Akademik Milli Dram Teatrının ən çox satılan tamaşası aktyor Fuad Poladovun oynadığı “Şah Qacar” tamaşasıdır. Teatrın mətbuat xidməti Elçin Cəfərovun Kulisə söylədiyinə görə, “Şah Qacar” teatrın ən gəlirli tamaşasıdır.

Əli Əmirlinin pyesinə rejissor Azərpaşa Nemətin verdiyi quruluşda tənha şahın faciəsindən danışılır.

Gənc Tamaşaçılar Teatrının ən satılan tamaşası “Şeyx Sənan” (Hüseyn Cavid) tamaşasıdır. Sevgidən bəhs edən tamaşanın quruluşçu rejissoru Cənnət Səlimovadır.

Teatrın direktoru Mübariz Həmidovun sözlərinə görə, gündüz tamaşalarının əksəriyyətində yerlərin 80-90 faiz satılır. Axşam tamaşalarından çox satılanlar isə “Şeyx Sənan” (H.Cavid) və “Aydın” (C.Cabbarlı) tamaşalarıdır: “Adı tamaşaçıya az tanış olan Martin Makdonaxın trilogiyası: “Lineynin gözəllik kraliçası” “Konnemarada kəllə”, “Yalqız Qərb” az baxılan tamaşalardandır, halbuki, tamaşaların keyfiyyəti çox yüksəkdir”

Musiqili Teatrının mətbuat katibi Samir Sədaqətoğlu ən çox satılan tamaşalar sırasında teatrın repertuarının az qala yarısını sadaladı: Ü.Hacıbəyli "O olmasın, bu olsun", "Ər və arvad", E. Sabitoğlu, T. Vəliyeva "Bankir adaxlı", R. Hacıyev, E. Ocaqov, F. Zöhrabov "Talelər qovuşanda", rus dilli tamaşalar J.B. Molyer "Skapenin kələkləri", M. Komaletti "Xoşbəxt ailə oyunu oynayırıq və ya fransızsayağı qarnir", uşaq tamaşaları Q.X. Anderson "Düyməcik", R. Ağayeva, A. Xayt, A. Kurlyanski "Bir dayan canavar", E. Sabitoğlu, Y. Şvarts "Qırmızıpapaq" ən çox bilet satılan tamaşalardan imiş.

Dövlət Pantomima Teatrının “Hit” tamaşası uzun illərdir ki, dəyişmir: teatr yaranandan repertuarda olan aktyorları ilə, nömrələri ilə yenilənən “Pantomima buketi” (rej. Bəxtiyar Xanızadə) 20 ildən artıqdır ki, tamaşaçıların ən gözlədiyi, ən izlədiyidir. Teatrın direktoru Elman Rəfiyevin sözlərinə görə, indi tamaşaçı daha çox əyləncəli, gülməli tamaşalara meyl edir. Nə qədər yaxşı olsa da, “Kesa və Marito” kimi düşündürücü tamaşaları ən çox satılan tamaşalar siyahısına sala bilmərəm”.

Yuğ teatrının ən çox satılan tamaşası “Naməlum Axundzadə” tamaşasıdır. “Naməlum Axundzadə” Mirzə Fətəli Axundovun “Kəmalüddövlə məktubları” traktatı və komediyaları əsasında Gümrah Ömərin hazırladığı tamaşadır.

Kukla teatrının ən çox satılan tamaşası “Cik-cik xanım” tamaşasıdır. Hərçənd teatrın demək olar ki, bütün tamaşaları belə demək mümkünsə “kassa tamaşalarıdır”.

Opera və Balet Teatrının ən çox satılan opera tamaşası Ü.Hacıbəyovun “Leyli və Məcnun” operasıdır. Baletlərdən isə “Min bir gecə”, “Qu gölü”, “Yeddi gözəl” kassadan ən çox gəlir gətirənlərdir.

Rus Dram Teatrının ən gəlirli tamaşa üçlüyündə “Qürur və qərəz” (C.Ostin) 1-ci yerdədir. “Billur sarayda” (i.Əvəndiyev) və “Adaxlı çağırmısız, qızlar” tamaşası da gəlirli tamaşalardandır. Teatarın direktoru Ədalət Hacıyev bu vəziyyəti ilk növbədə tamaşaların mövzusuna bağlayır: hər üç tamaşada baş qəhrəman qadınlardır. Bizim tamaşaçılarımızın da çoxu qadınlardır”.

• Tanınmış rejissor vəfat etdi
• Balaca qara balıq - Səməd Behrənginin hekayəsi
• Amazonda qədim sivilizasiya aşkar edildi