Kulis gənc şair Saqif Zeynalın yeni şeirlərini təqdim edir.

Yağışdan sonra

Burda yağışdan sonra

Yolların çalasına qarmaq sallayar uşaqlar...

Yüklü qayıq kimi

Batar baxışları çirkli yağış sularında...

Qarğıları at kimi minib

Evə çaparlar kor-peşman,

Əllərində boş qablar...

Axşam yuxuda özlərinə balıq bişirər

Əri işsiz arvadlar...

Bir sevda qalıq...

Böldülər ikiyə bizi.

Birimiz şimal olduq,

Birimiz cənub.

Biz ki, ayrılmazdıq heç...

Ayrılmadıq yox!

Sən məndə çox qaldın,

Mən səndə daha çox...

İllər yara saldı ürəyimizə,

Neçə milyon göz yaşardı yaramızda.

Biz heç vaxtı tam bölünmədik

Həmişə bir sevda qalıq qaldı aramızda...

Biri göyümüzü tökdü,

Biri yerimizi sökdü.

Taleyimiz bir sapsız iynəyə qaldı.

Aramızda olan sevgi

Xudafərin körpüsütək

Göynəyə-göynəyə qaldı...

Yağmurlu mesaj

Mart axşamı,

Yağmurlu bir gecə.

Ara-sıra qapını

Külək döyür gizlicə...

Qapının dəstəyində

Bir isti əl yeri yatır.

Hörümçək evin küncündən

Tavanına tor atır...

Həyətdə bir ağac var

Kürdücə çiçək açır.

Titrəyir dodaqları.

Bilir meyvə verincə

Sınacaq budaqları...

İslaq torpaq qoxusu var,

Nəcə də gözəldi torpaq qoxusu!

Bu qədər hiss etməmişdim heç...

Gecə başdan-başa hicran qoxuyur.

Anam yolladığı çaydan bayaqdan

Sobanın üstündə mahnı oxuyur:

"Unut onu,

Unut getsin..."

Pəncərənin tərli,

Şüşə sinəsylə sürünür

Soyuq yağış damlaları.

Bu gecə ən çox xatırlayacam

Ən çox unutduğum adamları...

Mart axşamı,

Yağmurlu bir gecə.

Sənə mesaj yazıram...

Oxuyarsan səssizcə.

• Lezbiyan analardan bəhs edən romanın müəllifi nüfuzlu mükafat qazandı
• "1905-1918-ci illərdə türk əleyhinə çevrilən genosid..." - Yaşar Qarayev Əli bəy Hüseynzadə haqqında nə yazırdı?
• İspaniya "Avroviziya" qaydalarını dəyişmək istəyir