news-inner
clock10:33 calendar-gray 28 Aprel 2016 view-gray160 dəfə oxunub
view-gray160 dəfə oxunub

Günəşi söndürüb - ŞEİRLƏR

Kulis.az gənc şair Faiq Hüseynbəylinin yeni şeirlərini təqdim edir.

Devolvasiya

İngilis dilində oxudular
yasin surəsini
Manatın ölümünə.

Manatın göz yaşları
salamladı
ölümqabağı öz əcəlini.

Məzənnə adı sürüşüb düşdü
həqiqətin ayaqlarına.

Kredit ödənişləri
üsyana qalxdı
çarəsiz məhbus kimi.

Bank borcları üzüqara qarşıladı
gələn qonaqları.

Dükanların qapısındakı qıfıllar
yeni qiymətlərə ağı deyir.

Köhnə tariflərə əlvida dedi
vitrinlər.

Pozuldu Nyutonun üçüncü qanunu:
Təsir əks təsirə bərabər olmadı.

Ceyran belinə qalxdı
Məmulatlar...

Hələ də səngimək bilmir
Manatın ölümü haqqında məlumatlar.

Tolerantlıq

Yer kürəsini öz üzərində saxlayan ağaclar
Yarpaq-yarpaq salam verir sonbahara.
Budaq-budaq təzim edir
arzuların bitdiyi məkanda
öz Tanrısına.

Günəşi söndürüb gələcəyəm yanına, İlahi.
Hələ ki, kor baxa bilmirəm işığa.
"Mən"ləri, "Sən"ləri silmişəm misralarımdan,
Dünyanın bircə xilası var, İlahi,
Ya mən ölməliyəm,
Ya sən sevməlisən.

Sevgi yolunda ölmək
Klassik bədənidi,
Köhnə ruhdu.
O zaman Füzulinin əlləri qəzəl idi...
O zaman sevgilər də gözəl idi.

Dünyanı yetim qoyma,
getmə, İlahi.
Sevmək imandan gəlir,
Sevməyi tərgitmə, İlahi!

De ki, bir nəfəs qədər yaxınsan,
De ki, hər şey indi də yaxşıdır.
Ərəb əlifbası ilə
Türk abidələrinə vurduğun
İngilis naxışıdır...

***

Bu da haqq -
Dərisini soydular,
Ətini yedilər,
Sümüklərini tarix muzeyinə bağışladılar
Eksponat kimi.

Daha yuxulara da girmir Qarabağ,
Daha şəhidlər də üz çevirib vətəndən.
Sonuncu dünya müharibəsi gedir
Ruh ilə can arasında -
Qan su yerinə axır bədəndə.
Göz yaşları yağmır,
Vicdanın qara tablosunda.
Çıxış yolu yoxdur
Labirint düşüncələrdən.

Bu da haqq -
Şimaldan cənubacan,
Şərqdən qərbəcən,
Qələmdən sözəcən,
İnsandan Allahacan
yandırdılar imanını...

***

Ay işığında çimir
səhra fikirlər.
Dağ bildiyim adamlar
Dağ üstə dağ çəkdilər.
İllərlə kərpic-kərpic
hördüyüm xəyalları
bir göz qırpımında sökdülər,
yerində park tikdilər.

Daha ümidsiz günlərin
çırağı sönüb.
Daha möcüzəyə inam qalmayıb.
Ehey, cəllad, sən
edam kötüyünə qoymusan
Əlahəzrət Sözün başını.
Hələ də qanla yuyur
tarix öz yaddaşını.

Siyasət meydanında
can verir həqiqət.
Şam kimi yanır neft ölkəsində
ağzına daş basılan Söz.
Ayə-ayə günaha batır təriqət.

Neft kəmərini belinə dolayan vətən,
Nağıllarındakı quyularından qaz çıxır.
Səfalət utanır adından.
Od qiymətinin üzərinə
su çiləyir kasıb baxışlar.

Kilsələrə sığınır
ingilis atadan,
rus anadan
doğulan azadlıq.
...və bir daha boy atmayacaq
beşikdə boğulan azadlıq.

The end

Tanrı bir roman yazır,
Dərin-dərin dənizlərdən.
Tanrı bir roman yazır,
Qayım-qədim dərələrdən,
düzlərdən.
Bir əsər yaranır səslərdən,
Bir əsr yaranır sözlərdən,
Sirli-sirli gecələrdən, gündüzlərdən.

Tanrı bir roman yazır,
İnsanın taleyindən,
Musanın taleyindən,
İsanın taleyindən,
Olumundan, ölümündən...
Çarmıxa çəkilən,
Gözləri tökülən
həqiqətdən.

