Yazıçı Qurban Səidin "Əli və Nino" romanı əsasında romantik dram janrında çəkilmiş eyniadlı ekran əsərinin premyera günü məlum olub.

Buro247.az saytının məlumatına görə, film ilk dəfə 2016-cı ilin yanvar ayında ABŞ-ın nüfuzlu "Sundance" beynəlxalq film festivalında nümayiş olunacaq. Festival 21-31 yanvar tarixlərində Yuta ştatının Park-Siti şəhərində baş tutacaq. "Əli və Nino" filmindən əlavə, festival çərçivəsində 16 bədii, 10 sənədli filmin, uşaqlar üçün 3 ekran işinin premyerası olacaq və 9 filmə baxış keçiriləcək. "Sundance" festivalının təşkilatçısı 1981-ci ildə aktyor Robert Redford tərəfindən təsis olunan Sandens İnstitutudur. Bu institut qeyri-kommersiya qurumu kimi bütün dünyadan olan müstəqil kino və teatr xadimlərinin inkişafı, eləcə də tanıdılması ilə məşğuldur.

Böyük Britaniyanın məşhur "PeaPie Films" kino şirkəti tərəfindən ekranlaşdırılan "Əli və Nino" filminin icraçı prodüseri Leyla Əliyeva, prodüseri Kris Tikyer, rejissoru "Bafta" mükafatı sahibi Asif Kapadiya, ssenari müəllifi isə "Academy Award" mükafatı laureatı Kristofer Hemptondur. Filmdə Adam Bakri, Mariya Valverde, Halit Ergenç, Mendi Petinkin, Konni Nilson, Rikkardo Samariko, Humayon Erşardi, Fəxrəddin Manafov, Əsad Bub, Numan Akar kimi aktyorlar çəkiliblər.

"Əli və Nino" - inqilabdan əvvəlki Bakıda azərbaycanlı gənclə gürcü qızın məhəbbətindən bəhs edir. Romanda 20-ci əsrin əvvəlində dünyanın neft paytaxtının siyasi, etnik və mədəni həyatı təsvir edilir. Əsərdə hadisələr Birinci Dünya Müharibəsindən sonra Azərbaycan, Gürcüstan və İranda baş verir. Müharibə, qırğınlar, iğtişaşlar fonunda Əli Xan Şirvanşirlə Nino Kipianinin məhəbbəti göstərilir.

buro247.az

• Öz filmlərini izləməkdən qorxan rejissor - O, məşhur "Psixo"nu nədən təsirlənərək çəkmişdi?
• Bağırovun qəbulunda təşvişə düşən yazıçı: Onu ölümdən hansı sual xilas etdi?
• “Hər qələmdən bir həyat” adlı antologiyanın təqdimatı keçirildi