news-inner
clock11:14 calendar-gray 07 Yanvar 2016 view-gray372 dəfə oxunub
view-gray372 dəfə oxunub

Çaxırı qurtarmış gürcü sufisi

Giya ilə dostluğumun qəribə bir tarixçəsi var. Ailəmizin doğma Başkeçiddən Bakıya köçdüyü vaxtlar idi. Başı bəlalı 90-cı illər.

Bakıda heç cür qərar tuta bilmirdim. Bakının istisi də bir yandan. Lələm kənddən anama kağız göndərmişdi ki, Başkeçid kimi dağ yerinin uşağına birdən-birə Bakı çox çətin olacaq, uşaqları istidən qoru, görsən, ürəkləri təntiyir laxankaya su doldurub suya bas.

Ruhun şad olsun, ay Lələ!

Doğrudan da çox təntiyirdim. Yadıma Başkeçidin təbiəti düşürdü. O, dağlar, dərələr, zümrüd meşələr, güzgü göllər, buz bulaqlar... Dəli kimi darıxırdım. Hər yerdə gözüm Borçalı gəzirdi. Bəzən “Tiflis”, “Borçalı”, “Başkeçid”, hətta “Qazax” və “Tovuz” adı ilə fəaliyyət göstərən mağazalara, kafelərə baxmaqla sanki vətən həsrətimi gidərməyə çalışırdım.

Ay gidərdim ha!

O dövr adi limonad butulkasının etiketi üzərində gözümə dəyən gürcü əlifbası da mənə Vətən deyirdi. Təskinlik üçün gah metro “Neftçilər”dəki Gürcüstan avtobuslarının duracaq yerinə, gah “Borçalı ocağı”nda Kövrək aşıq Muradın saz emalatxanasına, gah da “Borçalı” qəzetinin redaksiyasına baş çəkərdim. Borçalı adının işığına emalatxanaya və redaksiyaya kimlər gəlmirdi – Şamxəlil Nəsiboğlu, Zəlimxan Yaqub, Knyaz Aslan, İbadət Mövləli, Xancığazlı Azər Ziyadxan (çox şey borcluyam ona), Sadaxlı Aşıq Əhməd, Hamamlı Aşıq Vəkil, Gülabı Xındıməmədoğlu, Elmuraz Köçəri və daha kimlər, kimlər. Və əlbəttə ki, onların arasında öz dadı, tamı, koloriti, hətta rəngi ilə seçilən yetim gürcü Giya.

Mən Giyanı bax beləcə Vətən kimi tapmışam. “Vətəndə ikinci vətəndi dostlar” - deyirdi Hüseyn Arif. O Vətən dost məndən ötrü Giyadır. Giya mənim dərvişkönül dostumdur. Giyanı heç bir maddiyyat, heç bir şan-şöhrət bir tük qədər də dəyişə bilməz. Bəzən mənə elə gəlir ki, Giya bu gün o dəyişməzliyinin mübarək əzabını çəkir. Birotaqlı şəraitsiz, darısqal yataqxana küncündə...

Həyat yoldaşı Lamara xanımın vaxtsız itkisinin əzabı da bir yandan. Lamara mövzusunda söz açmayacam. Çox ağırdır mənə. Ağır və ağrılı.

Bu barədə Giyanın daha orijinal və tutumlu ifadəsi var: “Lamarasız çaxırı qurtarmış gürcü kimiyəm”.

Giyanın bəxti gətirən tərəfləri də az deyil. Giyanın hər dəfə etibarda, sədaqətdə imtahandan ağ üzlə çıxan, çox gözəl ruhani bir çevrəsi var. Gözümün qabağına ilk olaraq Qiymət Məhərrəmli, İlham Abbasov, Şamxəlil Nəsiboğlu, Pünhan Şükür gəlir.

