Şeirlər vardır, yazıldığı gündən dillərə, könüllərə düşən... İllər ötüb keçsə də yaddaşın bir küncündə, dilin ucunda qalan...İnsan yaşa dolsa da heç zaman qocalmayan, hər zaman öz estetik təravətini saxlayan, vəsf etdiyi duyğular qədər təmiz, saf və əbədi olan şeirlər... Kulis.az-ın “Günün şeiri” layihəsində bu şeirlər yada salınır. Bu ölməz şeirlərə yeni könüllər, yeni könül evləri, yeni sevgilər tapmaq üçün... Şeirləri çoxaltmaq üçün...
Şəhriyar Del Gerani. Başqa sabahlarda oyanmaq.
nəsə,
başqa cür olmalıdı nəsə.
başqa günəşlə açılmalı səhərlər…
başqa gecələrdə içməli,
başqa odalarda sevişməli,
başqa qollarda üşüməliyik...
mütləq dəyişməlidi nələrsə.
məsələn,
başqa adam üçün darıxmalı,
başqa ümidlərlə yaşamalı,
başqa içkilərlə sərxoş olmalıyıq...
tanış adamlarla,
tanış küçələrlə
tanış dinlərlə də
tanrını asan tapırıq.
asan dönük çıxırıq
tanış günahlarla da…
nəsə
başqa dünya olmalı
tanış olmasın günahı
tanış olmasın allahı
tanış olmasın qadını...
nəsə
başqa ömür olmalı
tanış açılmasın sabahı…
sən də gec olmadan dəyişməlisən
nəsə,
başqa cür olmalısan mütləq.
ya da
mən tamam başqasına vurulmalıyam…
nəsə
başqa cür olmalıyıq necəsə…
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Ana səhifə
Reels
Yazarlar
Xəbərlər