Mən özündənrazının, eqoistin yekəsi- Qismətin 33 yaşı

Mən özündənrazının, eqoistin yekəsi- <span style="color:red;"> Qismətin 33 yaşı
15 mart 2019
# 13:48

Bu gün tanınmış şair Qismət Rüstəmovun doğum günüdür. Kulis.az bu münasibətlə şairi təbrik edir və onun “Klassika məşqləri-XX” şeirini oxucuların diqqətinə çatdırır.

Gözlərindən öpərəm, dodaqlarından sənin,

Şirin sözlər asaram qulaqlarından sənin,

Saçını oğurlayıb daraqlarından sənin,

Saxlayaram cibimdə, gizli-gizli qoxlaram,

Yandıraram gecələr, gəlirsənmi yoxlaram...

Əllərindən tutaram, biləyindən öpərəm,

Saçlarının gül qoxan küləyindən öpərəm,

Məni müqəddəs bilən ürəyindən öpərəm,

Öpərəm ki, biləsən mən müqəddəs deyiləm,

Nə var məndən qaçmağa, mən ki qəfəs deyiləm...

Qırmızı kəmturş şərab badələrə süzülər

Zarafatlar uzanar, ürəyimiz üzülər...

Barmaqlarım tələsər, düymələrin çözülər,

İçimə bir od düşər, titrəyər ayaqlarım,

Süd yolunda dincələr qurumuş dodaqlarım...

Ürəyimin parası, gözümün bir tikəsi,

Məni yaman qorxudur dinməmək təhlükəsi.

Mən özündənrazının, eqoistin yekəsi,

Sən zəriflik tanrısı, qadının ötəsisən

Bütün xoş şeylər kimi səndəmi bitəsisən ?

# 5530 dəfə oxunub

Oxşar xəbərlər

# # #