Milyonların içindən Vətən deyib, pir deyib, mürşüd deyib mən Akif Səmədi seçən kimi Giya da seçmişdi. Giyayla mənim ən böyük birləşmə nöqtələrimdən biri də bu idi - Akif Səmədlə ortaq dostluğumuz. Hacaloğlu Abbas Abdulla deyirdi ki, kimin kəndini görməyə imkanı yoxdursa, gedib Akifi görsün. Həmin Akif Səmədin ölümünə yazdığı “Akif Səməd haqqı” şeri Giyanın Akifi hamıdan daha dəqiq tanıdığının və Giyanın Akifə hamıdan daha yaxın olduğunun isbatıdır. Şeirin adı hər şeyi deyir: “Akif Səməd haqqı”. Onu da deyim ki, bu haqqı itirənlər az olmadı.

Haqq itirənə haqq haram olsun!

Giyanın nakam şair dostu Fikrət Mursaqulovun ruhu qarşısında öz borcundan necə ləyaqətlə çıxdığının da hamılıqla şahidiyik. Giya o etibarında da hamımıza nümunə oldu. Xüsusən də Fikrətin imkanlı dostlarına...

Bu il Giyanın “kalendarnan” 55 yaşı tamam olur.

Əlli beş - xurcun dolu əlli beş.

Ağrılı, acılı, ağlı-qaralı bir 55.

Nədənsə bu doğum tarixləri, ad günləri, yubileylər məni yaman kövrəldir.

Dostlar, gəlin Giyadan muğayət olaq. Hərdən mənə elə gəlir ki, Giya uşaq kimi əcəlin əlinnən gizlənir. Özü də bu gizlənmək qorxudan deyil insanlara, dostlara, həyata sevgisindəndir.

Əcəba onun kimi biz də onu sevirikmi, sevə bilərikmi, işığımız çatarmı?

Seviriksə gəlin boş qoymayaq gürcü sufisinin şərab buynuzunu. /moderator.az/

Oxşar xəbərlər

Xəbər lenti

Karvan dayandı - Ənvər Məmmədxanlının hekayəsi
16:47 27 Fevral 2021
Azərbaycanlı rəssamın əsəri Türkiyə Prezidentinə hədiyyə edildi - Foto
15:31 27 Fevral 2021
Azərbaycan yazıçıları Sankt-Peterburqun nüfuzlu ədəbiyyat müsabiqəsində - İlk dəfə
14:16 27 Fevral 2021
Məşhur klarnetçiyə ağır itki
13:04 27 Fevral 2021
Özünü efirə satmaq istəyən Xatirə İslam
12:30 27 Fevral 2021
Yazıçımızın Fransada romanı çıxdı
11:29 27 Fevral 2021
"Washington Post" Azərbaycan mətbəxindən yazdı
10:32 27 Fevral 2021
Cəfər Cabbarlı bu filmdə nəyə etiraz edirdi? – “Sevil”in kadrarxası
09:00 27 Fevral 2021
Çağırdım bir qadını qızlıq familyasıyla - Akif Əhmədgildən şeirlər
21:00 26 Fevral 2021
Rübabə Muradovanın qızı vəfat etdi
18:12 26 Fevral 2021
Rəmişdən xəbər var
18:07 26 Fevral 2021
Xocalı soyqırımına həsr olunmuş sərgi keçirildi
17:46 26 Fevral 2021
Bu filmlərə ağlamadan baxmaq olmur - Siyahı
17:01 26 Fevral 2021
58 illik türmə muzeyə çevrildi - Foto
16:21 26 Fevral 2021
Qadın obrazı olmayan əsər
15:40 26 Fevral 2021
Sevgilisi damarlarını doğradı, xanımı ona görə intihar etdi – Azərbaycanlı yazıçının film kimi həyatı
15:00 26 Fevral 2021
Xocalıdan olan yazıçının faciə ilə bağlı hekayəsi - Mətn
14:10 26 Fevral 2021
Okan Bayülgen həbs olunur
13:25 26 Fevral 2021
"Xocalı fəryadı" kompozisiyası təqdim olunacaq
12:37 26 Fevral 2021
Baş qərargah rəisi Xocalıdan yazan jurnalisti niyə güllələmək istədi? – Faciənin gizlinləri
12:10 26 Fevral 2021