Kulis gənc şair Ruslan Dost Alinin şeirlərini təqdim edir.

Göylərin kölgəsindəyəm,

gün də düşmür buralara...

Deyəsən, mən doğulandan

bəndə düşmür buralara...

...Adamları yoxa çıxıb

bu dünyanın, ay Allah!

Yu, aparaq basdıraq,

yu dünyanı, ay Allah...

Göy üzünü toz basıb,

bəxtimi bir gic yuxu...

Alın yazımı tez-tez,

şerimi gec-gec oxu...

Məni gizli sevənlər,

qoy ağlasın yağışda...

Buralar mənlik deyil,

mən gedirəm,

bağışla...

***

Dünənki tək qoy olsun,

məni bu gün də görmə...

Yuxuma da gəlmə heç,

məni bu gündə görmə...

...Gözümüzü açmayaq,

gözümüzdən düşərik...

Güzgüyə də baxma heç,

qorxuram görüşərik!

...Bir qara kölgəsi var,

çəkildəndi əllərim...

Divardan şəklin düşmür,

şəkildən də əllərim...

...Dörd divardı, bir də mən,

nə mey qalıb, nə badə...

birdən yenə...

yadıma

düşərsən ha, nə badə..!

***

Durum, öpüm, qucaqlayım,

bağrıma basım özümü...

Havam çatmır, bir kəndir hör,

havadan asım özümü...

Nə var ki, bu yer üzündə,

nə var göyün üzündədi...

Allahla aramızdakı

divar... göyün özündədi.

Onsuz da bu dünya

beş-üç günlükdür deyə, gedirəm.

deyirlər, torpağın altı

tünlükdü, göyə gedirəm...

...Anam, bu şerə adımı,

icazə versən, verərəm...

Dur, gətir dualarını,

Allahı görsəm, verərəm...

***

Bu pulun olmayan vaxtı,

derəm, noola, bircə dəfə

yeyib-içəsən, deyələr

hesabı şeirnən ödə...

Ömrün-günün qara vaxtı,

şeiri bir bəyaz boya san...

Bircə səhər üzün gülə:

məktəbə gedən oğlunun

cibinə şeir qoyasan...

Yazmağa həvəsin ola,

nəyəsə yaraya şeir...

Bir ovuc küldən ötəri

özünü yandırmayasan,

basasan yaraya şeir...

Qəm eləmə, qoca şair,

hərf-hərf oxuduğun

alnınsa... yaxşı olacaq!

Fikrimi satışa qoymuşam,

alınsa yaxşı olacaq...

***

Nəsə buralarda həyat başqadı,

hər gün darıxmağım nə gizli, nə sirr…

axı buralarda küləkdən qabaq,

ürəklər adamın içində əsir…

Yağışlar adamın içinə yağır,

küləklər evlərin çölünü tutmur...

Onsuz da uşaqkən dəcəl olmuşam,

bu gecə aləmi qarışdırım, bax…

Söküb şəhərdəki plakatları,

yerinə şəklini yapışdırım, bax..!

Cinayətdirsə də, narahat olma,

onsuz da polislər dəlini tutmur...

Götürüb ən gözəl şeirinnən vurur,

üstündə başqa bir ətir gəzdimir.

Tutqun havalarda, qış aylarında,

noolsun, özüylə çətir gəzdirmir,

Açır ürəyini şeir sevən qız,

bu yağan yağışlar Əlini tutmur...

• 175 ildir dəyişməyən siyasət - Çarın Şuşa həbsxanasına yarıçılpaq atdığı qadın kim idi?
• Cəfəngiyyat, yoxsa dahilik? - Dünyanın ən çətin romanı haqqında
• Həkimlərin oxumağı qadağan etdiyi, "Laçınım mənim"lə dəfn olunan Məhəbbət Kazımov