Tanrı bir roman yazır,
Günahları ucbatından
cənnətdən qovulandan,
Cəhənnəmi bu dünyada yaşayandan,
Tanrı bir roman yazır,
Çiyinlərində mələk yükü daşıyandan.

“Dünya” adlı romanına
Son cümləni yazır Tanrı:
“The end”...
Və qiyamət başlayır.

Nidayla basdırın

Torpaqla, suyla pak edin,
Odla, havayla basdırın -
Məni qədim şahlar kimi,
Qalxanla, yayla basdırın.

Ey gülab qatan, ətrimə -
Məst ol misrama, sətrimə.
Kimsə dəyməsin xətrimə,
Nazla, ədayla basdırın.

Aşkar olar nələr, nələr,
Qəmlə dolar piyalələr...
Ulduz-ulduz kəcavələr...
Günəşlə, Ayla basdırın.

Ruhumu sözdə axtarın,-
Bakirə qızda axtarın.
Kamanda, sazda axtarın,
Düyünlə, toyla basdırın.

Yar olmayan hər yar ilən,
Mənəm, gedən rüzgar ilən.
Bu əhd ilən, ilqar ilən,
Eşqə vəfayla basdırın.

Mən asiyəm sirr səsinə,
Titrəyir göy-yer səsinə.
Qulaq verin Sur səsinə,
Bu son nidayla basdırın!

Amma...

Qış ötsə, qar ərisə,
Yaz olsa, nolacaq ki?
Alın yazım yenidən
Yazılsa, nolacaq ki?

Nə dəyişər həyatda?-
Hərf eyni, say eyni.
İl həmin il olacaq,
Gün həmin gün, ay eyni.

Yenə gec gələcəksən,
Göz yaşı, Yağış və Yol...
Heç nə dəyişməyəcək,
Mən mən olum, sən sən ol.

Yenə həmin taleyi
Bu Faiq yaşayacaq.
Başqa cür ola bilməz,
Amma, lakin və ancaq...

news-inner-user

17126 məqalə

Oxşar xəbərlər

Xəbər lenti

Ukrayna Milli Kitabxanasında Azərbaycan guşəsi açılacaq
18:31 27 Noyabr 2020
Qayıtdı gülləri yığıb başına, vətən gülşəninin Xarı bülbülü! – Yeni şeirlər
17:44 27 Noyabr 2020
Tələbənin universitetdən qovulması haqlı qərardırmı?
17:09 27 Noyabr 2020
"Qarabağ Azərbaycandır" adlı kitab nəşr olundu
16:34 27 Noyabr 2020
Rejissorumuzun da iştirak etdiyi festivalın qalibləri elan olundu - Siyahı
15:53 27 Noyabr 2020
Nənəsini yemək üstündə ağlatdı, xəstəliyinə görə yardım istədi, işdən çıxarılan gün həyat yoldaşı öldü – Məşhur diktordan maraqlı faktlar
15:11 27 Noyabr 2020
Məşhur Meksika filmlərinin ssenari müəllifi vəfat etdi
14:31 27 Noyabr 2020
İşğaldan azad olunan Xanabert qalası
13:53 27 Noyabr 2020
"Anamın kitabı" filmi gəlir - Yaxında
13:11 27 Noyabr 2020
Mənə ölümümdən yol verin... - Ötən gün dünyasını dəyişən şairin şeirləri
12:31 27 Noyabr 2020
Onlayn dərsdə gülməli vəziyyətə düşən müəllimlər
11:50 27 Noyabr 2020
Qorxu bilməyən işçimiz - Elçin yazır...
11:10 27 Noyabr 2020
Lalə Məmmədovadan duyğu dolu etiraf yazısı: “Hamınızı aldatdım!”
10:28 27 Noyabr 2020
Mirzə Cəlil haqda yeni kitab çıxdı – Dərs vəsaiti kimi təsdiq edildi
09:54 27 Noyabr 2020
Onsuz yaşaya bilmərəm - Bircənin romanı
09:00 27 Noyabr 2020
Tanınmış şairə vəfat etdi
21:10 26 Noyabr 2020
Pənahəli xanın dağıdılmış imarəti
18:37 26 Noyabr 2020
Müvəqqəti komendantlıqlar üzrə iclas keçirildi
17:49 26 Noyabr 2020
Nə yaxşı görüşdük, nə yaxşı yenə - Ən gözəl Kəlbəcər şeirləri
17:01 26 Noyabr 2020
Döyüşçü oğlunu ağladan səbəb - Hekayə
16:17 26 Noyabr 2020