Mayın 28-də Tiflisdə - Didube Sərgi Mərkəzində Beynəlxalq Kitab Festivalı öz işinə başlayıb.

Kulisin məlumatına görə, həmin gün saat 16.30-da Beynəlxalq Kitab Festivalı çərçivəsində, tanınmış yazıçı Məqsəd Nurun "Şəhər meri" romanının təqdimatı, müəlliflə görüş və imza mərasimi keçirilib. Azərbaycan Bədii Tərcümə və Ədəbi Əlaqələr Mərkəzinin iştirakı ilə "İntellekt" (Gürcüstan) nəşriyyatında gürcü dilində nəşr olunan kitabda tanınmış gürcü ədibləri - Givi Alxazişvili, Şota İataşvili və Georgi Kekelizdzenin rəyləri yer alıb. Romanın tərcüməçisi tanınmış yazıçı və tərcüməçi İmir Məmmədlidir.

Təqdimat mərasimində Azərbaycan və gürcü ədəbiyyatçıları - Quram Odişariya, İmir Məmmədli, Georgiy Kekelidze, Givi Alxazişvili, Kaxa Kudava, Oqtay Kazımov və başqaları çıxışlar edib, Məqsəd Nurun yaradıcılığı haqqında danışıblar. Sonra isə yazıçı Məqsəd Nur oxucuların suallarını cavablandırıb, kitabları imzalayıb. Tədbirdə həmçinin Gürcüstanın və Azərbaycanın KİV nümayəndələri də iştirak ediblər.

Bədii Tərcümə və Ədəbi Əlaqələr Mərkəzinin sədri Səlim Babullaoğlu bu hadisəni belə şərh edib: “Məqsəd Nurun “Şəhər meri “ romanı müstəqillik illərində milli ədəbiyyatımızda özünəməxsus yeri olan və bu illər ərzində yazılmış ən uğurlu romanlardan biridir. Bu gün əsərin Gürcüstanda nəşr olunması fikrimcə olduqca əhəmiyyətli hadisədir. Əminəm ki, əsər gürcü ədəbi mühitində də yaxşı qarşılanacaq, uğur qazanacaq.”

• Kanye Vestdən ad günündə Versal sarayında maskarad və qalmaqal
• Uçuşdan geri qayıtmayan yazıçı - Antuan de Sent-Ekzüperini kim öldürmüşdü?
• "Mən kainatın pıçıltılarını kağıza köçürən qələməm..." - Şandor Vöröş kim idi?