“İslamdan qorxuram, amma nifrət eləmirəm”. Kulisin türk mətbuatına istinadən verdiyi məlumata görə bu sözləri “The Guardian” qəzetinə müsahibəsində məşhur fransız yazıçı Mişel Uelbek deyib.

Uelbekin “Təslimiyyət” romanı böyük qalmaqal yaratmışdı. Roman Fransanın islami güclərin nəzarəti altına keçməsindən bəhs edir.

Mişel Uelbek “İslamafobsunuzmu?” sualına “Böyük ehtimal ki, hə, amma “fobiya” sözünü nifrətdən çox qorxu kimi qəbul edirəm” deyib.

“Lire” jurnalına verdiyi açıqlamada “İslam ən axmaq dindir” deyən Uelbek irqçiliyi alovlandırdığı üçün 2002-ci ildə məhkəməyə verilsə də daha sonra bəraət almışdı. “The Guardian”dakı müsahibəsində isə “Hələ də İslamın ən axmaq din olması fikrində qalmısızmı?” sualına belə cavab verib: “Həqiqətən fikirlərimin dəyişib-dəyişmədiyini bilmirəm. Quranı oxumağın adama sakitlik gətirməsi fikri ilə razıyam. Buna görə o vaxt “Quranı oxuduqdan sonra rahatlıq tapdım” demişdim. Bununla belə bu fikri deyəndə kifayət qədər düşünməmişdim. Fakt kimi götürəndə müsəlmanların Quranı oxumaq ehtimalı, xristianların İncili oxumaq ehtimalı qədər azdır. Hər iki dində vacib olan odur ki, bu kitablara kim izah verir. İslamda bu çox açıqdır. ”

“Təslimiyyət” 7 Yanvar tarixində, Məhəmməd peyğəmbərin karikaturalarını çap edən “Charlie Hebdo” jurnalına qarşı edilmiş terror aksiyasından bir neçə saat əvvəl çap edilmişdi. Hadisələrin 2022-ci ildə baş verdiyi romanda universitetlərdə Quran dərsləri keçirilir, qadınlar başlarını örtməyə məcbur edilir və mövcud fransız qaydaları dəyişdirilir.

Bundan sonra müsəlman liderlərdən biri prezident seçilir, qadınları işləməkdən çəkindirilir, beləcə Fransanı işsizlik bürüyür.

Kitab çap olunandan sonra “Ədəbiyyat adı altında İslama qarşı dəllallıq etməkdə və radikal sağçıların siyasətlərinə xidmət etməkdə” günahlandırılan Uelbekin romanı qısa müddətdə Fransa, Almaniya və İtaliyada ən çox satılan kitablardan oldu.

Bəziləri isə Uelbekin bir yazıçı kimi nə etməlidirsə onu etdiyini, dünyaya güzgü tutduğunu deyirlər.

• Məşhur aktyor vəfat etdi
• "Alnıma qoşa güllə çaxsaydı, bundan yaxşı olardı..." - Heydər Hüseynov qarşısında hansı məsuliyyəti daşıyırıq?
• "Vüqar Biləcəri onu Hüseyn Cavidlə müqayisə etdiyinizi bilsəydi..." - Görəsən, meyxanaçılar bizdən inciməz ki?