Kulis.az Sevda Sultanovanın "Mətbəx şeirləri" adlı silsilə şeirlərini təqdim edir.

Ölüm xəbərini alanda

nə döyüşdəki şücaətlərini

nə ləyaqətli ömür yaşadığını xatırladım...

xatırladım ki:

yaxşı sevgili deyildin yataqda...

amma çox möhtəşəmdin

Kerberi məğlub edən Herakldın

Troyanı lərzəyə salan Axillesdin

Ədaləti qoruyan Prometeydin

Çox... çox möhtəşəmdin...

Amma infantilcə kişi mərkəzçiydin

sevgidə

komplekslərindən boğulurdum

yataqda...

Voloşinin şeirlərini deyərdin

“İngilis pasiyenti” filmini sevərdin

ət xörəklərini xoşlardın

əla qəhvə dəmlərdin

dadı hələ damağımda...

məni cəngavərcə qucaqlardın...

ana bətnində yox,

Mikelancelonun əlləri ilə yaranmışdın

Daviddən əzəmətliydin...

Amma... neyləmək olar

məni hiss edə bilməməyinlə

qalacaqsan xatirimdə...

***

Antonioninin kinematoqrafiyası kimidir

Sənin sevgin:

Qeyri-müəyyən, soyuq...

Nə zavyazkası var, nə kulminasiyası,

Konflikti müəmmalı,

Razvyazkasına ümid yox...

Bir az da monoton, yorucudur sevgin

Sonu görünməyən imitativ kino planları kimi...

Hərdən də

beşamel souslu makaron dadır

sevgin

pis xolesterini çoxaldır...

Qısası,

Nə turşməzədir, nə açı

Nə duzludur, nə şit

Bilinmir nədir

Çünki... çox spesifikdir

****

Hər səhər ərinə

Qəlyanaltı hazırlamaqdan yorulmusansa

kiçik qisaslar al

ruhlanmaq üçün

Bressonun qisasçı Elenini xatırla...

qaynanmamış çay ver, məsələn...

Ərin monotondursa

onun bir Kassavetes olduğunu düşün

beləcə, birtəhər aç səhəri.

Bu da köməyə gəlməsə,

Marko Ferrerinin “Böyük tıxacı”yla

təsəlli tap...

Bəlkə onda anladın ki,

ekranda gördüyün kişilər

daha faciəlidir...

meşşan, acgöz Marçellodan daha insandır,

əli qabarlı,

yorğunluqdan səni sevə bilməyən ərin...

Və o,

hər gecə sənin bu ləçər,

ağrılı istəklərindən xəbərsiz uyuyur

***

Yorğun mətbəx qadın -

Qazanın yağını təmizləməyin

Yataqda çevik olmağın çətindir

süst halınla...

bu yorğunluqla

“Şindlerin siyahısı”nda

çəkilə bilərsən ancaq

• “Tanrının Zirehi: Ultimatum”un Bakı mərhələsi - Ceki Canın Azərbaycanda ilk ekran işi
• "Ağıl və dərrakə hisslərin könüllü qullarıdır..." - Alman mütəfəkkirdən sitatlar
• Azərbaycan Kinematoqrafçılar İttifaqının iclasından DANIŞAN FOTOLAR