ki, o, ayaqqabılarını çıxarmaq istəyəndə, birinci katib qoymadı" - Səməd Vurğunu belə görməmisiniz - Foto
21:02 27 Sentyabr 2021
Tağıyevin heykəli yaxın günlərdə açılacaq - Rəsmi
18:55 27 Sentyabr 2021
Məşhur ingilis tədqiqatçının Nizami yanlışı – Vilayət Quliyev yazır...
18:20 27 Sentyabr 2021
Yazıçıların qaranlıq həyatı kitab oldu – Yeni nəşr
17:40 27 Sentyabr 2021
Müharibə xəbərinə özünü itirən taksi sürücüsü
16:53 27 Sentyabr 2021